ཤིན་ཧྭ་གསར་འགྱུར་ཁང་སིང་ཀ་ཕོར་ནས་ཟླ11ཚེས7ཉིན་གློག་འཕྲིན་འབྱོར་གསལ། ཟླ11ཚེས7ཉིན་གྱི་ཕྱི་དྲོ་སིང་ཀ་ཕོར་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གིས་ཐའེ་དབན་ཕྱོགས་ཀྱི་འགོ་ཁྲིད་མ་དབྱིང་ཅིའུ་དང་མཇལ་འཛོམས་གནང་ནས་ངོགས་གཉིས་ཀྱི་འབྲེལ་བ་ཞི་བའི་ངང་འཕེལ་རྒྱས་གཏོང་རྒྱུར་སྔར་བས་སྐུལ་འདེད་གཏོང་རྒྱུའི་ཐད་དགོངས་འཆར་བརྗེ་རེས་གནང་ཞིང་། དེ་ནི1949ལོ་ཚུན་ངོགས་གཉིས་ཀྱི་འགོ་ཁྲིད་མི་སྣ་མཇལ་འཛོམས་གནང་ཐེངས་དང་པོ་དེ་ཡིན་པ་རེད།

ཞིས་ཅིན་ཕིང་གིས་དེ་རིང་ནི་དམིགས་བསལ་གྱི་ཉིན་མོ་ཞིག་ཡིན། ངོགས་གཉིས་ཀྱི་འགོ་ཁྲིད་པ་མཇལ་འཛོམས་བྱུང་བ་དེས་ངོགས་གཉིས་ཀྱི་འབྲེལ་བའི་ལོ་རྒྱུས་རང་བཞིན་གྱི་ལེའུ་ཕྱེ་ཡོད། ལོ་རྒྱུས་ཀྱིས་དེ་རིང་གི་དུས་འདི་ངེས་སྲིད། དུས་ཡུན་རིང་པོའི་ནང་ཐའེ་དབན་དུ་སྤྲིན་ནག་འཁྲིགས་པ་དང་། ངོགས་གཉིས་དམག་དོན་ཐད་ཁ་གཏད་དུ་ལངས་པ། སྤུན་ཟླ་དབར་རྒྱ་མཚོས་ཆོད་ནས་རྒྱང་ལྟ་བྱེད་པ། སྤུན་མཆེད་དབར་འབྲེལ་བ་ཆད་པ་བཅས་ཁྱིམ་ཚང་མང་པོར་རྡོ་ལ་རི་མོ་བརྐོས་པ་ལྟར་གྱི་རྨ་ཁ་བཟོས་ཡོད་ལ་ཐ་ན་སུབ་ཐབས་བྲལ་བའི་བློ་ཕམ་ཡང་བྱུང་ཡོད། དེ་ལྟར་ན་ཡང་། མཚོ་འགག་གིས་སྤུན་ཟླའི་བརྩེ་སེམས་གཅོད་མི་ཐུབ་ལ། ཕ་ཡུལ་ལ་བཅངས་པའི་དྲན་སེམས་དང་ཁྱིམ་ཚང་མཉམ་འཛོམས་ཀྱི་སྤུན་ཟླའི་འདུན་པ་དེ་འགོག་མི་ཐུབ། སྤུན་ཟླའི་དབར་གྱི་བརྩེ་དུང་སྟོབས་ཤུགས་ཀྱིས་མཐར་དུས་རབས་གོང་མའི་ལོ་རབས་བརྒྱད་ཅུ་པར་ངོགས་གཉིས་ཀྱི་བཀག་སྡོམ་གྱི་རྒྱལ་སྒོ་དེ་ཕྱེ་ཡོད། 