ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ7པའི་ཚེས7ཉིན་འབྱོར་བའི་གཏམ་གསར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ལྷན་གྱི་ཀྲུའུ་ཞི་ཞི་ཅིན་ཕིང་གིས་པེ་ཅིན་དུས་ཚོད་ཟླ་བ7པའི་ཚེས7ཉིན་ཨ་རིའི་ཅིའུ་ཅིང་ཧྲན་དུ་ལྷོ་ཁོ་རེ་ཡ་རྒྱལ་ཁབ་ཀྱི་ལྷོ་ཁོ་རེ་ཡའི་ཡ་གླིང་མཁའ་སྐྱོད་སྤྱི་གཉེར་ཁང་གི་འགྲུལ་སྐྱེལ་གནམ་གྲུ་ལྷུང་བའི་དོན་རྐྱེན་བྱུང་སྟེ་མི་ཤི་རྨས་བྱུང་བར་ཐུགས་ཁུར་ཆེན་པོ་གནང་ཞིང་དོན་རྐྱེན་ཁྲོད་སྟབས་མ་ལེགས་པར་རྐྱེན་ལམ་དུ་ཤོར་བའི་ཀྲུང་གོའི་སྤྱི་དམངས་ལ་མྱ་ངན་ཞུ་ལ། རྐྱེན་ལམ་དུ་ཤོར་བའི་ཀྲུང་གོའི་སྤྱི་དམངས་ཀྱི་ཁྱིམ་བདག་དང་རྨས་སྐྱོན་ཕོག་པ། ལེགས་ལམ་བྱུང་བའི་ཀྲུང་གོའི་སྤྱི་དམངས། གཞན་པའི་འགྲུལ་པ་རྣམས་ལ་འཚམས་འདྲི་གནང་བ་རེད། ཞི་ཅིན་ཕིང་གིས་ཕྱི་འབྲེལ་པུའུ་དང་ཀྲུང་གོའི་ཨ་རིར་སྡོད་པའི་གཞུང་ཚབ་ལས་ཁུངས། ཅིའུ་ཅིང་ཧྲན་དུ་སྡོད་པའི་སྤྱི་ཁྱབ་གཞུང་ཚབ་དོན་གཅོད་ཁང་། ལྷོ་ཁོ་རེ་ཡར་སྡོད་པའི་གཞུང་ཚབ་ལས་ཁུངས་བཅས་ལ་ནུས་ཤུགས་ཡོད་དགུ་བཏོན་ནས་རྨས་སྐྱོན་བྱུང་བའི་ཀྲུང་གོའི་སྤྱི་དམངས་སྲོག་སྐྱོབ་སྨན་བཅོས་དང་ལེགས་ལམ་བྱུང་བའི་ཀྲུང་གོའི་སྤྱི་དམངས་ལ་བཀོད་སྒྲིག་ལས་ཀ་ལེགས་པོ་སྒྲུབ་དགོས་པ་དང་མཉམ་དུ་ཨ་རིའི་ཕྱོགས་དང་ལྷོ་ཁོ་རེ་ཡའི་ཕྱོགས་ལ་འབྲེལ་བ་རྒྱུན་འཛིན་བྱས་ཏེ་རྐྱེན་ལམ་དུ་ཤོར་བའི་ཀྲུང་གོའི་སྤྱི་དམངས་ཀྱི་ལས་མཇུག་ལེགས་བསྡུས་སོགས་ཀྱི་དོན་དག་ཐག་གཅོད་ལེགས་པོ་བྱེད་དགོས་པའི་མཛུབ་སྟོན་གནང་བ་རེད།