ལི་པུ་ཡཱའི་ངོ་རྒོལ་ཕྱོགས་ཁག་གི་བཀོད་འདོམ་དཔོན་པོ་ཡུག་ནེ་སི་ལ་འཇབ་རྒོལ་ཐེབས་ཏེ་རྐྱེན་ལམ་དུ་ཤོར་བའི་དོན་རྐྱེན་ལ་དམིགས་ཏེ། ཨ་མེ་རི་ཁའི་རྒྱལ་སྲིད་སྤྱི་ཁྱབ་ཁང་གི་མགྲིན་ཚབ་པ་ཐོ་ནཱ་ཡིས་ཟླ་བདུན་པའི་ཚེས་ཉེར་དགུ་ཉིན་རྒྱུན་ལྡན་གྱི་གསར་འགྱུར་སྒྲོག་སྤེལ་ཚོགས་འདུའི་སྟེང་ལི་པུ་ཡཱའི་ངོ་རྒོལ་ཕྱོགས་ཁག་གིས་མཐུན་སྒྲིལ་བྱེད་དགོས་པའི་འབོད་སྐུལ་བཏང་།

ཐོ་ནཱ་ཡིས་བལྟས་ན་ཡུག་ནེ་སིའི་འདས་རྐྱེན་ནི་ལི་པུ་ཡཱའི་ངོ་རྒོལ་ཕྱོགས་ཁག་གི་འགྲན་རྩོད་ཅིག་ཡིན་པར་བསམ་ཡོད་ཅིང་། ཁོས་ལི་པུ་ཡཱའི་ངོ་རྒོལ་ཕྱོགས་ཁག་གིས་འཐབ་རྩོད་ཁྲོད་ཀྱི་འགྲན་རྩོད་སྣ་ཚོགས་ཁྱད་དུ་བསལ་ནས་ནང་ཁུལ་གྱི་མཐུན་སྒྲིལ་སྲུང་འཛིན་བྱེད་དགོས་པའི་འབོད་སྐུལ་བཏང་།

ཐོ་ནཱ་ཡིས་ལི་པུ་ཡཱའི་དེང་སྐབས་རྒྱུན་ཆད་མེད་པའི་དྲག་ཤུགས་དོན་རྐྱེན་དང་། ཛ་དྲག་དང་རྙོག་འཛིང་གི་གནས་བབ་དེ་ལི་པུ་ཡཱའི་མགོ་ཁྲིད་པ་ཁཱ་ཀྲ་ཧྥེ་དང་དེའི་སྲིད་གཞུང་གི་བཟོས་པར་བཤད་པ་དང་། ཡང་བསྐྱར་ཁཱ་ཀྲ་ཧྥེ་ཡིས་དབང་ཆ་བསྐྱུར་དགོས་པའི་རེ་བ་བཏོན།

ཡུག་ནེ་སི་ཡིས་སྔོན་ཆད་ཁཱ་ཀྲ་ཧྥེ་སྲིད་གཞུང་གི་ནང་སྲིད་པུའུ་ཀྲང་གི་འགན་ཁུར་མྱོང་། ད་ལོའི་ཟླ་གཉིས་པར་ལི་པུ་ཡཱའི་ཟིང་འཁྲུག་བྱུང་རྗེས་ལས་འགན་བསྐྱུར་ནས་ངོ་རྒོལ་ཕྱོགས་ཁག་ལ་སྐྱབས་བཅོལ་བྱས་པ་རེད།