ཨ་ཧྥེ་རི་ཁ་ལྷོ་མའི་ཨ་ཧྥེ་རི་ཁའི་རྒྱལ་དམངས་ཚོགས་ཆེན་གྱི་ཀྲུའུ་ཞི་ཙུའུ་མཱ་ཡིས་ཚེས་བརྒྱད་ཉིན་བཤད་རྒྱུར། ཨ་ཧྥེ་རི་ཁ་ལྷོ་མས་གསར་དར་ཚོང་རའི་རྒྱལ་ཁབ་བར་གྱི་ཆབ་སྲིད་དང་དཔལ་འབྱོར་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་བྱེད་རྒྱུ་ཡིན་ཟེར།
 ཙུའུ་མཱ་ཉིན་དེར་ཨ་ཧྥེ་རི་ཁའི་རྒྱལ་དམངས་ཚོགས་ཆེན་གྱིས་ཨ་ཧྥེ་རི་ཁ་ལྷོ་མའི་ལིན་པོ་པོ་ཞིང་ཆེན་གྱི་ལོ་མཁའ་ནེ་གྲོང་ཁྱེར་ནས་བསྡུས་པའི་ཏང་བཙུགས་ནས་ལོ་ངོ་གོ་དགུ་འགོར་བའི་དགའ་སྟོན་མཛད་སྒོའི་སྟེང་ཞུ་ཚིག་ཕུལ་ཏེ་བཤད་རྒྱུར། ཨ་ཧྥེ་རི་ཁའི་རྒྱལ་དམངས་ཚོགས་ཆེན་གྱི་མགོ་ཁྲིད་འོག་གི་ཨ་ཧྥེ་རི་ཁ་ལྷོ་མ་རྒྱལ་ཁབ་ཀྱིས་མུ་མཐུད་དུ་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་ལ་ཤུགས་སྣོན་བྱེད་པ་དང་། འདྲ་མཉམ་གཉིས་ཕན་དང་ཐུན་མོང་འཕེལ་རྒྱས་ཀྱི་རྨང་གཞིའི་སྟེང་། མཉམ་ལས་ནང་རྐྱེན་འཛུགས་པ་དང་། ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས། རྒྱ་གར་དང་པཱ་ཞི། ཨ་ཧྥེ་རི་ཁ་ལྷོ་མའི་གྲོས་མོལ་གླེང་སྟེགས་སོགས་ལ་བརྟེན་ནས་གསར་དར་ཚོང་རའི་རྒྱལ་ཁབ་བར་གྱི་མཉམ་ལས་ལ་ཤུགས་སྣོན་བྱེད་རྒྱུ་ཡིན་ལ། ཨ་ཧྥེ་རི་ཁ་ལྷོ་མས་སྟོབས་དང་ལྡན་ཞིང་སྣ་མང་བའི་དཔལ་འབྱོར་འཛུགས་སྐྲུན་བྱེད་པར་འབད་བརྩོན་བྱས་ཏེ། ཧུར་ཐག་སྒོས་དེང་རབས་བཟོ་སྐྲུན་ལས་རིགས་ཀྱི་རྟེན་གཞིར་འགྱུར་དུ་འཇུག་རྒྱུུ་ཡིན་ཟེར།
 འཛམ་གླིང་ཡོངས་ཀྱི་ལས་དོན་ཐད་ནས་ཙུའུ་མཱ་ཡིས་བཤད་རྒྱུར། ཨ་ཧྥེ་རི་ཁའི་རྒྱལ་དམངས་ཚོགས་ཆེན་གྱིས་སྲིད་གཞུང་གི་སྣེ་ཁྲིད་དེ་མུ་མཐུད་དུ་རྒྱལ་ཁབ་ཉི་ཤུའི་སྡེ་ཚོགས་ཀྱི་མཐོ་རིམ་གྲོས་ཚོགས་དང་འཛམ་གླིང་ཉོ་ཚོང་རྩ་འཛུགས་ནང་ཞུགས་ཏེ། འདྲ་མཉམ་གྱི་འཛམ་གླིང་ཡོངས་ཀྱི་སྒྲིག་ལམ་འཛུགས་པར་ཡར་སྐུལ་བྱེད་རྒྱུ་ཡིན་ཟེར།
 ཁོས་ད་རུང་བསྟན་དོན། ཨ་ཧྥེ་རི་ཁའི་རྒྱལ་དམངས་ཚོགས་ཆེན་གྱིས་ཤུགས་ཆེན་པོས་ཨ་ཧྥེ་རི་ཁ་མནའ་འབྲེལ་ལ་རྒྱབ་སྐྱོར་བྱས་ཏེ། ཧུར་ཐག་སྒོས་ཨ་ཧྥེ་རི་ཁ་ས་ཁུལ་གྱི་ཞི་བདེ་དང་བརྟན་འཇགས་ལ་སྲུང་སྐྱོབ་བྱེད་རྒྱུ་ཡིན་ཟེར།