འདི་ག་ཚགས་པར་ཁང་དུ་པེ་ཅིང་ནས་ཟླ12ཚེས18ཉིན་གློག་འཕྲིན་འབྱོར་གསལ།ཀྲུང་དབྱང་ནོར་སྲིད་ཀྱིས་ནོར་སྲིད་དང་།ཁྲལ་འབབ།དངུལ་རྩ་སོགས་ཀྱི་སྲིད་ཇུས་བྱེད་ཐབས་ཕྱོགས་བསྡུས་བེད་སྤྱོད་བཏང་བ་དང་ཐབས་ལམ་མང་པོར་བརྟེན་ནས་ཞིང་ལས་ཐོན་ལས་ཅན་གྱི་སྣེ་འདྲེན་ཁེ་ལས་ལ་རྒྱབ་སྐྱོར་བྱེད་ཤུགས་ཆེ་རུ་བཏང་བ་རེད། ཀྲུང་དབྱང་ནོར་སྲིད་ཀྱིས་2012ལོར་མ་དངུལ་སྒོར་དུང་ཕྱུར་30.95བཏང་ནས་སྣེ་འདྲེན་ཁེ་ལས་ཀྱི་ཐོན་ལས་ཅན་གྱི་གཉེར་སྐྱོང་རྣམ་གྲངས་ལ་རྒྱབ་སྐྱོར་བྱས་པར་ཐོན་ལས་ཅན་གྱི་སྣེ་འདྲེན་ཁེ་ལས་ཁྱོན་བསྡོམས3826ལ་ཕན་ཐོགས་བྱུང་བ་རེད། 
    ཀྲུང་དབྱང་ནོར་སྲིད་ཀྱིས་ཞིང་ལས་ཐོན་ལས་ཅན་གྱི་སྣེ་འདྲེན་ཁེ་ལས་དེ་ཉིད་མ་དངུལ་གྱིས་རྒྱབ་སྐྱོར་བྱ་ཡུལ་གྱི་གྲས་སུ་བརྩིས་པ་དང་།2012ལོར་ཀྲུང་དབྱང་ནོར་སྲིད་ཀྱིས“ཤ་ཚལ་སྒོང”གསུམ་གྱི་ཐོན་རྫས་ཐོན་སྐྱེད་ཀྱི་རོགས་སྐྱོར་མ་དངུལ་སྒོར་དུང་ཕྱུར་15བཏང་ཞིང་'2009ལོ་ནས་བཟུང་ཀྲུང་དབྱང་ནོར་སྲིད་ཀྱིས་ཞིང་ལས་ཐོན་རྫས་ལས་སྣོན་རྣམ་གྲངས་དེ་ཁེ་ལས་འབྲིང་ཆུང་འཕེལ་རྒྱས་ཀྱི་ཆེད་དམིགས་མ་དངུལ་གྱི་རྒྱབ་སྐྱོར་བྱ་ཡུལ་གཙོ་གནད་ཀྱི་གྲས་ཤིག་ཏུ་བརྩིས་པ་དང་།དུས་མཚུངས་སུ་ཀྲུང་དབྱང་ནོར་སྲིད་ཀྱིས་ཞིང་ལས་འགན་བཅོལ་གྱི་འགྲོ་སོང་ཁ་གསབ་ཀྱི་སྲིད་ཇུས་ལག་ལེན་བསྟར་ནས་འགན་བཅོལ་བྱས་པའི་སྣེ་འདྲེན་ཁེ་ལས་ལ་བསྡུར་ཚད་ངེས་ཅན་གྱི་འགན་བཅོལ་ཁ་གསབ་སྤྲད་པ་དང་སྣེ་འདྲེན་ཁེ་ལས་གང་ཞིག་ཞིང་ལས་འགན་བཅོལ་ནང་ཞུགས་རྒྱུར་ཁྲིད་སྟོན་དང་རྒྱབ་སྐྱོར་བྱས་ཤིང་།ཆ་རྐྱེན་ལྡན་པའི་སྣེ་འདྲེན་ཁེ་ལས་ཀྱིས་སྔོན་མངགས་ཞིང་དུད་ལ་རོགས་རམ་བྱས་ནས་ཞིང་ལས་འགན་བཅོལ་ནང་ཞུགས་རྒྱུར་སྐུལ་ལྕག་བཏང་བ་དང་ཞིང་ལས་ཐོན་ལས་ཅན་དུ་གོང་འཕེལ་བཏང་ཡོད་པ་རེད།