ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཁྱུ་ཚོགས་མི་འདྲ་བར་དམིགས་པ་དང་།ཐབས་ལམ་མི་འདྲ་བ་སྤྱད་དེ་ལས་ཞུགས་ལམ་བུ་ཤར་གཏོང་ཐུབ་པ་བྱས་པ་དང་།རྒྱལ་ཁབ་ཀྱིས་ད་ལོ་ལས་ཞུགས་ལ་སྐུལ་འདེད་གཏོང་བའི་ཆེད་དོན་བྱ་སྤྱོད་རབ་དང་རིམ་པ་བཟུང་སྟེ།སྲིད་གཞུང་ལས་དོན་སྙན་ཞུའི་ནང་བཏོན་པའི་ལས་ཞུགས་ཀྱི་དམིགས་ཚད་ལེགས་གྲུབ་ཐུབ་པ་བྱ་རྒྱུ་ཡིན་པ་རེད།
    མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུས་གཉེར་བའི་ས་ཁོངས་བརྒལ་བའི་སློབ་རའི་སྐོར་བསྐྱོད་སྐོང་བསྡུའི་བྱེད་སྒོ་ཉེ་ཆར་ཅང་སུའུ་ནན་ཅིང་དུ་འགོ་ཚུགས་པ་དང་།སྐོང་བསྡུའི་ཚོགས་འདུའི་ཐོགརྒྱལ་ཡོངས་ས་གནས་ཁག་ནས་ཡོང་བའི་སྐོང་བསྡུའི་ཚན་པ་ཁག་གིས་མཁོ་འདོན་བྱས་པའི་ཐོབ་ཆ་ཅུང་ཡག་པོ་སྤྲོད་རྒྱུའི་སྟེང་ཆེད་མངགས་ལོ་དེ་རང་གི་སློབ་ཐོན་སློབ་མར་མཁོ་འདོན་བྱས་པའི་ལས་གནས་ཀྱིས་ལས་ཀ་འཚོལ་མཁན་སློབ་གྲྭ་ཆེན་མོ་བ་མང་པོའི་ཡིད་དབང་བཀུག་ཡོད་པ་རེད།
    ཤེས་རྟོགས་བྱུང་བར་གཞིགས་ན།ད་ལོའི་ཟླ་བ་༣པར།སྐོར་བསྐྱོད་སྐོང་བསྡུའི་བྱེད་སྒོ་དེ་རིགས་ད་དུང་པེ་ཅིང་དང་།ཧྲེན་ཡང་།ཧར་པིང་སོགས་གྲོང་ཁྱེར་ཆེ་འབྲིང་༤༦ལ་སྤེལ་རྒྱུ་ཡིན་པ་དང་།དེ་དང་ཆབས་ཅིགདྲ་ཐོག་གི་སྐོང་བསྡུའི་བྱེད་སྒོ་ཡང་མིག་སྔར་སྤེལ་བཞིན་ཡོད་པ་དང་།རིགས་ཁག་གི་ལས་གནས་ཆ་འཕྲིན་བཞི་འབུམ་ལྷག་མཁོ་འདོན་བྱས་ཡོད་པ་རེད།
    སྲིད་གཞུང་གིས་གཉེར་བའི་གྲས་སུ་རིགས་ཁག་གི་སྐོང་བསྡུའི་ཚོགས་འདུ་ཕུད།སྤྱི་ལོ་༢༠༡༣ལོར།རྒྱལ་ཁབ་ཀྱིས་རིགས་ཁག་གི་མི་ཚོགས་ལ་དམིགས་པའི་ལས་ཞུགས་སྐུལ་འདེད་འཆར་གཞི་དང་།ལས་ཞུགས་རོགས་སྐྱོར་ཟླ་བ་སོགས་ཀྱི་ཆེད་དོན་བྱེད་སྒོ་ཉིས་ཁྲི་ལྷག་སྤེལ་ཏེ།ཁོང་ཚོར་སྲིད་ཇུས་ཀྱི་ཟུར་སྐྱོར་དང་ལས་ཞུགས་ཞབས་ཞུ་བྱས་ཡོད་པ་རེད།