2008ལོ་ཚུན་ངོགས་གཉིས་ཀྱི་འབྲེལ་བ་ཞི་བའི་འཕེལ་རྒྱས་ཀྱི་འགྲོ་ལམ་ཐོག་བསྐྱོད་ཡོད། འདས་ཟིན་པའི་ལོ་བདུན་ནང་། ཐའེ་དབན་གྱི་དུས་བབ་བརྟན་ལྷིང་ཞི་མཐུན་ཡིན་ལ། ངོགས་གཉིས་ཀྱི་འབྲེལ་བའི་འཕེལ་རྒྱས་ལའང་གཡུར་ཟའི་གྲུབ་འབྲས་ཐོབ་ཡོད། ངོགས་གཉིས་དང་རྒྱ་ཆེའི་སྤུན་ཟླ་ཚོས་དེའི་ཐད་རྔུལ་ཆུ་འབོར་ཆེན་བཏོན་ཡོད། དེ་ལྟ་བུའི་ལོ་བདུན་གྱི་འབད་བརྩོན་འོག་ངོགས་གཉིས་ཀྱིས་གཞི་ནས་དེ་རིང་གི་ལོ་རྒྱུས་རང་བཞིན་གྱི་གོམ་པ་དེ་སྤོ་ཐུབ་པ་བྱུང་ཡོད་ཅེས་གསུངས་པ་རེད།

ཞིས་ཅིན་ཕིང་གིས་ངོགས་གཉིས་ཀྱི་འབྲེལ་བའི་ལོ66གི་འཕེལ་རྒྱས་ལོ་རྒྱུས་ཐོག་ནས་ངོགས་གཉིས་ཀྱི་སྤུན་ཟླར་དྲག་ཆར་རླུང་འཚུབ་གང་རུང་འཕྲད་པ་དང་ཡུན་རིང་འབྲེལ་བ་ཆད་ཀྱང་སྟོབས་ཤུགས་གང་རུང་གིས་ང་ཚོ་ཁ་ཕྲལ་གཏོང་མི་ཐུབ་པ་གསལ་བཤད་བྱས་ཡོད། མིག་སྔར་ངོགས་གཉིས་ཀྱི་འབྲེལ་བའི་འཕེལ་རྒྱས་ལ་ཁ་ཕྱོགས་དང་འགྲོ་ལམ་གྱི་གདམ་ག་འཕྲད་ཡོད། ངོགས་གཉིས་ཀྱི་འབྲེལ་བའི་འཕེལ་རྒྱས་ལོ་རྒྱུས་ཁྲོད་ནས་ངོགས་གཉིས་ཀྱིས་བློ་སྒོ་འབྱེད་ཐུབ་པ་བྱས་ཏེ་མི་རིགས་ལ་འཛིན་པའི་འགན་འཁྲི་དང་ལོ་རྒྱུས་ལ་འཛིན་པའི་འགན་འཁྲི་འཁུར་ནས་ལོ་རྒྱུས་ཞིབ་བཤེར་གྱི་ཉམས་སད་ཐེག་ཐུབ་པའི་ཡང་དག་གདམ་ག་བྱེད་དགོས་ཞེས་གསུངས་པ་རེད།

ཞིས་ཅིན་ཕིང་གིས་དེ་རིང་ང་ཚོ་མཉམ་དུ་སྡོད་པ་འདི་ནི་ལོ་རྒྱུས་ཀྱི་ཡ་ང་བའི་སྡུག་བསྔལ་བསྐྱར་དུ་མི་ཐོན་པ་བྱེད་པ་དང་། ངོགས་གཉིས་ཀྱི་འབྲེལ་བ་ཞི་བའི་འཕེལ་རྒྱས་ཀྱི་གྲུབ་འབྲས་མི་ཤོར་བ་བྱེད་པ། ངོགས་གཉིས་ཀྱི་སྤུན་ཟླར་མུ་མཐུད་དེ་ཞི་བདེ་ལྷིང་འཇགས་ཀྱི་འཚོ་བ་གཏོད་རྒྱུ། ང་ཚོའི་ཕ་ཚ་བུ་རྒྱུད་ཀྱིས་མཛེས་སྡུག་ལྡན་པའི་འབྱུང་འགྱུར་མཉམ་སྤྱོད་ཐུབ་རྒྱུ་བཅས་ཀྱི་ཆེད་དུ་ཡིན། དུས་བབ་གསར་པར་ཕྱོགས་པ་དང་ངོགས་གཉིས་ཀྱི་འབྲེལ་བ་འཕེལ་རྒྱས་གཏོང་བའི་འགོ་འཛུགས་ས་གསར་པའི་ཐོག་ལངས་ནས་ངོགས་གཉིས་ཀྱིས་བློ་ལ་མི་རིགས་ཧྲིལ་པོའི་ཁེ་ཕན་འཆང་བ་དང་དུས་རབས་མདུན་སྐྱོད་ཀྱི་གོམ་སྟབས་ཀྱི་རྗེས་བསྙེགས་ནས་མཉམ་དུ་ལག་གདང་སྦྲེལ་ཏེ་ངོགས་གཉིས་ཀྱི་འབྲེལ་བ་ཞི་བའི་ངང་འཕེལ་རྒྱས་གཏོང་བའི་གནས་བབ་ཆེན་པོ་སྲ་བརྟན་དུ་བཏང་སྟེ་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ཐུན་མོང་ཐོག་མངོན་འགྱུར་བྱེད་དགོས་ཞེས་གསུངས་ཤིང་། ཞིས་ཅིན་ཕིང་གིས་དེའི་ཐད་དགོངས་འཆར་བཞི་བཏོན་གནང་བ་སྟེ།

གཅིག ངོགས་གཉིས་ཀྱིས་ཐུན་མོང་གི་ཆབ་སྲིད་རྨང་གཞིར་གཡོ་འགུལ་མི་གཏོང་རྒྱུ་མཐའ་འཁྱོངས་བྱེད་དགོས། ལོ་བདུན་རིང་གི་ངོགས་གཉིས་ཀྱི་འབྲེལ་བའི་ཞི་བདེ་འཕེལ་རྒྱས་མངོན་འགྱུར་ཐུབ་མིན་གྱི་འགག་རྩ་དེ་ཕྱོགས་གཉིས་པོས་གོ་གཉིས་ལོའི་ཐུན་མོང་ངོས་འཛིན་མཐའ་འཁྱོངས་དང་ཐའེ་དབན་རང་བཙན་ལ་ངོ་རྒོལ་བྱེད་པའི་ཐུན་མོང་གི་ཆབ་སྲིད་རྨང་གཞི་འཛུགས་རྒྱུར་ཐུག་ཡོད། དེ་ལྟ་བུའི་རྨང་གཞི་མེད་ན། ཞི་བའི་འཕེལ་རྒྱས་ཀྱི་གྲུ་གཟིངས་ལ་རྦ་རླབས་ཀྱི་འཇིགས་པ་འཕྲད་སྲིད་ལ། ཐ་ན་རྦད་དེ་མགོ་རྟིང་ལོག་སྲིད།

གོ་གཉིས་ལོའི་ཐུན་མོང་ངོས་འཛིན་ལ་ངོགས་གཉིས་ཀྱི་འབྲེལ་ཡོད་ཕྱོགས་ཀྱི་དབང་བསྐུར་ཁས་ལེན་ཐོབ་པ་མ་ཟད། ངོགས་གཉིས་པོའི་དམངས་ཚོགས་ཀྱི་རྒྱབ་སྐྱོར་རྒྱ་ཁྱབ་ཀྱང་ཐོབ་ཡོད། གོ་གཉིས་ལོའི་ཐུན་མོང་ངོས་འཛིན་གལ་འགངས་ཆེ་དོན་ནི་དེའི་ཐོག་ནས་ཀྲུང་གོ་གཅིག་གི་རྩ་དོན་མངོན་པའི་ཐོག་ངོགས་གཉིས་ཀྱི་འབྲེལ་བའི་