ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། གསེར་ལྡན་རྒྱལ་ཁབ་ཀྱི་གྲོས་ཚོགས་གླེང་སྟེགས་ཚེས་བརྒྱད་ཉིན་མའོ་སི་ཁོ་ནས་བསྡུས། ཀྲུང་གོ་རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲང་ཏི་ཅང་གྲོས་ཚོགས་སུ་ཞུགས་པར་མ་ཟད་གསུང་བཤད་གནང་། ཨུ་རུ་སི་རྒྱལ་ཕྲན་མཉམ་འབྲེལ་ཨུ་ཡོན་ལྷན་ཁང་གི་ཀྲུའུ་ཞི་མཱ་ཐི་བེ་ཡན་ཁི་དང་རྒྱལ་ཁབ་ཏུའུ་མའི་ཀྲུའུ་ཞི་ན་ལོས་ཧྲི་ཅིན། པ་ཞིའི་གྲོས་ཞུགས་ཁང་གི་གྲོས་དཔོན་ཁ་ལེ་ལོ་སི་དང་དམངས་གྲོས་ཁང་གི་གྲོས་དཔོན་ཁུའུ་ཉི་ཡ། རྒྱ་གར་མི་དམངས་ཁང་རྒྱལ་སྤྱིའི་ལས་དོན་ཨུ་ཡོན་ལྷན་ཁང་གི་ཀྲུའུ་ཞི་ཐ་ལུའུ་ཨར་སོགས་གྲོས་ཚོགས་སུ་ཞུགས། ཨུ་རུ་སིའི་ཙུང་ཐུང་ཕུའུ་ཅིན་གྱིས་གླེང་སྟེགས་སྟེང་འཕྲིན་ཡིག་བཏང་སྟེ་རྟེན་འབྲེལ་ཞུས། གྲོས་ཚོགས་སུ་ཞུགས་པའི་ཕྱོགས་སོ་སོས་འཛམ་གླིང་ཡོངས་ཀྱི་ཆབ་སྲིད་དཔལ་འབྱོར་གྱི་གནད་དོན་ལ་ཇི་ལྟར་ཁ་གཏད་འཇལ་བ་དང་། གྲོས་ཁང་བར་གྱི་མཉམ་ལས་ལ་ཤུགས་སྣོན་པ་སོགས་ཐད་ནས་ལྟ་ཚུལ་དང་འདོད་བློ་སྤེལ།

ཀྲང་ཏི་ཅང་གིས་གསུང་བཤད་གནང་སྐབས། ད་ལྟའི་གནས་བབ་འོག གསེར་ལྡན་རྒྱལ་ཁབ་ཀྱིས་བརྗེ་རེས་དང་མཉམ་ལས་ལ་ཤུགས་བསྣན་ཏེ། འཛམ་གླིང་ཡོངས་ཀྱི་ཆབ་སྲིད་དཔལ་འབྱོར་གྱི་གནད་དོན་ལ་ཁ་གཏད་འཇལ་བ་དང་། མིའི་རིགས་ཞི་བའི་སྒོ་ནས་འཕེལ་རྒྱས་སུ་གཏོང་བའི་ཐད་ནས་འཛུགས་སྐྲུན་རང་བཞིན་གྱི་ནུས་པ་འདོན་སྤེལ་བྱེད་དགོས་ཞེས་ནན་གྱིས་བསྟན་པར་མ་ཟད། དེའི་ཐད་ནས་གྲོས་གཞི་འདི་ལྟར་བཏོན་པ་སྟེ། གཅིག་ནི་མཉམ་དུ་འཛམ་གླིང་གི་ཞི་བདེ་དང་བརྟན་འཇགས། རྒྱལ་སྤྱིའི་འདྲ་མཉམ་དྲང་བདེན་ཡོང་བ་བཅས་ལ་སྲུང་སྐྱོབ་བྱས་ནས། རྒྱལ་སྤྱིའི་སྒྲིག་ལམ་སྔར་ལས་དྲང་གཞག་དང་ལུགས་མཐུན་གྱི་ཕྱོགས་སུ་འགྲོ་བར་སྐུལ་འདེད་གཏོང་དགོས་པ་དང་། གཉིས་ནི་ལག་གདང་སྦྲེལ་ནས་མཉམ་དུ་འཕེལ་རྒྱས་སུ་བཏང་སྟེ། རྒྱལ་ཁབ་དར་རྒྱས་གོང་འཕེལ་དུ་འགྲོ་བ་དང་མི་རིགས་དར་རྒྱས་ཡོང་བ་མངོན་འགྱུར་བྱེད་དགོས། གསུམ་ནི་ཁྱབ་ཁོངས་སོ་སོའི་དངོས་གཉེར་མཉམ་ལས་གཏིང་ཟབ་ཏུ་སྤེལ་དགོས། བཞི་ནི་འཛམ་གླིང་རང་བཞིན་གྱི་དཔལ་འབྱོར་བཅོས་སྐྱོང་བྱ་བ་འཐུས་ཚང་དུ་གཏོང་དགོས་པ་བཅས་ཡིན་ཟེར།  །