ཁྲའོ་ཞན་གྱི་ཧོང་ཧེ་ཏའོ་དང་ཅང་ཡོན་ཏའོ་ས་ཁུལ་ལ་དྲག་ཆར་བབས་ཏེ་ཆུ་ལོག་གི་གནོད་པ་བྱུང་བ་དང་། ཁྲའོ་ཞན་གྱི་ཆུ་ལོག་གི་གནོད་འཚེ་ཐེབས་སར་རོགས་སྐྱོར་བྱེད་ཆེད། ཧན་གོས་ཁྲའོ་ཞན་ལ་ཧན་གོའི་སྒོར་མོ་དུང་ཕྱུར་ལྔ་བཅུའི་རྒུད་སྐྱོབ་དངོས་རྫས་འདོན་སྤྲོད་བྱེད་རྒྱུ་ཐག་བཅད།

ཧན་གོ་སྲིད་གཞུང་གིས་ཚེས་གསུམ་ཉིན་ཧན་གོའི་རྒྱ་གྲམ་དམར་པོ་ཚོགས་པའི་མིང་སྟེང་ནས་ཁྲའོ་ཞན་ལ་ཧན་གོས་ཧན་གོའི་སྒོར་མོ་དུང་ཕྱུར་ལྔ་བཅུའི་རྒུད་སྐྱོབ་དངོས་རྫས་འདོན་སྤྲོད་བྱེད་འདོད་ཡོད་ཅེས་བརྡ་བཏང་།

ཧན་གོ་སྲིད་གཞུང་གིས་བཤད་རྒྱུར། ཧན་གོའི་རྒྱ་གྲམ་དམར་པོ་ཚོགས་པས་མི་ཆོས་རིང་ལུགས་ཀྱི་དགོངས་པར་དམིགས་ཏེ། དྲག་ཆར་དང་ཆུ་ལོག་གི་གནོད་འཚེ་ཐེབས་པའི་ཁྲའོ་ཞན་གྱི་སྡོད་དམངས་ལ་མྱུར་དུ་རྒུད་སྐྱོབ་དངོས་རྫས་འདོན་སྤྲོད་བྱེད་འདོད་ཡོད་པ་དང་། རྒུད་སྐྱོབ་དངོས་རྫས་ཀྱི་ནང་དུ་འཚོ་བའི་ཉེར་མཁོའི་དངོས་རྫས་དང་སྨན་རྫས་སོགས་འདུས་ལ་རིན་ཐང་ཧན་གོའི་སྒོར་མོ་དུང་ཕྱུར་ལྔ་བཅུ་ཡིན་ཟེར། ཧན་གོའི་གཅིག་གྱུར་པུའུ་ཡི་དཔོན་རིགས་ཤིག་གིས་བཤད་རྒྱུར། ཐེངས་འདིའི་རོགས་སྐྱོར་ནི་འབྲུ་རིགས་ཐད་ཀྱི་རོགས་སྐྱོར་མིན་པས། འབྲས་དང་ཕྱེ་སོགས་རོགས་སྐྱོར་དངོས་རྫས་ཀྱི་ནང་དུ་མི་འདུ་ཟེར།