རྩ་བའི་ངོ་བོ་གསལ་པོ་བཟོས་ཡོད་པས་ཡིན། དེས་སྐམ་ས་ཆེ་མོ་དང་ཐའེ་དབན་ནི་ཀྲུང་གོ་གཅིག་གི་ཁོངས་སུ་གཏོགས་པ་དང་། ངོགས་གཉིས་ཀྱི་འབྲེལ་བ་དེ་རྒྱལ་ཁབ་དང་རྒྱལ་ཁབ་དབར་གྱི་འབྲེལ་བ་མིན་པ་དང་ཀྲུང་གོ་གཅིག་དང་ཐའེ་དབན་གཅིག་གི་འབྲེལ་བ་མིན་པ་གསལ་པོ་བསྟན་ཡོད། ངོགས་གཉིས་ད་བར་གཅིག་གྱུར་བྱུང་མེད་ཀྱང་ཀྲུང་གོའི་བདག་དབང་དང་མངའ་ཁོངས་ས་ཆ་ཆ་ཚང་ཁ་བྲལ་མེད། ངོགས་གཉིས་རྒྱལ་ཁབ་གཅིག་གི་ཁོངས་སུ་གཏོགས་པ་དང་ངོགས་གཉིས་ཀྱི་སྤུན་ཟླ་ནི་མི་རིགས་གཅིག་གི་ཁོངས་སུ་གཏོགས་པའི་ལོ་རྒྱུས་ཀྱི་དོན་དངོས་དང་ཁྲིམས་རིགས་རྨང་གཞི་དེར་འགྱུར་ལྡོག་བྱུང་མེད་ལ། འགྱུར་ལྡོག་འགྲོ་ཡང་མི་སྲིད།

གཉིས། ངོགས་གཉིས་ཀྱི་འབྲེལ་བ་ཞི་བའི་འཕེལ་རྒྱས་སྲ་བརྟན་གཏོང་རྒྱུ་མཐའ་འཁྱོངས་བྱེད་དགོས། ལོ་སུམ་ཅུ་ལྷག་ཙམ་རིང་ངོགས་གཉིས་ཀྱི་འབྲེལ་བའི་སྤྱི་ཡོངས་ཀྱི་རྣམ་པར་ལོ་རྒྱུས་རང་བཞིན་གྱི་འགྱུར་ལྡོག་ཕྱིན་ཡོད། 2008ལོའི་རྗེས་ངོགས་གཉིས་ཀྱི་འབྲེལ་བ་དེ་ཞི་བའི་འཕེལ་རྒྱས་ཀྱི་འགྲོ་ལམ་ཐོག་བསྐྱོད་ནས་949ལོ་ཚུན་གྱི་དུས་སྐབས་ཡག་ཤོས་སུ་སླེབས་ཡོད། ཞི་བདེ་དགོས་པ་ལས་གདོང་ཐུག་མི་དགོས་པ་དང་། སྤེལ་རེས་བྱེད་པ་ལས་ལོགས་སུ་མི་དགར་བ། མཐུན་སྦྱོར་མཉམ་ལས་བྱེད་པ་ལས་ཁ་གཏད་དུ་མི་ལངས་པ་བཅས་དེ་དག་ནི་ངོགས་གཉིས་ཀྱི་སྤུན་ཟླ་ཚོའི་ཐུན་མོང་གི་བསམ་འདུན་ཡིན། ངོགས་གཉིས་ཀྱི་འབྲེལ་བ་དེ་དེ་སྔ་ལྟར་གདོང་ཐུག་དྲག་པོ་དང་རྣོ་ངར་ཁ་གཏད་ཀྱི་དགྲར་འཛིན་རྣམ་པར་གནས་རྒྱུ་མེད།

