དབྱི་རག་ཉེན་རྟོག་ཕྱོགས་ཀྱིས་ཚེས་ཉེར་དྲུག་ཉིན་བཤད་རྒྱུར། དབྱི་རག་ལྷོ་ཕྱོགས་ཀྱི་པཱ་ཧྲི་ལཱ་ཞིང་ཆེན་གྱི་ཨ་པུའུ་ཧེ་ཞི་པུའུ་གྲོང་ཁྱེར་ནས་ཚེས་ཉེར་ལྔ་ཉིན་གྱི་དགོང་མོར་རླངས་འཁོར་འགས་གཏོར་འཇབ་རྒོལ་དོན་རྐྱེན་ཞིག་བྱུང་སྟེ། མི་སེར་དཀྱུས་མ་བཞི་རྐྱེན་ལམ་དུ་ཤོར་བ་དང་། གཞན་ཡང་མི་སོ་ལྔར་རྨས་ཕོག་ཟེར།

མིང་བཤད་མི་འདོད་པའི་ཨ་པུའུ་ཧེ་ཞི་པུའུ་གྲོང་ཁྱེར་གྱི་ཉེན་རྟོག་དཔོན་པོ་ཞིག་གིས་ཞིན་ཧྭ་གསར་འགྱུར་ཁང་གི་གསར་འགོད་པའི་ཁ་པར་བཅར་འདྲི་དང་ལེན་བྱེད་སྐབས་བཤད་རྒྱུར། འཇབ་རྒོལ་མཁན་གྱིས་གྲོང་ཁྱེར་དེའི་ཧྲི་ཡེ་ཕྱོགས་ཁག་གི་དབྱི་སི་ལན་ཆོས་ཁང་ཞིག་གི་ཉེ་འདབས་སུ་འགད་རྫས་སྦས་ཡོད་པའི་རླངས་འཁོར་འགས་གཏོར་བཏང་སྟེ་ཤི་རྨས་བཟོས་པར་མ་ཟད། དེའི་ཉེ་འདབས་ཀྱི་རླངས་འཁོར་བཅོ་ལྔ་དང་ཁང་བ་བཞི་མེར་འབར་བ་རེད།

ཉེན་རྟོག་དཔོན་པོ་དེས་བཤད་རྒྱུར། མིག་སྔར་རྩ་འཛུགས་དང་མི་སྒེར་གང་རུང་གིས་འཇིགས་སྐུལ་དོན་རྐྱེན་དེར་ཁས་ལེན་མ་བྱས་པ་དང་། ཉེན་རྟོག་ཕྱོགས་ཀྱིས་གྱོད་གཞི་དེར་རྟོག་ཞིབ་བྱེད་བཞིན་ཡོད་ཟེར།