ལི་པུ་ཡཱའི་ངོ་རྒོལ་ཕྱོགས་ཁག་གི་དམག་ཕྱོགས་མགྲིན་ཚབ་པ་པཱ་ནེ་ཡིས་ཚེས་ཉེར་བརྒྱད་ཉིན་བསྟན་དོན། ངོ་རྒོལ་ཕྱོགས་ཁག་གིས་རྟོག་ཞིབ་ཚན་ཆུང་བཙུགས་ཏེ། ཏི་ལེ་པོ་ལི་དང་དེའི་ཉེ་འདབས་ས་ཁུལ་གྱི་བཙོན་ཁང་ནས་གར་སོང་མ་རྙེད་པའི་བཙོན་མ་ཁྲི་བཞི་དང་སྟོང་བདུན་ལ་བརྩད་གཅོད་བྱེད་བཞིན་ཡོད་པ་དང་། གནས་ཚུལ་ཤེས་མཁན་གྱི་མང་ཚོགས་དག་གིས་ངོ་རྒོལ་ཕྱོགས་ལ་མཉམ་ལས་བྱས་ཏེ་བཙོན་མ་དེ་དག་འཚོལ་བར་རོགས་རམ་བྱེད་དགོས་པའི་འབོད་སྐུལ་བཏང་།པཱ་ནེ་ཡིས་ཉིན་དེར་བསྡུས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་བཤད་རྒྱུུར། ལི་པུ་ཡཱའི་ངོ་རྒོལ་ཕྱོགས་ཁག་གིས་ཏི་ལེ་པོ་ལིའི་དམག་དོན་འགུལ་བསྐྱོད་ཁྲོད་བསྡོམས་པས་བཀག་ཉར་བྱས་པའི་བཙོན་མ་ཁྲི་གཅིག་ཙམ་བཏང་ཡོད་ཀྱང་། དེའི་སྔོན་གྱི་བསྡོམས་རྩིས་རྒྱུུ་ཆ་ལྟར་ན། ཏི་ལེ་པོ་ལི་དང་དེའི་ཉེ་འདབས་ས་ཁུལ་གྱི་བཙོན་ཁང་ཁྲོད་དུ་བསྡོམས་པས་བཙོན་མ་ཁྲི་ལྔ་དང་སྟོང་བདུན་ནས་ཁྲི་དྲུག་བཀག་ཡོད་ལ། དེའི་ནང་བརྒྱ་ཆའི་གོ་ལྔའི་མི་ད་ལོའི་ཟླ་གཉིས་པར་ལི་པུ་ཡཱའི་ཉམས་ཉེན་བྱུང་རྗེས་འཛིན་བཟུང་བྱས་པ་རེད།པཱ་ནེ་ཡིས་བཤད་རྒྱུར། གར་སོང་མ་རྙེད་པའི་བཙོན་མར་ངོ་རྒོལ་ཕྱོགས་ཁག་གིས་དོ་སྣང་ཆེན་པོ་བྱེད་བཞིན་ཡོད་ཅིང་། གལ་ཏེ་གནས་ཚུལ་ཤེས་མཁན་གྱིས་བསམ་བཞིན་དུ་གསང་སྟེ་སྙན་ཞུ་མ་བྱས་ན། ནག་ཉེས་བཟོ་མཁན་གྱི་གྲོགས་སུ་བརྩི་ངེས་ཡིན་ཟེར།ཁཱ་ཀྲ་ཧྥེ་ཡི་བུ་ཧཱ་མུས་སི་ཡི་གནས་ཚུལ་ཐད་ནས་པཱ་ནེ་ཡིས་བཤད་རྒྱུར། ངོ་རྒོལ་ཕྱོགས་ཁག་གི་དམག་དཔུང་གིས་ཚེས་ཉེར་བདུན་ཉིན་ཏི་ལེ་པོ་ལིའི་ཤར་ངོས་ས་ཁུལ་ནས་ཧཱ་མུས་སི་ཡི་དམག་དཔུང་གི་རླངས་འཁོར་གཉིས་རྙེད་ནས་འགས་གཏོར་བཏང་བ་དང་། རླངས་འཁོར་སྟེང་གི་མི་ནི་ཧཱ་མུས་སིའི་སྐུ་སྲུང་བ་ཡིན་སྲིད་ཀྱང་། བེམ་པོ་འཚིག་པར་བརྟེན་ཧཱ་མུས་སི་ཡོད་མེད་ལ་ངོས་འཛིན་བྱེད་ཐབས་མེད་ཟེར།