ངོགས་གཉིས་ཀྱི་འབྲེལ་བའི་འཕེལ་རྒྱས་ལོ་རྒྱུས་ཀྱིས་ང་ཚོར་ཐའེ་དབན་ཟང་ཟིང་ཛ་དྲག་དང་ངོགས་གཉིས་གདོང་ཐུག་དགྲར་ལངས་ན་དམངས་ཚོགས་ལ་གནོད་འཚེ་ཕོག་རྒྱུ་ཉག་ཅིག་ཡིན་པ་དང་ཞི་བའི་འཕེལ་རྒྱས་ཀྱི་ལམ་བུར་སྐྱོད་ནས་གཉིས་ཁེ་གཉིས་ཕན་གྱི་ལམ་བུ་དོན་གཉེར་བྱ་རྒྱུ་དེ་ངོགས་གཉིས་ལ་ཕན་པ་དང་བྱས་རྗེས་མི་རིགས་ལ་འཇོག་པའི་བྱ་བ་ཞིག་ཡིན་པ་བསྟན་ཡོད། ངོགས་གཉིས་ཀྱི་སྤུན་ཟླ་ཚོས་ཞི་བདེ་འཕེལ་རྒྱས་ཀྱི་གྲུབ་འབྲས་ལ་གཅེས་འཛིན་ལྡབ་བརྒྱ་བྱེད་པ་དང་། ངོགས་གཉིས་ཀྱི་དགྲར་འཛིན་བསམ་པ་རྦད་དེ་སེལ་བ། ཞི་བའི་འཕེལ་རྒྱས་ཀྱི་འགྲོ་ལམ་ཐོག་སྐྱོད་རྒྱུ་མཐའ་འཁྱོངས་བཅས་བྱས་ཏེ་ངོགས་གཉིས་ཀྱི་འབྲེལ་བ་ཞི་བའི་འཕེལ་རྒྱས་ལམ་ལུགས་ཀྱི་སྒྲོམ་གཞི་བརྟན་པོ་ཞིག་ཧུར་ཐག་སྐྲུན་དགོས།

གསུམ། ངོགས་གཉིས་ཀྱི་སྤུན་ཟླར་བདེ་སྐྱིད་དོན་གཉེར་བྱ་རྒྱུ་མཐའ་འཁྱོངས་བྱེད་དགོས། ངོགས་གཉིས་ཁྱིམ་ཚང་གཅིག་ལྟར་བརྩེ་བས་ནང་བཀྲ་ཤིས་ན་ཕྱི་དོན་འགྲུབ་ཐུབ། ང་ཚོས་ངོགས་གཉིས་ཀྱི་འབྲེལ་བ་ཞི་བའི་ངང་འཕེལ་རྒྱས་གཏོང་རྒྱུར་སྐུལ་འདེད་གཏོང་རྒྱུའི་གཞི་འཛིན་ས་དང་དོན་ལ་བབ་ས་ནི་སྤུན་ཟླའི་དབར་གྱི་བརྩེ་དུང་དང་བདེ་སྐྱིད་ཟབ་ཏུ་བཏང་ནས་ངོགས་གཉིས་ཀྱི་སྤུན་ཟླ་དེ་བས་བདེ་སྐྱིད་ལྡན་པའི་འཚོ་བ་སྐྱེལ་རྒྱུ་ཡོང་བ་བྱ་རྒྱུ་དེ་ཡིན། ངོགས་གཉིས་ཀྱི་སྤུན་ཟླའི་བརྩེ་དུང་དང་བདེ་སྐྱིད་ཟབ་ཏུ་གཏོང་རྒྱུར་ཕན་པའི་བྱ་བ་དང་། ངོགས་གཉིས་ཀྱི་འབྲེལ་བ་ཞི་བའི་ངང་འཕེལ་རྒྱས་གཏོང་རྒྱུར་སྐུལ་འདེད་གཏོང་རྒྱུར་ཕན་པའི་བྱ་བ། ཀྲུང་ཧྭ་མི་རིགས་ཀྱི་སྤྱིའི་ཁེ་ཕན་སྲུང་སྐྱོང་བྱ་རྒྱུར་ཕན་པའི་བྱ་བ་བཅས་ཡིན་ཕྱིན་ངོགས་གཉིས་ཀྱིས་ནུས་ཤུགས་གང་ཡོད་བཏོན་ནས་བསྒྲུབས་པ་དང་འབྲེལ་བྱ་བ་ཡག་པོ་བསྒྲུབས་དགོས།

