ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨར་ཅི་རི་ཡཱའི་རྒྱལ་སྲུང་པུའུ་ཡིས་ཚེས་བཅུ་གསུམ་ཉིན་བསྟན་དོན། ཨར་ཅི་རི་ཡཱའི་དམག་དཔུང་གིས་ཉིན་དེར་ལྷོ་ཕྱོགས་ཀྱི་མཐའ་མཚམས་ས་ཁུལ་ནས་མཚོན་ཆ་མང་བོ་གཞུང་བཞེས་བྱས་ཡོད་ཟེར།

ཨར་ཅི་རི་ཡཱའི་རྒྱལ་སྲུང་པུའུ་ཡིས་གསལ་སྒྲོག་སྤེལ་ཏེ། ཨར་ཅི་རི་ཡཱའི་དམག་ཕྱོགས་ཀྱི་སྐོར་གཡེང་རུ་ཁག་ཅིག་གིས་ཚེས་བཅུ་གསུམ་ཉིན་ལྷོ་ཕྱོགས་ཀྱི་མཱ་ལི་དང་འབྲེལ་བའི་མཐའ་མཚམས་ས་ཁུལ་ནས་དྲག་ཆས་པའི་སྦས་སྐོང་བྱེད་ས་ཞིག་རྙེད་པ་དང་། དེ་ནས་མཚོན་ཆ་མང་བོ་གཞུང་བཞེས་བྱས། མིག་སྔར་དམག་ཕྱོགས་ཀྱིས་མཚོན་ཆ་དེ་དག་གི་ཡོང་ཁུངས་ལ་རྩད་གཅོད་བྱེད་བཞིན་ཡོད་ཀྱང་། དོགས་ཡོད་ཉེས་ཅན་གཅིག་ཀྱང་འཛིན་བཟུང་ཐུབ་མེད་ཟེར།

ཨར་ཅི་རི་ཡཱའི་ལྷོ་ཕྱོགས་ནས་མཱ་ལིའི་བྱང་ཕྱོགས་དང་འདབས་འབྲེལ་དུ་ཡོད་པ་དང་། རྒྱལ་ཁབ་གཉིས་ཀྱི་རྒྱལ་མཚམས་ས་ཁུལ་ནི་སཱ་ཧཱ་ལཱ་བྱེ་མའི་ས་ཁུལ་ཡིན་པས། ས་རྒྱ་ཆེ་ཞིང་འཚོ་སྡོད་བྱེད་པའི་མི་ཧ་ཅང་ཉུང་། མཚོན་ཆ་ལྐོག་འཚོང་བྱེད་མཁན་དང་འཇིགས་སྐུལ་ཉེས་ཅན་རྒྱལ་མཚམས་བརྒལ་བའི་རྒྱུ་ལམ་གཙོ་བོ་ཞིག་ཏུ་གྱུར་ཡོད།

ཉེ་བའི་ལོ་འགའི་རིང་ལ། མཱ་ལི་རྒྱལ་ནང་གི་གནས་བབ་ཟང་ཟིང་ཡིན་པ་དང་། མཱ་ལིའི་བྱང་ཕྱོགས་ས་ཁུལ་དེ་འཇིགས་སྐུལ་རྩ་འཛུགས་དང་ཐལ་སྤྱོད་རྩ་འཛུགས་མི་ཉུང་བ་ཞིག་འགུལ་སྐྱོད་བྱེད་སར་གྱུར་ཡོད། ཟང་ཟིང་གི་གནས་བབ་དེ་ཨར་ཅི་རི་ཡཱའི་མངའ་ཁོངས་སུ་མཆེད་པར་སྔོན་འགོག་བྱེད་ཆེད། ཨར་ཅི་རི་ཡཱའི་སྲིད་གཞུང་གིས་མཱ་ལིའི་རྒྱལ་ནང་གི་ཕྱོགས་ཁག་སོ་སོས་ཞི་བའི་གྲོས་མོལ་བྱེད་པར་མཐུན་སྦྱོར་བྱས་པ་དང་། ཞོར་དུ་རྒྱལ་མཚམས་ས་ཁུལ་དུ་དམག་དཔུང་བཀོད་སྒྲིག་བྱས་ཏེ་ཁྲིམས་འགལ་ཉེས་ཅན་རང་གི་མངའ་ཁོངས་སུ་ཡོང་བར་བཀག་འགོག་བྱེད་བཞིན་ཡོད།།