ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། མཉམ་འབྲེལ་རྒྱལ་ཚོགས་ཀྱི་ཆེས་དར་རྒྱས་མེད་པའི་རྒྱལ་ཁབ་ཀྱི་ཚོགས་འདུ་སྐབས་བཞི་པ་དེ་ཉིན་ཤས་གོང་ཐུར་ཁེའི་གྲོང་ཁྱེར་ཆེ་ཤོས་དབྱི་སི་ཐན་པུའར་རུ་གྲོལ་ཞིང་། ཚོགས་འདུའི་ཐོག《དབྱི་སི་ཐན་པུའར་གྱི་བསྒྲགས་གཏམ》དང《ཆེས་དར་རྒྱས་མེད་པའི་རྒྱལ་ཁབ་ཀྱི་འབྱུང་འགྱུར་ལོ་བཅུའི་རིང་གི་བྱ་སྤྱོད་འཆར་གཞི》གཉིས་ལ་གྲོས་འཆམ་བྱུང་ནས་ཆེས་དར་རྒྱས་མེད་པའི་རྒྱལ་ཁབ48ལ་འབྱུང་འགྱུར་ལོ10ཡི་རིང་གི་འཕེལ་རྒྱས་འཆར་གཞི་བཏོན་ཡོད་པ་རེད།

བསྒྲགས་གཏམ་ནང་གོ་ལ་ཧྲིལ་པོའི་རོགས་ཟླའི་འབྲེལ་བ་དང་།རྒྱལ་སྤྱིའི་སྤྱི་ཚོགས་ཀྱིས་རོགས་སྐྱོར་ཐད་ཤུགས་སྣོན་རྒྱག་པ།ཐོན་ཁུངས་ཀྱི་ལེགས་ཆ་འདོན་སྤེལ་བྱེད་པ།དབུལ་ཕོངས་མེད་པ་བཟོ་བ། རྒྱུན་མཐུད་ངང་འཕེལ་རྒྱས་ཡོང་བ་བྱེད་པ་བཅས་བྱས་པ་བརྒྱུད་སླད་ཕྱིན་ལོ་བཅུའི་རིང་འཛམ་གླིང་གི་ཆེས་དར་རྒྱས་མེད་པའི་རྒྱལ་ཁབ48ཀྱི་གྲངས་འབོར་ཕྱེད་ཀ་ཉུང་དུ་གཏོང་རྒྱུའི་དམིགས་ཚད་མངོན་འགྱུར་བྱེད་དགོས་ཞེས་བཏོན་ཡོད་པ་རེད།

མིག་སྔར་ཆེས་དར་རྒྱས་མེད་པའི་རྒྱལ་ཁབ་ལ་ཁྱོན་མི་གྲངས་ཁྲི8800ཡོད་པའི་ནང་གི་ཕྱེད་ཀའི་འཚོ་བ་ཤིན་ཏུ་དབུལ་ཕོངས་ཡིན་པར་བརྟེན་བྱ་སྤྱོད་འཆར་གཞིའི་ནང་དམིགས་སུ་བཀར་ནས་སྔོན་ལ་འཕེལ་རྒྱས་གཏོང་བའི་ཁྱབ་ཁོངས་བཏོན་ཡོད་པ་སྟེ། ཐོན་སྐྱེད་ནུས་པ་དང་། རྨང་གཞིའི་སྒྲོག་བཀོད། ནུས་རྒྱུ། ཚན་རྩལ་དང་གསར་གཏོད། མི་སྒེར་གྱི་དཔལ་འབྱོར་འཕེལ་རྒྱས། ཞིང་ལས་དང་འབྲུ་རིགས་བདེ་འཇགས། ཚོང་དོན། སྤྱི་ཚོགས་འཕེལ་རྒྱས། སློབ་གསོ་དང་གསོ་སྦྱོང་སོགས་ཡིན་པ་རེད།

བྱ་སྤྱོད་འཆར་གཞིའི་ནང་རྒྱལ་ཁབ་འབྱོར་ཕྱུག་ལྡན་པ་དང་རྒྱལ་ཁབ་དབུལ་པོར་ཞིབ་ཕྲའི་གྲོས་གཞི་བཏོན་ཡོད་པ་དང་འབྲེལ་བ་ཡོད་པའི་ཁྱབ་ཁོངས་ནང་གནམ་གཤིས་ཀྱི་འགྱུར་ལྡོག་དང་། རྒྱལ་སྤྱིའི་སྤྱི་ཚོགས་ཀྱི་རོགས་སྐྱོར། འཕྲོད་བསྟེན། ཕྱི་རྒྱལ་གྱི་མ་འཇོག་སོགས་ཚུད་ཡོད་པ་དང་། སྐབས་འདིའི་ཚོགས་འདུའི་གྲུབ་འབྲས་གལ་ཆེན་ཞིག་ཡིན་པའི་ཆ་ནས་དར་རྒྱས་ཆེ་བའི་རྒྱལ་ཁབ་ཚོས་ཆེས་དར་རྒྱས་མེད་པའི་རྒྱལ་ཁབ་དང་ཟླ་བ5ཡི་རིང་གི་དཀའ་ཚེགས་ཆེ་བའི་གྲོས་མོལ་བྱས་པ་བརྒྱུད་མཐར་དར་རྒྱས་ཆེ་བའི་རྒྱལ་ཁབ་ཀྱི་རྒྱལ་དམངས་ཡོང་འབབ་ཀྱི0.15%ནས0.2%བར་ཆེས་དར་རྒྱས་མེད་པའི་རྒྱལ་ཁབ་ཀྱི་གཞུང་ཕྱོགས་ཀྱི་འཕེལ་རྒྱས་རོགས་སྐྱོར་བྱེད་རྒྱུར་མོས་མཐུན་བྱུང་བ་དང་། མིག་སྔར་དར་རྒྱས་ཆེ་བའི་རྒྱལ་ཁབ་ཀྱི་གཞུང་ཕྱོགས་ཀྱི་འཕེལ་རྒྱས་རོགས་སྐྱོར་བྱེད་ཚད་དེ་ཁོང་ཚོའི་རྒྱལ་དམངས་ཡོང་འབབ་ཀྱི0.1%ལས་དམའ་བ་ཡོད་པ་རེད།

མིག་སྔར་གོ་ལ་ཧྲིལ་པོར་ཆེས་དར་རྒྱས་མེད་པའི་རྒྱལ་ཁབ་ཁྱོན48ཡོད་པའི་ནང་ཨ་ཧྥེ་རི་ཁར་རྒྱལ་ཁབ33དང་། ཨེ་ཤ་ཡ་དང་ཞི་བདེ་རྒྱ་མཚོ་ས་ཁུལ་དུ་རྒྱལ་ཁབ14དེ་བཞིན་ཏིང་མེ་གླིང་དང་ཅ་ལེ་པེ་ས་ཁུལ་དུ་རྒྱལ་ཁབ1བཅས་ཡོད་པ་རེད།  །