ཨ་ཧྥུའུ་ཧན་ཤར་ཕྱོགས་ཀྱི་ནན་ཀི་ཧཱ་ཨར་ཞིང་ཆེན་གྱི་དཔོན་རིགས་ཀྱིས་ཚེས་བཞི་ཉིན་བཤད་རྒྱུར།ཨ་ཧྥུའུ་ཧན་རྒྱལ་ཁབ་ཀྱི་བདེ་འཇགས་དམག་དཔུང་དང་ཨ་ཧྥུའུ་ཧན་དུ་སྡོད་པའི་བྱང་ཆིངས་ཀྱི་དམག་དཔུང་གིས་ཚེས་གསུམ་ཉིན་གྱི་དགོང་མོར་ནན་ཀི་ཧཱ་ཨར་ཞིང་ཆེན་ནས་ཐཱ་ལེ་པན་གྱི་དྲག་ཆས་མི་སྣ་བཅུ་དྲུག་བསད་ཟེར།
 ནན་ཀི་ཧཱ་ཨར་ཞིང་ཆེན་གྱི་ཧུའུ་ཅི་ཡཱ་ནེ་ས་ཁུལ་གྱི་དཔོན་པོ་ཧཱ་སང་གིས་ཞིན་ཧྭ་གསར་འགྱུར་ཁང་གི་གསར་འགོད་པར་བཤད་རྒྱུར།ཨ་ཧྥུའུ་ཧན་རྒྱལ་ཁབ་བདེ་འཇགས་དམག་དཔུང་དང་ཨ་ཧྥུའུ་ཧན་དུ་སྡོད་པའི་བྱང་ཆིངས་རྩ་འཛུགས་ཀྱི་དམག་དཔུང་གིས་ཚེས་གསུམ་ཉིན་གྱི་དགོང་མོར་མཉམ་འབྲེལ་དམག་དོན་འགུལ་བསྐྱོད་ཅིག་སྤེལ་ཏེ།ཧུའུ་ཅི་ཡཱ་ནེ་ས་ཁུལ་གྱི་སྡེ་བ་ཞིག་ནས་ཐཱ་ལེ་པན་གྱི་དྲག་ཆས་མི་སྣ་བཅུ་དྲུག་བསད་པ་དང་།དེའི་ནང་དྲག་ཆས་མི་སྣ་རེ་འགའ་ནི་ཕྱི་རྒྱལ་གྱི་མི་ཡིན་པ་ལས་ཨ་ཧྥུའུ་ཧན་གྱི་སྤྱི་དམངས་མིན་ཟེར།
 ཨ་ཧྥུའུ་ཧན་གྱི་ཐཱ་ལེ་པན་དྲག་ཆས་རྩ་འཛུགས་ཀྱི་མགྲིན་ཚབ་པ་མུའུ་ཅཱ་ཞི་ཏི་ཡིས་ཁ་པར་ལས་གསར་འགྱུར་ལས་རིགས་ལ་བཤད་རྒྱུར།ཐཱ་ལེ་པན་དྲག་ཆས་པ་དང་ཨ་ཧྥུའུ་ཧན་གྱི་སྲིད་གཞུང་དམག་དཔུང་གིས་ཚེས་གསུམ་ཉིན་གྱི་དགོང་མོར་དུས་ཚོད་འགར་འཁྲུག་རྩོད་བྱས་པ་དང་།ཐཱ་ལེ་པན་གྱི་དྲག་ཆས་མི་སྣ་བཅུ་གསུམ་ཤི།གཞན་ཡང་ཨ་ཧྥུའུ་ཧན་དང་ཨ་མེ་རི་ཁའི་དམག་མི་ཉི་ཤུ་ལྷག་འཁྲུག་རྩོད་ཁྲོད་བསད་ཟེར།