ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། སྤྱི་ཟླ12པའི་ཚེས11ཉིན། ཀྲུང་གུང་ཀྲུང་དབྱང་ཆབ་སྲིད་ཅུད་ཀྱི་ཨུ་ཡོན། ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི། ཀྲུང་དབྱང་དྲིལ་བསྒྲགས་པུའི་པུའུ་ཀྲང་ལིའུ་ཆི་པའོ་ཡིས་ཀྲུང་དབྱང་གསར་འགྱུར་ཚན་པར་རྟོག་ཞིབ་གནང་སྐབས། གསར་འགྱུར་འཐབ་ཕྱོགས་ཀྱིས་ཏང་གི་ཚོགས་ཆེན་བཅོ་བརྒྱད་པའི་བླང་བྱ་གཞིར་བཟུང་ཆོད་སེམས་བརྟན་པོས་རྩོམ་སྲོལ་ལ་ལེགས་བསྒྱུར་བྱེད་དགོས་པ་དང་། རྩོམ་སྲོལ་ཡག་པོར་བརྟེན་ནས་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་བྱེད་རྒྱུ་ཟམ་མི་ཆད་པར་གཏིང་ཟབ་ཏུ་གཏོང་བ་དང་། རིགས་ཁག་གི་སྨྱན་སྦྱོར་གྱི་བརྒྱུད་བསྒྲགས་ནུས་པ་དང་ཤུགས་རྐྱེན་ནུས་པ་གོང་མཐོར་གཏོང་རྒྱུར་སྐུལ་འདེད་གཏོང་དགོས་ཞེས་ནན་བཤད་གནང་བ་རེད།

  རྟོག་ཞིབ་གནང་བའི་རིང་། ཀྲུང་དབྱང་གསར་འགྱུར་ཚན་པའི་འགན་འཁུར་བས་ཀྲུང་དབྱང་ཆབ་སྲིད་ཅུད་ཀྱི་རྩོམ་སྲོལ་ལེགས་བསྒྱུར་དང་གཏན་འབེབས་ཆེན་པོ་བརྒྱད་ནང་བཏོན་པའི་གསར་འགྱུར་གནས་ཚུལ་གཏོང་སྤེལ་དང་། རྩོམ་སྲོལ་ལེགས་བསྒྱུར་ཐད་ཀྱི་བླང་བྱར་སློབ་སྦྱོང་ནན་ཏན་གནང་ཡོད་པ་རེད། ལིའུ་ཆི་པའོ་ཡིས་གསར་འགྱུར་འཐབ་ཕྱོགས་ཀྱིས་ཏང་གི་དགོངས་ཚུལ་དྲིལ་བསྒྲགས་དང་། སྤྱི་ཚོགས་གནས་ཚུལ་དང་དམངས་ཀྱི་འདོད་བློ་བརྒྱུད་བསྒྲགས་བྱེད་པའི་གལ་ཆེའི་ལས་འགན་འཁུར་ཡོད་པས། ངེས་པར་དུ་གོ་བ་གཏིང་ཟབ་ལེན་དགོས་པ་དང་། ཀྲུང་དབྱང་གི་དགོངས་པ་ལག་བསྟར་མཐའ་གཅིག་ཏུ་བྱས་ཏེ། རྩོམ་སྲོལ་ལེགས་བསྒྱུར་བྱེད་རྒྱུ་དེ་མིག་སྔའི་གལ་ཆེའི་ལས་འགན་ཞིག་ཏུ་བརྩིས་ནས་ཚད་མཐོའི་མཐོང་ཆེན་དང་། འཕྲལ་དུ་བཀོད་སྒྲིག་བྱེད་པ། སྐུལ་འདེད་ཤུགས་ཆེན་གཏོང་བ་བཅས་བྱེད་དགོས་ཞེས་བཏོན་གནང་བ་རེད།  །