བཞི། བློ་སེམས་གཅིག་མཐུན་གྱིས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་ཡོང་བ་མཐའ་འཁྱོངས་བྱེད་དགོས། ཀྲུང་ཧྭ་མི་རིགས་ལ་ལོ་ངོ5000ལྷག་ཙམ་གྱི་འོད་སྟོང་འཕྲོ་བའི་ཤེས་དཔལ་ལྡན་མོད། འོན་ཀྱང་ཉེ་རབས་ཚུན་སྟོབས་ལྡན་རྒྱལ་ཁབ་ཀྱི་བརྙས་བཅོས་ཐེངས་མང་ཕོག་ཡོད། ལོ120གོང་ཐའེ་དབན་ཕྱིའི་མི་རིགས་ཀྱིས་བཙན་བཟུང་བྱས་པ་དེ་མི་རིགས་ཧྲིལ་པོའི་སེམས་ལ་གྲི་ཟུག་པ་ལྟར་གྱི་སྡུག་བསྔལ་དུ་གྱུར་ཡོད། 1945ལོར་རི་འགོག་དམག་འཁྲུག་ལ་རྒྱལ་ཁ་ཐོབ་ནས་ཐའེ་དབན་སླར་གསོ་བྱུང་སྟེ་དུས་རབས་ཕྱེད་ཀ་ལྷག་ཙམ་གྱི་མི་རིགས་ཀྱི་མཚན་ཤས་མེད་པ་བཟོ་ཐུབ་པ་བྱུང་ཡོད། ལོ་རྒྱུས་ཀྱི་འཕོ་འགྱུར་ནས་བལྟས་ན། ངོགས་གཉིས་ནི་ཁ་འབྲལ་ཐབས་མེད་པའི་ལས་དབང་གཅིག་མཐུན་འདུས་གྲུབ་ཅིག་ཡིན་པ་ཟབ་མོ་ཚོར་ཐུབ། མི་རིགས་སྟོབས་འབྱོར་ལྡན་པ་ནི་ངོགས་གཉིས་ཀྱི་སྤུན་ཟླའི་བདེ་སྐྱིད་དང་། མི་རིགས་ཉམས་རྒུད་དང་ཟང་ཟིང་ནི་ངོགས་གཉིས་ཀྱི་སྤུན་ཟླའི་ཆག་སྒོ་ཡིན། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་བྱ་རྒྱུ་དེ་ངོགས་གཉིས་ཀྱི་སྤུན་ཟླའི་མདུན་ལམ་ལས་དབང་དང་འབྲེལ་བ་ཡོད།

མ་དབྱིང་ཅིའུ་ཡིས2008ལོ་ཚུན་ངོགས་གཉིས་ཀྱིས་ཞི་བདེ་བརྟན་ལྷིང་གི་ཐའེ་དབན་མཚོ་འགག་གི་དུས་བབ་ཐུན་མོང་ཐོག་བཏོད་པར་བརྟེན་ངོགས་གཉིས་དང་དེ་བཞིན་རྒྱལ་སྤྱིའི་སྤྱི་ཚོགས་ཀྱི་ཡོངས་ཁྱབ་ཀྱི་བསྔགས་བརྗོད་ཐོབ་པ་དེར་གཅེས་འཛིན་བྱེད་དགོས། གོ་གཉིས་ལོའི་ཐུན་མོང་ངོས་འཛིན་ནི་ངོགས་གཉིས་ཀྱི་འབྲེལ་བའི་ཞི་བདེ་འཕེལ་རྒྱས་མངོན་འགྱུར་བྱ་རྒྱུའི་ཐུན་མོང་གི་ཆབ་སྲིད་རྨང་གཞི་ཞིག་ཡིན་པས་ངོགས་གཉིས་ཀྱིས་གོ་གཉིས་ལོའི་ཐུན་མོང་ངོས་འཛིན་བརྟན་དུ་གཏོང་བ་དང་། སྤེལ་རེས་མཉམ་ལས་རྒྱ་ཆེ་དང་ཟབ་ཏུ་གཏོང་བ། གཉིས་ཁེ་གཉིས་ཕན་ཟབ་ཏུ་གཏོང་བ། ངོགས་གཉིས་ཀྱི་སེམས་ཁམས་འབྲེལ་བ་ཉེ་རུ་གཏོང་བ་བཅས་བྱས་ཏེ་ཕྱི་ཕྱོགས་ལ་ངོགས་གཉིས་ཀྱི་འབྲེལ་བ་དེ་མཚོ་འགག་ངོགས་གཉིས་ཀྱིས་ཞི་བའི་ངང་ཐག་གཅོད་ཐུབ་རྒྱུ་ཡིན་པ་སྟོན་དགོས་པ་དང་འབྲེལ་བློ་སེམས་གཅིག་མཐུན་གྱིས་ངོགས་གཉིས་ཀྱི་མི་རབས་རྗེས་མར་དེ་བས་མཛེས་སྡུག་ལྡན་པའི་འབྱུང་འགྱུར་གཏོད་དགོས་ཞེས་གསུངས་པ་རེད།

ཕྱོགས་གཉིས་པོས2008ལོ་ཚུན་ངོགས་གཉིས་ཀྱི་འབྲེལ་བ་ཞི་བའི་འཕེལ་རྒྱས་ཐད་ཐོབ་པའི་གྲུབ་འབྲས་གལ་ཆེན་ལ་གདེང་འཇོག་གང་ལེགས་གནང་ཡོད། ཕྱོགས་གཉིས་པོས་གོ་གཉིས་ལོའི་ཐུན་མོང་ངོས་འཛིན་མུ་མཐུད་མཐའ་འཁྱོངས་བྱེད་པ་དང་། ཐུན་མོང་གི་ཆབ་སྲིད་རྨང་གཞི་བརྟན་དུ་གཏོང་བ། ངོགས་གཉིས་ཀྱི་འབྲེལ་བ་ཞི་བའི་ངང་འཕེལ་རྒྱས་གཏོང་རྒྱུར་སྐུལ་འདེད་གཏོང་བ། ཐའེ་དབན་མཚོ་འགག་གི་ཞི་བདེ་བརྟན་ལྷིང་སྲུང་སྐྱོང་། འབྲེལ་མཐུད་གླེང་མོར་ཤུགས་སྣོན་རྒྱག་པ། ངོགས་གཉིས་ཀྱི་སྤེལ་རེས་རྒྱ་ཆེར་གཏོང་བ། ཕན་ཚུན་དབར་གྱི་མཉམ་ལས་ཟབ་ཏུ་གཏོང་བ། གཉིས་ཁེ་གཉིས་ཕན་མངོན་འགྱུར། ངོགས་གཉིས་ཀྱི་དམངས་ཚོགས་ལ་བདེ་སྐྱིད་སྐྲུན་པ། ངོགས་གཉིས་ཀྱི་སྤུན་ཟླ་ཀྲུང་ཧྭ་མི་རིགས་ཀྱི་ཁོངས་སུ་གཏོགས་པ། ཚང་མ་མེས་པོ་ཡན་ཧོང་གི་མི་རྒྱུད་ཡིན་པས་ལག་གདང་སྦྲེལ་ནས་མཉམ་ལས་བཅས་བྱས་ཏེ་ཀྲུང་ཧྭ་དར་རྒྱས་དང་མི་རིགས་བསྐྱར་དར་ཡོང་རྒྱུར་གཞོལ་དགོས་པའི་ངོས་འཛིན་གནང་བ་རེད།