    ཤེས་རྟོགས་བྱུང་བར་གཞིགས་ན།སྤྱི་ལོ་༢༠༡༣ལོར་རྒྱལ་ཡོངས་སུ་ཁྱོན་བསྡོམས་ཞིང་པ་ས་ཡ་དགུ་ཡིས་སྲིད་གཞུང་གིས་མཁོ་འདོན་བྱས་པའི་རིན་པ་མི་དགོས་པའི་རྩལ་ནུས་སྦྱོང་བརྡར་ནང་ཞུགས་པ་དང་།དེ་ལོ་ཧྲིལ་པོའི་རིགས་ཁག་གི་ལས་ཞུགས་ཆེད་དོན་བྱེད་སྒོ་ཡོངས་ནང་ཁྱབ་པ་བྱས་པས།རྒྱལ་ཡོངས་ཀྱི་གྲོང་ཁྱེར་དང་གྲོང་བརྡལ་ལ་ལས་ཞུགས་གསར་སྣོན་ཐུབ་ཚད་མི་གྲངས་བྱེ་བ་གཅིག་དང་ས་ཡ་གསུམ་དང་ཆིག་འབུམ་ཟིན་པ་དང་།སྤྱི་ལོ་༢༠༡༢ལོ་དང་བསྡུར་ཚེ་མི་གྲངས་བཞི་འབུམ་བཞི་ཁྲི་མང་དུ་ཕྱིན་ཡོད་པ་རེད།
    ད་ལོ།རང་རྒྱལ་གྱི་གྲོང་ཁྱེར་དང་གྲོང་བརྡལ་ལ་ལས་ཞུགས་ཐུབ་པ་བྱེད་དགོས་པའི་མི་གྲངས་བྱེ་བ་གཉིས་དང་ས་ཡ་ལྔ་ཟིན་པ་དང་།དེའི་ནང་མཐོ་རིམ་སློབ་གྲྭའི་སློབ་ཐོན་སློབ་མ་ས་ཡ་བདུན་ཡོད་པས།ལས་ཞུགས་དུས་བབ་སྔར་བཞིན་ཛ་དྲག་པོ་ཡོད་པ་དང་།སྤྲོད་མཁོ་དོ་མཉམ་མེད་པའི་གྲུབ་ཆའི་རང་བཞིན་གྱི་འགལ་ཟླ་སྔར་བཞིན་གནས་ཡོད།གནས་ཚུལ་དེ་དག་ལ་དམིགས་ཏེ་ད་ལོ་སྲིད་གཞུང་ལས་དོན་སྙན་ཞུའི་ནང་ལས་ཞུགས་ཀྱི་དམིགས་ཚད་ཁ་གསལ་བཏོན་ཡོད་དེ།སྤྱི་ལོ་༢༠༡༤ལོར།གྲོང་ཁྱེར་དང་གྲོང་བརྡལ་གྱི་ལས་ཞུགས་གསར་སྣོན་ཐུབ་ཚད་མི་གྲངས་བྱེ་བ་གཅིག་ཡན་ཟིན་པ་བྱ་རྒྱུ་དང་།གྲོང་ཁྱེར་དང་གྲོང་བརྡལ་གྱི་ལས་ཤོར་ཐོ་འགོད་བྱེད་ཚད་བརྒྱ་ཆ་༤﹒༦ནང་ཚུན་དུ་ཚོད་འཛིན་ཐུབ་པ་བྱེད་དགོས་ཞེས་བཏོན་ཡོད་པ་རེད།
    ད་ལོ།རྒྱལ་ཁབ་ཀྱིས་མུ་མཐུད་མཐོ་རིམ་སློབ་གྲྭའི་སློབ་ཐོན་སློབ་མ་གཙོ་བོར་བྱས་ཏེ་ལས་ཞུགས་ལམ་བུ་ཤར་གཏོང་ཐུབ་པ་བཟོ་རྒྱུ་ཡིན་པ་དང་།དེ་དང་ཆབས་ཅིག་ལས་ཞུགས་ཞབས་ཞུར་ཤུགས་སྣོན་བརྒྱབ་སྟེ།ངལ་རྩོལ་པའི་ལས་ཞུགས་ནུས་པ་དང་ཆུ་ཚད་གོང་མཐོར་གཏོང་བ་དང་།རང་བརྟེན་བྱ་གཞག་གསར་གཏོད་ལ་སྐུལ་ལྕག་དང་ཟུར་སྐྱོར་བྱེད་རྒྱུ་དང་།བྱ་གཞག་གསར་གཏོད་ཀྱིས་ལས་ཞུགས་ལ་སྐུལ་འདེད་གཏོང་བ་བརྒྱུད་ལས་ཞུགས་ཀྱི་དུས་བབ་གཞི་རྩའི་ཆ་ནས་བརྟན་པོ་ཡོང་བ་བྱ་རྒྱུ་ཡིན་པ་རེད།