ཁོ་ཐེ་ཏི་ཝོར་རྒྱལ་ཁབ་ཀྱིས་ཚེས་ཉེར་གཅིག་ཉིན་ཆབ་སྲིད་རྒྱལ་ས་ཡཱ་མུའུ་སུའུ་ཁི་ལོ་ནས་ཙུང་ཐུང་ཝ་ཐཱ་ལཱ་ཡིས་འགན་འཁུར་བའི་མཛད་སྒོ་དངོས་སུ་སྤེལ་བ་དང་། ཁོ་ཐེ་ཏི་ཝོར་སྡོད་པའི་ཀྲུང་གོའི་གཞུང་ཚབ་པ་ཝེ་བུན་ཧྭ་ཡིས་ཀྲུང་གོའི་སྲིད་གཞུང་གི་ཚབ་བྱས་ཏེ་མཛད་སྒོར་ཞུགས།
 ཝ་ཐཱ་ལཱ་ཡིས་ལས་འགན་འཁུར་བའི་མཛད་སྒོའི་སྟེང་ཁོ་ཐེ་ཏི་ཝོར་གྱི་ལོ་རྒྱུས་གསར་བ་ཞིག་མགོ་བརྩམས་པ་དང་། ཁོ་ཐེ་ཏི་ཝོར་གྱི་མིས་ལོ་རྒྱུས་གསར་བ་འབྲི་བའི་ཐུན་མོང་གི་རེ་འདོད་མངོན་འགྱུར་བྱུང་ཡོད་ཟེར། ཁོས་ད་རུང་བསྟན་དོན། འགན་འཁུར་བའི་མཛད་སྒོ་ནི་ཆོ་ག་སྟབས་བདེ་ཞིག་ཡིན་པར། ཁོ་ཐེ་ཏི་ཝོར་ཡང་བསྐྱར་རྒྱལ་སྤྱིའི་གར་སྟེགས་སུ་སླེབས་པར་རྟེན་འབྲེལ་ཞུ་བ་ཡིན་ཟེར།
 ཝ་ཐཱ་ལཱ་ཡིས་ཁོ་ཐེ་ཏི་ཝོར་རྒྱལ་ཡོངས་ཀྱི་འགྲིག་མཐུན་མངོན་འགྱུར་བྱེད་པར་འབད་བརྩོན་བྱེད་རྒྱུ་བསྐྱར་སྒྲོག་བྱས་དོན། མི་དམངས་ཀྱིས་སྒར་ས་ཞིག་གི་རྒྱལ་ཁར་རྟེན་འབྲེལ་ཞུ་བ་ཙམ་མིན་པར་ལོ་རྒྱུས་ཀྱི་མགོ་བརྩམས་ས་གསར་བ་ཞིག་ལ་རྟེན་འབྲེལ་ཞུ་དགོས་པའི་འབོད་སྐུལ་བཏང་བར་མ་ཟད། མ་འོངས་པའི་ཉིན་འགའི་ནང་རྒྱལ་ཡོངས་ཀྱི་མཉམ་འབྲེལ་སྲིད་གཞུང་བཙུགས་ན་འགྲིག་མཐུན་མངོན་འགྱུར་འབྱུང་བར་ཕན་པ་ཡོད་ཟེར།
 མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཕན་ཅི་བུན་དང་། ཧྥ་རན་སིའི་ཙུང་ཐུང་སཱ་ཁི་ཆི། ཨ་ཧྥེ་རི་ཁ་ནུབ་མའི་དཔལ་འབྱོར་ཐུན་མོང་ཚོགས་པའི་ཁོངས་གཏོགས་རྒྱལ་ཁབ་ཀྱི་མགོ་གཙོ་མང་བོ་མཛད་སྒོར་ཞུགས། དེ་ལས་གཞན་ཝ་ཐཱ་ལཱ་ཡི་རྒྱབ་སྐྱོར་མཁན་ཁྲི་ཕྲག་འགའ་མཛད་སྒོར་ཞུགས།