ཨུ་རུ་སི་ཡིས་བྱ་འགུལ་སྤེལ་ཏེ་རྒྱལ་སྲུང་འཐབ་འཁྲུག་བྱུང་ནས་ལོ་ངོ་དོན་བཞི་འགོར་བར་རྗེས་དྲན་བྱས།
མཚོ་སྔོན་བོད་སྐད་རྒྱང་སྒྲོག 2015-06-24
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཚེས་ཉེར་གཉིས་ཉིན་ནི་ཨུ་རུ་སིའི་རྒྱལ་སྲུང་འཐབ་འཁྲུག་བྱུང་ནས་ལོ་ངོ་དོན་བཞི་འགོར་བའི་ཉིན་ཡིན་པ་དང་།ཨུ་རུ་སིའི་ས་ཁུལ་སོ་སོ་ནས་རྗེས་དྲན་བྱ་འགུལ་རབ་དང་རིམ་པ་སྤེལ།
ཨུ་རུ་སིའི་ཙུང་ཐུང་ཕུའུ་ཅིན་གྱིས་ཉིན་དེར་ཁི་ལི་མུའུ་ལིན་ཕོ་བྲང་ཉེ་འདབས་ཀྱི་ཡཱ་ལི་ཧྲན་ཏཱ་མེ་ཏོག་ལྡུམ་རའི་ནང་གི་མིང་མེད་པའི་སྔོན་གཤེགས་དཔའ་བོའི་བང་སོར་མེ་ཏོག་གི་ཕྲེང་བ་ཕུལ།ཨུ་རུ་སིའི་ཙུང་ལི་མེ་ཏི་བེ་ཅེ་ཧྥུའུ་དང་གྲོས་ཁང་གོང་ཞོལ་གྱི་མགོ་ཁྲིད་པ་མཱ་ཐི་ཝེ་ཡན་ཁི་དང་།ནཱ་ལོས་ཧྲི་ཅིན།ཙུང་ཐུང་གཞུང་སྒྲུབ་ཁང་ཐིན་གྱི་ཀྲུའུ་རིན་དབྱེ་ཝན་ནོའུ་ཧྥུའུ།རྒྱལ་སྲུང་བློན་ཆེན་ཧྲོ་དབྱེ་ཀུའུ་སོགས་བྱ་འགུལ་དེར་ཞུགས།ཉིན་དེར་ཕུའུ་ཅིན་གྱིས་ཁི་ལི་མུའུ་ལིན་ཕོ་བྲང་ནས་པུས་ཏི་ལོ་ཀྲ་བོ་ཚི་ཁི་དང་ཀི་ལོ་ཚི་ཁི་སོགས་གྲོང་ཁྱེར་ལྔ་ལ་དམག་མིའི་གཟི་བརྗིད་གྲོང་ཁྱེར་གྱི་མཚན་སྙན་དཔང་ཡིག་བྱིན།ད་ལྟའི་བར་མཚན་སྙན་དེ་ལྡན་པའི་ཨུ་རུ་སིའི་གྲོང་ཁྱེར་ཞེ་ལྔར་འཕར་ཡོད།ཕུའུ་ཅིན་གྱིས་མཛད་སྒོའི་སྟེང་བཤད་རྒྱུར།སུའུ་ལེན་དམག་དམངས་ཀྱིས་མཐུན་སྒྲིལ་དང་མེས་རྒྱལ་ལ་བློ་དཀར་བའི་སྙིང་སྟོབས་ལ་བརྟེན་ནས་འཇར་མན་གྱི་ཧྥ་ཤི་སི་ཕམ་པར་བྱས་ཏེ།རྒྱལ་སྲུང་འཐབ་ཁྲུག་གི་རླབས་ཆེན་རྒྱལ་ཁ་བླངས་པ་རེད།སྔོན་རབས་པས་འཐབ་འཁྲུག་ཁྲོད་ནས་བཞག་པའི་བྱས་རྗེས་ཡིད་ལ་དམ་པོར་བཟུང་ཞིང་།རྒྱལ་གཅེས་རིང་ལུགས་ཀྱི་སྲོལ་རྒྱུན་དར་སྤེལ་བྱེད་རྒྱུ་ཡིན་དེང་སྐབས་ཀྱི་ཨུ་རུ་སིའི་མིའི་བླ་མེད་འགན་འཁྲི་ཡིན།ཁོས་བསྟན་དོན།དམག་མིའི་གཟི་བརྗིད་གྲོང་ཁྱེར་གྱི་མཚན་སྙན་གནང་བ་ནི་ཨུ་རུ་སིའི་རྒྱུན་སྲོལ་ཞིག་ཏུ་གྱུར་ཡོད་པ་དང་།དེ་ལས་དེང་སྐབས་ཀྱི་ཨུ་རུ་སིའི་མིས་མེས་རྒྱལ་སྲུང་སྐྱོབ་མཁན་ལ་བཅངས་པའི་བརྩེ་སེམས་མཚོན་པར་བྱས་ཡོད་ཟེར།གཅིག་སྟོང་དགུ་བརྒྱ་ཞེ་གཅིག་ལོའི་ཟླ་དྲུག་པའི་ཚེས་ཉེར་གཉིས་ཉིན།འཇར་མན་གྱི་ཧྥ་ཤི་སི་ཡིས་སུའུ་ལེན་དང་འཇར་མན་གྱི་ཕན་ཚུན་ལ་བཙན་འཛུལ་མི་བྱེད་པའི་ཆིངས་ཡིག་སྣང་མེད་དུ་བསྐྱུར་ནས་སུའུ་ལེན་ལ་བཙན་འཛུལ་བྱས་ཏེ་རྒྱལ་སྲུང་འཐབ་འཁྲུག་བསླངས་པ་རེད།འཐབ་འཁྲུག་དེ་ལོ་བཞི་ཙམ་ལ་རྒྱུན་བསྲིངས་པ་དང་།སུའུ་ལེན་གྱི་དམག་དམངས་བྱེ་བ་གཉིས་དང་ས་ཡ་བདུན་ལྷག་རྒྱལ་ཁབ་ཀྱི་ཆེད་དུ་སྐུ་གཤེགས།ཟླ་དྲུག་པའི་ཚེས་ཉེར་གཉིས་ཉིན་དེ་ཨུ་རུ་སིའི་སྲིད་གཞུང་གིས་རྗེས་དྲན་དང་མྱ་ངན་ཞུ་བའི་ཉིན་མོར་གཏན་འཁེལ་བྱས་ཡོད། །