ཞིན་ཧྭ་གསར་འགྱུར་ཁང་དབྱི་ཁྲོན་ནས་འབྱོར་བའི་གཏམ་གསར། ཤེས་རྟོགས་བྱུང་བར་གཞིགས་ན། རྒྱལ་ཡོངས་ཀྱི་ཐུན་མོང་ནགས་ས་མུའུ་དུང་ཕྱུར27.02ཀྱི་དབང་ཆ་གཏན་འཁེལ་བྱས་ཏེ་ས་གནས་ཁག་གི་ཐུན་མོང་ནགས་སའི་ལམ་ལུགས་བཅོས་བསྒྱུར་རྒྱ་ཁྱོན་ཀྱི་བརྒྱ་ཆ99.05བཟུང་བ་དང་། དཔང་ཡིག་བཏང་བའི་ནགས་སའི་རྒྱ་ཁྱོན་མུའུ་དུང་ཕྱུར26.04ལ་སླེབས་ཏེ་གཏན་འཁེལ་བྱས་པའི་ནགས་སའི་སྤྱིའི་རྒྱ་ཁྱོན་ཀྱི་བརྒྱ་ཆ96.7བཟུང་བ་དང། ཞིང་པའི་དུད་ཚང་ཁྱོན་བསྡོམས་དུང་ཕྱུར་གཅིག་གིས་ནགས་ས་དཔང་ཡིག་ལེན་རྒྱུ་རག་ཡོད་པ་རེད།
    རྒྱལ་ཁབ་ནགས་ལས་ཅུས་ཀྱི་ཅུས་ཀྲང་གཞོན་པ་ཀྲང་ཅན་ལུང་གིས་ངོ་སྤྲོད་བྱས་པར་གཞིགས་ན། ཐུན་མོང་གི་ནགས་ས་དབང་ཆ་ལམ་ལུགས་བཅོས་བསྒྱུར་བྱེད་པ་ནས་ཁེ་ཕན་རག་པས། རྒྱལ་ཡོངས་སུ་ཞིང་པའི་ནགས་ལས་ཆེད་ལས་ཀྱི་མཉམ་ལས་རྩ་འཛུགས་ཁྲི11.15བཙུགས་ཡོད་པ་དང་། ནགས་ས་དབང་ཆའི་དོ་དམ་མ་ལག་ཉིན་རེ་བཞིན་འཐུས་སྒོ་ཚང་དུ་བྱུང་བ། ནགས་ལས་དཔལ་འབྱོར་གྱི་ཐོན་སྐྱེད་རིན་ཐང་སྒོར་དུང་ཕྱུར3601.6ལ་བསླེབས་ཏེ་ཞིང་པས་ལས་ཞུགས་དང་ཡོང་འབབ་འཕར་སྣོན་ཡོང་བར་སྐུལ་འདེད་ཆེན་པོ་ཐེབས་པ་རེད།
    ཀྲང་ཅན་ལུང་གིས་བཤད་རྒྱུར། རང་རྒྱལ་གྱིས་སྒོ་ཀུན་ནས་ཐུན་མོང་ནགས་ས་དབང་ཆའི་ལམ་ལུགས་བཅོས་བསྒྱུར་ལོ5བྱས་པ་ནས་བཟུང་། གཞི་རྩའི་ཐོག་ཐུན་མོང་ནགས་ས་དང་ཤིང་ནགས་ཀྱི་ཐོན་དབང་དང་། དུད་ཚང་ལ་འགན་གཙང་ལེན་བྱེད་པའི་བཅོས་བསྒྱུར་ལས་འགན་གསལ་པོ་བྱེད་ཡོད་པས། ཞིང་སྡེའི་ནགས་ལས་འཕེལ་རྒྱས་གཏོང་བའི་ནང་གནས་ཀྱི་ནུས་ཤུགས་ལ་སྐུལ་མ་བཏང་ཡོད་ལ། ནགས་ཚལ་ཐོན་ཁུངས་ཀྱི་རྒྱ་ཁྱོན་དང་གསོག་འཇོག་གི་རྒྱ་ཁྱོན་གཉིས་ཀ་འཕར་སྣོན་ཡོང་བ་ལའང་སྐུལ་འདེད་བཏང་ཡོད་པ་རེད།