ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨ་མེ་རི་ཁའི་གསར་འགྱུར་ལས་རིགས་ཀྱིས་ཚེས18ཉིན་བསྒྲགས་པའི་གནས་ཚུལ་ལྟར་ན། ཨ་མེ་རི་ཁའི་མཐོ་རིམ་ཕྱི་འབྲེལ་དཔོན་པོ་མང་བོས་གཟའ་འཁོར་སྔོན་མའི་མཇུག་ཏུ་ལི་པུ་ཡཱའི་མགོ་ཁྲིད་པ་ཁཱ་ཀྲ་ཧྥེ་ཡི་འཐུས་མི་དང་ཐུག་འཕྲད་བྱས་པ་དང་། དམིགས་ཡུལ་ནི་ཁཱ་ཀྲ་ཧྥེ་ཡིས་དབང་ཆ་སྐྱུར་བའི་རེ་བ་འདོན་པའི་ཆེད་དུ་རེད་ཟེར།

མིང་མ་བཤད་པའི་ཨ་མེ་རི་ཁའི་དཔོན་པོ་ཞིག་གིས་བཤད་རྒྱུར། ཨ་མེ་རི་ཁའི་རྒྱལ་སྲིད་སྤྱི་ཁྱབ་ཁང་གི་ཀྲུང་ཏུང་ལས་དོན་གྱི་འགན་ཁུར་བའི་རྒྱལ་སྲིད་བློན་ཆེན་གྱི་ལས་རོགས་པ་ཧྥེ་ཨར་ཐི་མན་དང་བཅས་པའི་ཨ་མེ་རི་ཁའི་མཐོ་རིམ་ཕྱི་འབྲེལ་དཔོན་པོ་གསུམ་དང་ཁཱ་ཀྲ་ཧྥེ་ཡི་སྤུན་གྲོགས་བཞི་ཡིས་ཚེས16ཉིན་རྒྱལ་ཁབ་གཞན་ནས་ཐུག་འཕྲད་བྱས་ཟེར། ལི་པུ་ཡཱའི་སྲིད་གཞུང་གི་མགྲིན་ཚབ་པས་བཤད་ན་ཐུག་འཕྲད་དེ་ཐུ་ནི་ཞི་ཡཱ་ནས་སྤེལ་བ་ཡིན་ཟེར།

ཨ་མེ་རི་ཁའི་དཔོན་རིགས་ཀྱིས་བསྟན་དོན། ཨ་མེ་རི་ཁ་ཐུག་འཕྲད་ལ་ཞུགས་པའི་དམིགས་ཡུལ་ནི་ཁཱ་ཀྲ་ཧྥེ་ཡིས་དབང་ཆ་སྐྱུར་དགོས་པའི་རེ་བ་འདོན་པའི་ཆེད་དུ་ཡིན་ལ། ཐེངས་འདིའི་ཐུག་འཕྲད་དེ་ནི་གྲོས་མོལ་མིན་ཞིང་ཁཱ་ཀྲ་ཧྥེ་ཡི་འཐུས་མི་དང་ཡང་བསྐྱར་ཐུག་འཕྲད་བྱེད་པའི་འཆར་གཞི་མེད་ཟེར།  །