ཟླ་བ3པའི་ཚེས25ཉིན་ནས་ཚེས27ཉིན་གྱི་བར། ཁུལ་དམངས་ཆེན་རྒྱུན་ལས་ཨུ་ལྷན་གྱི་ཀྲུའུ་རེན་ལི་ཁང་ཉག་ཆུ་རྫོང་གི་ཚང་སྐྱིད་དགོན་པ་དང་ཇོ་མོ་དགོན་པར་ཕེབས་ནས་སེམས་ཕྱོགས་ཕྱོགས་མཐུན་གྱི་བྱེད་སྒོ་སྤེལ་བ་རེད། ལི་ཁང་གིས་དགོན་པའི་གནས་ཚུལ་དང་གྲྭ་བཙུན་གྱི་འཚོ་བ། ཆོས་ཚོགས་སྤེལ་བའི་གནས་ཚུལ། རྨང་གཞིའི་སྒྲིག་ཆས། དཀའ་གནད་སོགས་ཀྱི་གནས་ཚུལ་ལ་རྟོག་ཞིབ་ཞིབ་ཕྲ་གནང་ཞིང་གྲྭ་བཙུན་རྣམས་དང་སྙིང་གཏམ་གླེང་རེས་དང་བསམ་བློ་བརྗེ་རེས་བྱས་པའི་ཐོག་ཏང་གི་མི་རིགས་ཆོས་ལུགས་སྲིད་ཇུས་དང་དགོན་པ་དང་གྲྭ་བཙུན་ལ་ཕན་པའི་སྲིད་ཇུས་དྲིལ་བསྒྲགས་གནང་ཞིང་དེང་སང་རང་ཁུལ་བོད་བརྒྱུད་ནང་བསྟན་ཆོས་ལུགས་ཐད་ཡོད་པའི་གནད་དོན་གསལ་སྟོན་གནང་བ་དང་། ཀྲུང་གོའི་ཕུགས་འདུན་དང་དཀར་མཛེས་ཁུལ་གྱི་ཕུགས་འདུན་གྱི་སྐོར་ལ་རྒྱས་འགྲེལ་གནང་བ་རེད།
    ལི་ཁང་གིས་དགོན་པ་དང་གྲྭ་བཙུན་གྱིས་རང་རྟོགས་ཀྱིས་ས་གནས་དེ་གའི་ཏང་ཨུ་དང་སྲིད་གཞུང་གིས་ཁྲིམས་ལྟར་དོ་དམ་བྱེད་པར་དང་ལེན་ཞུ་དགོས་པ་དང་། མེས་རྒྱལ་གཅིག་གྱུར་དང་མི་རིགས་མཐུན་སྒྲིལ། ཁྲིམས་ལུགས་ཀྱི་དབང་གྲགས་བཅས་ལ་སྲུང་སྐྱོང་བྱས་ཤིང་། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་བར་ཕན་ཚུན་འཕྲོད་པར་སྐུལ་འདེད་གཏོང་བ་དང་། དེང་རབས་དཔལ་ཡོན་གྱི་འཕེལ་རིམ་དང་ཕན་ཚུན་མཐུན་སྦྱོར་ཡོང་བ། ཁུལ་ཡོངས་འཕེལ་རྒྱས་གཏོང་བའི་ཁྲོད་དུ་ཧུར་ཐག་གིས་ཞུགས་ནས་ཐུན་མོང་ཐོག་རང་རེའི་འཆམ་མཐུན་བདེ་སྐྱིད་ལྡན་པའི་ཁྱིམ་གཞིས་སྐྲུན་དགོས། སེམས་མཐུན་གྱི་འགྲོ་ལམ་ཐོག་བསྐྱོད་ནས་འཆམ་མཐུན་དགོན་པ་སྐྲུན་གང་ཐུབ་བྱེད་དགོས་ཞེས་གསུངས་པ་རེད།
    ལི་ཁང་གིས་དགོན་པའི་གྲྭ་བཙུན་རྣམས་ལ་གཅིག་ནི་ཐོག་མཐའ་བར་གསུམ་དུ་མེས་རྒྱལ་ལ་དགའ་ཞེན་བྱེད་དགོས་པ་དང་། གཉིས་ནི་ཐོག་མཐའ་བར་གསུམ་དུ་སྒྲིག་ཁྲིམས་ཡག་པོ་སྲུང་དགོས་པ། གསུམ་ནི་ཐོག་མཐའ་བར་གསུམ་དུ་ཐོས་བསམ་སྒོམ་གསུམ་ལ་འབད་བརྩོན་བྱ་དགོས་པའི་ཐུགས་རེ་གནང་བ་རེད།