བོད་ཀྱི་རྩོམ་པ་པོ་གྲགས་ཅན་སྟག་འབུམ་རྒྱལ་གྱི་སྒྲུང་རིང《རྒུད》པར་དུ་བསྐྲུན་པ།

        ཉེ་སྔོན། དེང་རབས་བོད་ཀྱི་རྩོམ་པ་པོ་གྲགས་ཅན་སྟག་འབུམ་རྒྱལ་གྱིས་བརྩམས་ཤིང་མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་སྒྲུང་རིང《རྒུད》ཅེས་པ་དངོས་སུ་འགྲེམ་སྤེལ་བྱས། སྒྲུང་རིང་དེ་ནི་རྩོམ་པ་པོའི《ལྷིང་འཇགས་ཀྱི་རྩྭ་ཐང》རྗེས་ཀྱི་སྒྲུང་རིང་གཉིས་པ་ཡིན་ལ།  ཆེས་ཐོག་མར《སྦྲང་ཆར》དུས་དེབ་ཏུ་མུ་འགོད་བྱས་པ་དང༌།  རྗེས་སུ་སྐབས་ལྔ་བའི《སྦྲང་ཆར》རྩོམ་རིག་བྱ་དགའ་ཐོབ་པ་རེད།
        སྒྲུང་རིང་དེ་ས་བཅད་གཉིས་སུ་བགོས་ཡོད་པ་དང༌།  ས་བཅད་དང་པོར“ས་རྩོད”དེ་ལུག་པོ་གཉིས་ཀྱིས་གདོང་གཏུགས་ན། མགོ་ཁྲག་ཨ་ཅེ་ཝ་མོས་ལྡག་པའི་བོད་ཀྱི་གཏམ་དཔེ་སྔོན་དུ་དྲངས་ནས།  རྒྱ་ནག་གོང་མ་ཞིག་གི་རིང་ལ་ཟི་ལིང་སྐུ་ཚབ་ཀྱིས་གསེར་ཚ་དང་གླིང་ཚ།  སྤྱང་ཚ་གསུམ་པོས་སྐྱིད་ལ་མཉམ་རོལ་དང་དགྲ་ལ་མཉམ་སྡང་བྱེད་བཞིན་ཚོ་བ་གསུམ་པོ་ཞོ་ལྟར་ཆགས་པ་དེར་དབང་བསྒྱུར་བྱེད་ཆེད།   ཚོ་དཔོན་གསུམ་པོ་རེ་རེར་སྟོང་དཔོན་གྱི་ཆོ་ལོ་གནང་བར་མ་ཟད།  ཚོ་བ་རེ་རེའི་བར་ལ་ས་མཚམས་ཆུ་མཚམས་དབྱེ་སྟེ་ཞི་བཀྭའ་དུམ་བུར་གཏུབས་རྗེས་ཟ་བདེ་བའི་ཚུལ་དུ་བསྐྱལ་བས།  དུས་ནམ་ཞིག་ལ་གསེར་ཚ་དང་སྤྱང་ཚ་གཉིས་ཀྱི་བར་ལ་ས་རྩོད་ཀྱི་གྱོད་བྱུང་ཚུལ་བཤད་ཡོད་པ་དང༌།   སྨད་ཆ་ནི“གཡུ་འབྲུག་ས་རུ་ལྷུང་བ”སྟེ།  《གླིང་གེ་སར་རྒྱལ་བོའི་སྒྲུང》ལས་ཁྱི་ནག་པོའི་སྐྱེ་བ་ལེན་པ་ལས། སྟག་འཛུམ་དྲུག་ཉིལ་ལེར་ཤི་ན་དགའ་ཞེས་པ་ནང་བཞིན་གསེར་ཚ་དང་སྤྱང་ཚ་གཉིས་ཀྱི་བར་ལ་མི་ཤི་རྟ་འགྱེལ་གྱི་གྱོད་བྱུང་བ་ལ།  མཱ་ཇག་གིས་གཟུ་བཤད་པར་ཁ་གཡར་ནས་རྒྱུ་ཁྲལ་དང་དམག་ཁྲལ་བསྡུས་པར་མ་ཟད།  གཡོ་འཁྲུལ་གྱིས་སྟོང་དཔོན་ཉི་མ་ཡང་གཡུ་འབྲུག་ཐང་ལ་ལྷུང་བ་ནང་བཞིན་རྨ་འགྲམ་གྱི་གྲམ་གཞུང་དུ་བསྒྱེལ་ཚུལ་བཤད་ཡོད་པ་རེད།

དཔེ་དེབ་ཀྱི་ནང་ངོས།

        རྒྱུས་ལོན་བྱས་པ་ལྟར་ན།  རྩོམ་པ་པོ་སྟག་འབུམ་རྒྱལ་གྱིས་ད་ལྟའི་བར་དུ་བོད་ཁུལ་གྱི་དུས་དེབ་དང་ཚགས་པར་ཁག་ཏུ་སྒྲུང་གཏམ་རིང་འབྲིང་ཐུང་གསུམ70ལྷག་སྤེལ་ཡོད་པ་དང༌།  སྒྲུང་གཏམ་སྐོར་ཞིག་བོད་ཁུལ་གྱི་སློབ་གྲྭ་ཆེ་འབྲིང་ཆུང་གསུམ་གྱི་སློབ་དེབ་ཏུ་བདམས་པར་མ་ཟད།  དབྱིན་ཇི་དང་འཇར་མན།  ཧྥ་རན་སེ།  འཇར་པན་སོགས་ཀྱི་ཡི་གེར་བསྒྱུར་བ་དང༌།  སྔ་གཞུག་ཏུ་སྐབས་གཉིས་པ་དང་བཞི་བ།  ལྔ་བའི“སྦྲང་ཆར་རྩོམ་རིག་བྱ་དགའ།”  ཟླ་ཟེར་སྤེལ་ནས་ལོ20འཁོར་བའི“ཕུལ་བྱུང་རྩོམ་རིག་བྱ་དགའ”།  སྐབས་གཉིས་པའི་རྒྱལ་ཡོངས“གངས་རྒྱན་བུམ་པའི”བོད་ཀྱི་རྩོམ་རིག་བྱ་དགའ། མཚོ་སྔོན་ཞིང་ཆེན་གྱི་སྐབས་དང་པོའི“འབྲོང”བུམ་པའི་བོད་ཀྱི་རྩོམ་རིག་བྱ་དགའ།  རྒྱ་ཡིག་གི《མཚོ་སྔོན་པོ》རྩོམ་རིག་བྱ་དགའ་དང༌།  《མི་རིགས་རྩོམ་རིག》གི་རྩོམ་རིག་བྱ་དགའ་སོགས་ཐོབ་མྱོང༌།  བརྩམས་ཆོས་གཙོ་བོར་སྒྲུང་རིང《ལྷིང་འཇགས་ཀྱི་རྩྭ་ཐང》དང༌།  སྒྲུང་ཐུང་ཕྱོགས་བསྒྲིགས《མི་རབས་གསུམ་གྱི་རྨི་ལམ》།  སྒྲུང་འབྲིང་ཕྱོགས་བསྒྲིགས《ཁ་བ་མེད་པའི་དགུན་ཁ》།  སྒྲུང་ཐུང་རྒྱ་འགྱུར་མ་ཕྱོགས་བསྒྲིགས《མི་ཚེའི་གླུ་དབྱངས》སོགས་ཡོད།