ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། སྤྱི་ཟླ3པའི་ཚེས21ཉིན་སློབ་གསོ་པུའུ་ཡིས་ལས་དོན་སྐོར་གྱི་བརྡ་ཐོ་གཉིས་བཏང་བར་གཞིགས་ནས་སློབ་གྲྭ་ཚང་མ་དང་བུ་བཅོལ་ཁང་ཚང་མས་ཟས་རིགས་ཆུད་ཟོས་གཏོང་བ་སྔོན་འགོག་བྱེད་པའི་ཞིབ་ཕྲའི་བྱེད་ཐབས་གཏན་འབེབས་བྱེད་དགོས་པ་དང་། རྒྱལ་ཡོངས་ཀྱི་མཐོ་རིམ་སློབ་གྲྭས་ཀྱང་ཟས་རིགས་ཆུད་ཟོས་གཏོང་བའི་གནད་དོན་ལ་དམིགས་ཏེ་ཐེངས་གཅིག་རང་བཞིན་གྱི་ཁྱོན་ཡོངས་རང་བཤེར་ལེགས་བསྒྲིགས་བྱ་རྒྱུ་ཡིན་པ་རེད།
སློབ་གསོ་པུའུ་ཡི་བརྡ་ཐོའི་ནང་། སློབ་གྲྭ་འབྲིང་ཆུང་གི་སློབ་མས་རང་ཉིད་ཀྱི་སློབ་གསོ་དང་དོ་དམ་ལ་ཤུགས་སྣོན་བརྒྱབ་སྟེ་ཡོངས་ཁྱབ་ཏུ་སློབ་མས་དཔལ་ཡོན་ལྡན་པའི་ངང་ཟས་རིགས་སྤྱོད་པར་ལྟ་སྐུལ་བྱེད་མཁན་བསྐོ་བཞག་བྱེད་དགོས་པ་དང་། ས་གནས་ཁག་གི་སློབ་གྲྭ་འབྲིང་ཆུང་གི་སློབ་མས་རྒྱུན་ལྡན་གྲོན་ཆུང་བསྲི་ཚགས་བྱེད་པའི་གོམས་སྲོལ་དེ་ཚད་གཞི་གལ་ཆེན་ཞིག་ཏུ་བརྩིས་ཏེ། སློབ་མའི་ཕྱོགས་བསྡུས་བྱང་ཚད་ཆུ་ཚད་ནང་དུ་བཅུག་ནས་ཕུལ་བྱུང་དང་སྔོན་ཐོན་སློབ་མ་འདེམས་ཐོན་བྱེད་སྐབས་དང་ཟུང་འབྲེལ་བྱེད་དགོས་པ། ས་གནས་ཁག་གིས་གྲོན་ཆུང་སློབ་གསོ་སྤེལ་བའི་གནས་ཚུལ་དེ་སློབ་སྤྱི་དང་དགེ་རྒན་གྱི་དཔྱད་ཞིབ་བྱེད་པའི་ནང་དོན་གལ་ཆེན་དུ་བརྩིས་དགོས་པ་མ་ཟད་དགེ་རྒན་གྱི་ལས་ཕྱོད་གླ་ཕོགས་དང་ཟུང་འབྲེལ་བྱེད་དགོས་པ། ས་གནས་ཁག་གི་མཐོ་རིམ་སློབ་གྲྭས་དྲིལ་བསྒྲགས་ཀྱི་ཐབས་ལམ་སྣ་ཚོགས་བེད་སྤྱོད་གང་ལེགས་སྤྱད་དེ་གྲོན་ཆུང་ནི་གཟི་བརྗིད་དང་ཆུད་ཟོས་ནི་ངོ་ཚ་སྐྱེས་དགོས་པའི་བསམ་བློ་ཀུན་སྤྱོད་ལྟ་བ་དར་སྤེལ་ཤུགས་ཆེན་གཏོང་དགོས་པ་དང་། ལས་དོན་ལ་ཕན་པ་མེད་པ་དང་ཆུད་ཟོས་ཚབས་ཆེན་གཏོང་བའི་སྣང་ཚུལ་མཐའ་གཅིག་ཏུ་དམར་རྗེན་དུ་བཏོན་དགོས་ཞེས་བཤད་ཡོད།
བརྡ་ཐོ་ནང་ས་གནས་ཁག་གི་སློབ་གྲྭ་འབྲིང་ཆུང་གི་གྲོན་ཆུང་བྱེད་སྒོ་སྤེལ་རྒྱུར་སྒྲིག་འཛུགས་བྱེད་དགོས་པའི་གྲོས་འགོ་ཡང་བཏོན་ཡོད་པ་རེད།  །