རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་ཚེས་ཉེར་དྲུག་ཉིན་ཉིག་ཡོ་ན་ཡོད་པའི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་ནས་ཀྲུང་གོ་དང་མཉམ་འབྲེལ་རྒྱལ་ཚོགས་ཀྱིས་མཉམ་དུ་བསྡུས་པའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་གྲོས་ལ་ཞུགས་པར་མ་ཟད་མགོ་འཛིན་མཛད།

རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་ཚེས་ཉེར་དྲུག་ཉིན་ཉིག་ཡོ་ན་ཡོད་པའི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་ནས་ཀྲུང་གོ་དང་མཉམ་འབྲེལ་རྒྱལ་ཚོགས་ཀྱིས་མཉམ་དུ་བསྡུས་པའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་གྲོས་ལ་ཞུགས་པར་མ་ཟད་མགོ་འཛིན་མཛད། ཁོང་གིས་རྒྱ་ཆེའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་མགོ་ཁྲིད་པ་དང་རྒྱལ་སྤྱིའི་རྩ་འཛུགས་ཀྱི་འགན་འཁུར་བ་དང་མཉམ་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་ཉམས་མྱོང་སྤྱི་སྡོམ་བྱས་པ་དང་མཉམ་ལས་འཕེལ་རྒྱས་ཀྱི་ཇུས་གཞི་ཆེན་པོར་མཉམ་དུ་གྲོས་མོལ་མཛད། ཨ་ཧྥེ་རི་ཁ་ལྷོ་མའི་ཙུང་ཐུང་ཙོ་མ་དང་ཨེ་ཅིབ་ཀྱི་ཙུང་ཐུང་སེ་ཞི་སོགས་རྒྱལ་ཁབ་ཀྱི་མགོ་གཙོ་དང་སྲིད་གཞུང་གི་མགོ་གཙོ། དེ་མིན་མཉམ་འབྲེལ་རྒྱལ་ཚོགས་གསར་སྤེལ་འཆར་གཞི་ཧྲུའུ་དང་འཛམ་གླིང་དངུལ་ཁང་སོགས་རྒྱལ་སྤྱིའི་རྩ་འཛུགས་ཀྱི་འགན་འཁུར་བ་གྲོས་ཚོགས་ལ་ཞུགས།

ཞི་ཅིན་ཕེན་གྱིས་གསུངས་རྒྱུར། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་ནི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱིས་མཉམ་འབྲེལ་སྒོས་རང་ཉིད་སྟོབས་ལྡན་དུ་གཏོང་བའི་བྱེད་ཐབས་གལ་ཆེན་ཞིག་ཡིན་པ་དང་། འདྲ་མཉམ་ཡིད་ཆེས་དང་གཉིས་ཕན་མཉམ་རྒྱལ། མཐུན་སྒྲིལ་རོགས་ལས་བཅས་ཀྱི་མཉམ་ལས་ཤིག་ཡིན་པར་མ་ཟད་ང་ཚོས་འཕེལ་རྒྱས་དང་དར་རྒྱས་སུ་འགྲོ་བའི་བགྲོད་ལམ་ཞིག་གསར་གཏོད་བྱེད་པར་རོགས་རམ་བྱེད་པ་ཡིན། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་ཁྱོན་ཡོངས་སྟོབས་ཤུགས་ཇེ་ཆེར་སོང་བ་དང་བསྟུན་ནས་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་ཀྱིས་ངེས་པར་དུ་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་སྔར་ལས་འཕེལ་རྒྱས་སུ་འགྲོ་བ་དང་འཛམ་གླིང་གི་དཔལ་འབྱོར་ཡུན་རིང་དང་དོ་མཉམ་སྒོས་འཕར་བར་སྐུལ་འདེད་གཏོང་བའི་ཐད་ལ་ནུས་པ་སྔར་ལས་ཆེན་པོ་འདོན་དགོས་ཟེར།

ཞི་ཅིན་ཕེན་གྱིས་དུས་སྐབས་གསར་བའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་ཐད་ལ་གྲོས་གཞི་འགའ་བཏོན། གཅིག སྣ་མང་ཅན་གྱི་འཕེལ་རྒྱས་བགྲོད་ལམ་འཚོལ་བར་བརྩོན་ལེན་བྱེད་དགོས། གཉིས། རྒྱལ་ཁབ་སོ་སོའི་འཕེལ་རྒྱས་ཐབས་ཇུས་འབྲེལ་མཐུད་ལ་སྐུལ་འདེད་གཏོང་བར་བརྩོན་ལེན་བྱེད་དགོས། གསུམ། དངོས་གཉེར་འཕེལ་རྒྱས་གྲུབ་འབྲས་མངོན་འགྱུར་བྱེད་པར་བརྩོན་ལེན་བྱེད་དགོས། བཞི། འཛམ་གླིང་ཡོངས་ཀྱི་འཕེལ་རྒྱས་སྤྱི་ཁོག་འཐུས་ཚང་དུ་གཏོང་བར་བརྩོན་ལེན་བྱེད་དགོས་པ་བཅས་རེད།

ཞི་ཅིན་ཕེན་གྱིས་མཇུག་མཐར་བསྟན་དོན། ཉིས་སྟོང་བཅོ་ལྔ་ལོའི་རྗེས་ཀྱི་འཕེལ་རྒྱས་གྲོས་རིམ་གྱིས་རྒྱལ་ཁབ་སོ་སོར་སྔར་ལས་མཐོ་བའི་འཕེལ་རྒྱས་ཀྱི་དམིགས་འབེན་གཏན་ཁེལ་བྱས་པར་མ་ཟད་སྔར་ལས་མཐོ་བའི་འཕེལ་རྒྱས་ཀྱི་རེ་བ་བཏོན། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་ཀྱིས་ཉིས་སྟོང་བཅོ་ལྔ་ལོའི་རྗེས་ཀྱི་འཕེལ་རྒྱས་གྲོས་རིམ་དངོས་འབེབས་བྱེད་པ་གོ་སྐབས་བཟུང་སྟེ་སྔར་ལས་མཐོ་བའི་རིམ་པ་དང་སྔར་ལས་ཆེ་བའི་ཁྱབ་ཁོངས་སུ་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་སྔར་ལས་འཕེལ་རྒྱས་སུ་འགྲོ་བར་སྐུལ་འདེད་གཏོང་དགོས་ཟེར།