ཟླ་བཞི་བའི་ཚེས་དྲུག་ཉིན་ནས་ཚེས་དགུ་ཉིན་བར། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་ཀའོ་ལིས་ཧྲན་ཞི་དང་ཞིན་ཅང་ལ་ཕེབས་ནས། དཔལ་འབྱོར་འཁོར་རྒྱུག་དང་སྒྲིག་གཞི་སྙོམས་སྒྲིག ནུས་ཁུངས་གྲོན་ཆུང་དང་བཙོག་ཆུ་ཇེ་ཉུང་དུ་གཏོང་བ་དང་། ཁོར་ཡུག་སྲུང་སྐྱོབ་སོགས་ཀྱི་གནས་ཚུལ་ལ་རྒྱུས་ལོན་མཛད་པར་མ་ཟད། འགན་སྲུང་རང་བཞིན་གྱི་སྡོད་ཁང་དང་མཁར་གྲོང་ཅན་འཛུགས་སྐྲུན་བྱེད་པ་སོགས་མང་ཚོགས་ཀྱི་འཚོ་བའི་བྱ་བར་རྟོག་ཞིབ་མཛད། ཁོང་གིས་ད་དུང་བཞུགས་མོལ་ཚོགས་འདུ་བསྡུས་ནས་ས་གནས་ཀྱི་མགོ་ཁྲིད་དང་ཁེ་ལས་ཀྱི་འགན་འཁུར་པ། ལས་བཟོ་བ་དང་མང་ཚོགས་ཀྱིས་བཏོན་པའི་བསམ་འཆར་དང་གྲོས་གཞི་ལ་ཉན།

རྟོག་ཞིབ་མཛད་སྐབས་ཀྲང་ཀའོ་ལིས་ཀྱིས་གསུངས་རྒྱུར། དེང་སྐབས་རང་རྒྱལ་འཕེལ་རྒྱས་ཁྲོད་དུ་གནས་པའི་འབུར་ཐོན་འགལ་བ་ནི་དཔལ་འབྱོར་སྒྲིག་གཞི་ལུགས་མཐུན་མིན་ཞིང་ཚན་རྩལ་གསར་སྐྲུན་ནུས་པ་ཞན་པ་དང་། ཐོན་ཁུངས་ཁོར་ཡུག་ཚོད་འཛིན་བྱས་དྲགས་པས། དཔལ་འབྱོར་སྒྲིག་གཞི་སྙོམས་སྒྲིག་དང་ཚན་རྩལ་གསར་སྐྲུན་ནུས་པ་ཇེ་ཆེར་གཏོང་བ་དང་། ཐོན་ཁུངས་ཁོར་ཡུག་སྲུང་སྐྱོབ་བྱེད་པ་བཅས་མཉམ་དུ་དམ་འཛིན་བྱེད་པ་དང་། སྔར་ལས་བཟང་བའི་སྒོ་ནས་དཔལ་འབྱོར་གྱི་འཕེལ་སྟངས་མྱུར་དུ་བསྒྱུར་ནས། དོ་མཉམ་མིན་ཞིང་མཐུན་སྦྱོར་མིན་པ་དང་རྒྱུན་མཐུད་མིན་པ་བཅས་ཀྱི་གནད་དོན་ཐག་གཅོད་དགོས། ཚན་རྩལ་གསར་སྐྲུན་ནུས་པ་ཇེ་ཆེར་གཏོང་བ་དང་། ཁེ་ལས་ཀྱི་གཙོ་ཁྲིད་ནུས་པ་འདོན་སྤེལ་གང་ལེགས་བྱེད་པར་མ་ཟད། ཤུགས་ཆེན་པོས་རང་བདག་གསར་སྐྲུན་ནུས་པ་ཇེ་ཆེར་བཏང་ནས། ཚན་རྩལ་རང་བཞིན་གྱི་ཁེ་ལས་དང་ཕུལ་བྱུང་ཤེས་ལྡན་མི་སྣས་གསར་སྐྲུན་དང་གསར་གཏོད། ལས་སྤེལ་བཅས་བྱེད་པར་རྒྱབ་སྐྱོར་བྱེད་དགོས། སྐྱེ་ཁམས་ཁོར་ཡུག་སྲུང་སྐྱོབ་བྱེད་པར་ཤུགས་སྣོན་པ་དང་བཙོག་ཆུའི་གནད་དོན་བཅོས་སྐྱོང་བྱས་ནས། མི་དམངས་མང་ཚོགས་ལ་བྱ་བ་དང་འཚོ་བའི་ཁོར་ཡུག་ཅུང་བཟང་བོ་ཞིག་གསར་སྐྲུན་བྱེད་དགོས་ཟེར།

ཀྲང་ཀའོ་ལིས་ཀྱིས་གསུངས་རྒྱུར། རྒྱལ་ཁབ་ཀྱིས་སྔོན་ཆད་དང་འདྲ་བར་དབུས་ནུབ་རྒྱུད་ས་ཁུལ་གྱི་འཕེལ་རྒྱས་ལ་རྒྱབ་སྐྱོར་བྱེད་ངེས་ཡིན་པས། རིམ་པ་སོ་སོའི་སྲིད་གཞུང་གིས་འགན་ནུས་མྱུར་དུ་བསྒྱུར་ནས། ཚོང་ར་དང་ཁེ་ལས། མང་ཚོགས་བཅས་ལ་ཕན་པའི་བྱ་བ་བཟང་བོར་སྒྲུབ་དགོས་པར་མ་ཟད། གཞི་རིམ་དུ་གནས་པའི་གནད་དོན་དང་དཀའ་ཁག་སེལ་རོགས་བྱེད་དགོས་ཟེར།