ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨུ་རུ་སིའི་ཙུང་ཐུང་མེ་ཏི་བེ་ཅེ་ཧྥུའུ་ཡིས་ཚེས29ཉིན་སོ་ཆི་རུ་ཡོད་པའི་ཙུང་ཐུང་བཞུགས་ཤག་ནས་ཙུང་ཐུང་བཀའ་རྒྱ་བཀོད་དེ། ད་ལོའི་ཟླ12པའི་ཚེས4ཉིན་ཨུ་རུ་སིའི་སྐབས་དྲུག་པའི་གྲོས་ཁང་ཞོལ་མའི་འདེམ་བསྐོ་བྱ་འགུལ་སྤེལ་རྒྱུ་གཏན་འཁེལ་བྱས།

ཨུ་རུ་སིའི་འདེམ་བསྐོའི་བཅའ་ཁྲིམས་ཀྱི་གཏན་འཁེལ་ལྟར་ན། གྲོས་ཁང་ཞོལ་མའི་འདེམ་བསྐོའི་དུས་ཚོད་ཐག་བཅད་པའི་ཙུང་ཐུང་བཀའ་རྒྱ་ཁྱབ་སྒྲོག་བྱས་རྗེས། སྐབས་གསར་བའི་གྲོས་ཁང་ཞོལ་མའི་འདེམ་བསྐོ་དངོས་སུ་སྤེལ་མགོ་རྩོམ་དགོས།

མེ་ཏི་བེ་ཅེ་ཧྥུའུ་ཡིས་འདེམ་བསྐོ་ལ་ཞུགས་པའི་དངོས་སུ་ཐོ་འགོད་བྱས་པའི་སྲིད་ཏང་བདུན་གྱི་མགོ་ཁྲིད་པར་ཐུག་འཕྲད་བྱེད་སྐབས་བསྟན་དོན། བདམས་ཐོན་བྱུང་བའི་སྐབས་གསར་བའི་གྲོས་ཁང་ཞོལ་མའི་འདེམ་བསྐོ་ལས་རྒྱ་ཆེའི་འདེམ་དམངས་ཀྱི་ཆབ་སྲིད་རེ་འདུན་མཚོན་ཐུབ་པར་རེ་བ་བྱེད་བཞིན་ཡོད་ཟེར།

མེ་ཏི་བེ་ཅེ་ཧྥུའུ་ཡིས་ད་རུང་མཚམས་སྦྱོར་བྱས་དོན། སྐབས་དྲུག་པའི་གྲོས་ཁང་ཞོལ་མའི་འདེམ་བསྐོ་ནི་འབྲེལ་ཡོད་འདེམ་བསྐོའི་བཅའ་ཁྲིམས་ལ་བཟོ་བཅོས་བྱས་རྗེས་སྤེལ་བ་ཡིན་ཟེར། སྐབས་དྲུག་པའི་གྲོས་ཁང་ཞོལ་མའི་གྲོས་མིའི་འགན་ཡུན་ལོ་བཞི་ནས་ལྔ་རུ་ཇེ་མང་དུ་བཏང་བ་དང་། གྲོས་ཁང་གི་སྲིད་ཏང་མིན་པའི་འདེམ་སྒུག་མི་སྣ་གྲོས་ཁང་ཞོལ་མའི་འདེམ་བསྐོ་ལ་ཞུགས་ན་ཐོ་འགོད་བྱེད་པར་མཁོ་བའི་རྒྱབ་སྐྱོར་མཁན་གྱི་མཚན་མིང་འབུམ་གཉིས་ནས་འབུམ་གཅིག་དང་ཁྲི་ལྔ་རུ་ཇེ་ཉུང་དུ་བཏང་ཡོད་ཟེར།