ཨ་མེ་རི་ཁའི་སྲིད་གཞུང་གི་མཐོ་རིམ་དཔོན་རིགས་ཀྱིས་ཚེས་ཉེར་བདུན་ཉིན་བཤད་རྒྱུར། རྟེན་གཞི་རྩ་འཛུགས་ཀྱི་མགོ་བ་གཙོ་བོ་གཉིས་པ་ལཱ་ཧི་མན་ཟླ་འདིའི་ཚེས་ཉེར་གཉིས་ཉིན་ཕཱ་ཁི་སི་ཐན་ནས་ཨ་མེ་རི་ཁའི་དམག་གིས་བསད་ཟེར།

མིང་བཤད་མི་འདོད་པའི་དཔོན་རིགས་དེས་བཤད་རྒྱུར། ལཱ་ཧི་མན་ནི་ཕཱ་ཁི་སི་ཐན་ནུབ་བྱང་ཕྱོགས་ཀྱི་ཝ་ཅི་ལི་སི་ཐན་ནས་བསད་པ་ཡིན་ཟེར་ཡང་། ཁོས་ལཱ་ཧི་མན་བསད་པའི་གནས་ཚུལ་ཞིབ་མོར་མ་བཤད།

དེའི་སྔོན་གསར་འགྱུར་ལས་རིགས་རེ་འགས་བསྒྲགས་པའི་གནས་ཚུལ་ལྟར་ན། ཨ་མེ་རི་ཁའི་ཀྲུང་དབྱང་གསང་འཕྲིན་ཅུའུ་ཡི་མི་བསྡད་མེད་པའི་གནམ་གྲུ་ཞིག་གིས་ས་ཁུལ་དེར་འཇབ་རྒོལ་བྱས་ཟེར། མིག་སྔར་ད་རུང་ལཱ་ཧི་མན་གྱི་ཤི་རྐྱེན་དེ་ཐེངས་དེའི་འཇབ་རྒོལ་ལ་འབྲེལ་བ་ཡོད་མེད་མི་ཤེས།

ཕ་ཡུལ་ལི་པུ་ཡཱ་ཡིན་པའི་ལཱ་ཧི་མན་ནི་པིན་ལཱ་ཏན་ཤི་རྗེས་རྟེན་གཞི་རྩ་འཛུགས་ཀྱི་མགོ་བ་གཙོ་བོ་གཉིས་པར་གྱུར་བ་རེད། ཁོས་རྟེན་གཞི་རྩ་འཛུགས་ཀྱི་མགོ་བ་ཀྲ་ཝ་ཞི་ལིའི་ལག་རོགས་ཀྱི་ཚུལ་དུ་རྩ་འཛུགས་དེའི་ཉིན་རྒྱུན་གྱི་བཀོད་འདོམ་བྱ་བའི་འགན་འཁུར་ཡོད།