ཟླ་བ11པའི་ཚེས8ཉིན་ཞིན་ཧྭ་གསར་འགྱུར་ཁང་དུ་པེ་ཅིན་ནས་གློག་འཕྲིན་འབྱོར་གསལ། བློ་མཐུན་ཧུའེ་ཅིན་ཐའོ་ཡིས་ཚོགས་ཆེན་བཅོ་བརྒྱད་པའི་སྙན་ཞུའི་ནང་གསུང་དོན། སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་འཛུགས་སྤེལ་བྱེད་པར་སྐུལ་འདེད་ཏན་ཏིག་བྱ་དགོས།
ཧུའུ་ཅིན་ཐའོ་ཡིས་གསུང་དོན། རིག་གནས་ནི་མི་རིགས་ཀྱི་ཁྲག་རྩ་ལྟ་བུ་དང་མི་དམངས་ཀྱི་བསམ་པའི་ཁྱིམ་གཞིས་ཡིན། འབྱོར་འབྲིང་གི་སྤྱི་ཚོགས་ཁྱོན་ཡོངས་ནས་འཛུགས་སྐྲུན་དང་ཀྲུང་ཧྭ་མི་རིགས་བསྐྱར་དར་རླབས་ཆེ་མངོན་འགྱུར་བྱེད་པར། ངེས་པར་དུ་སྤྱི་ཚོགས་རིང་ལུགས་ཀྱི་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་བར་བྱས་ནས། སྤྱི་ཚོགས་རིང་ལུགས་ཀྱི་རིག་གནས་དར་སྤེལ་གཏོང་བའི་མཐོ་རླབས་གསར་པ་འཕྱུར་བ་དང་རྒྱལ་ཁབ་ཀྱི་རིག་གནས་མངོན་མེད་སྟོབས་ཤུགས་ཇེ་ཆེར་བཏང་སྟེ། རིག་གནས་ཀྱིས་དར་སྲོལ་གྱི་སྣེ་ཁྲིད་དང་། མི་དམངས་ལ་སློབ་གསོ་གཏོང་བ། སྤྱི་ཚོགས་ལ་ཞབས་འདེགས་ཞུ་བ་འཕེལ་རྒྱས་ཡོང་བར་བྱེད་པ་བཅས་ཀྱི་ནུས་པ་འདོན་སྤེལ་བྱ་དགོས།    ཧུའུ་ཅིན་ཐའོ་ཡིས་གསུང་དོན།སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་འཛུགས་པར་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་འཕེལ་རྒྱས་གཏོང་བའི་བགྲོད་ལམ་དུ་ངེས་པར་བསྐྱོད་དགོས་ཤིང་། མི་དམངས་ལ་ཞབས་འདེགས་ཞུ་བ་དང་སྤྱི་ཚོགས་རིང་ལུགས་ལ་ཞབས་འདེགས་ཞུ་བའི་ཁ་ཕྱོགས་རྒྱུན་འཁྱོངས་དང་། མེ་ཏོག་མཉམ་བཞད་དང་མཁས་བརྒྱ་འགྲན་གླེང་གི་བྱེད་ཕྱོགས་རྒྱུན་འཁྱོངས། དོན་དངོས་དང་འཚོ་བ། མང་ཚོགས་བཅས་དང་ཉེ་བར་བཅར་བའི་རྩ་དོན་རྒྱུན་འཁྱོངས། སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་དང་དངོས་པོའི་དཔལ་ཡོན་ཁྱོན་ཡོངས་ནས་འཕེལ་རྒྱས་གཏོང་བར་སྐུལ་འདེད་བཅས་བྱས་ཏེ། དེང་རབས་ཅན་ལ་ཁ་ཕྱོགས་པ་དང་འཛམ་གླིང་ལ་ཁ་ཕྱོགས་པ། འབྱུང་འགྱུར་ལ་ཁ་ཕྱོགས་པའི་མི་རིགས་དང་ཚན་རིག་མང་ཚོགས་བཅས་ཀྱི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་དར་སྤེལ་གཏོང་དགོས།
ཧུའུ་ཅིན་ཐའོ་ཡིས་ནན་གསུང་གནང་དོན། སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་འཛུགས་པའི་གནད་འགག་ནི་དམངས་ཡོངས་ཀྱི་རིག་གནས་གསར་གཏོད་ཀྱི་གསོན་ཤུགས་ཆེ་རུ་གཏོང་རྒྱུ་དེ་ཡིན། རིག་གནས་སྒྲིག་སྲོལ་བསྒྱུར་བཅོས་གཏིང་ཟབ་ཏུ་སྤེལ་བ་དང་། རིག་གནས་ཀྱི་ཐོན་སྐྱེད་ནུས་ཤུགས་བཅིངས་འགྲོལ་དང་འཕེལ་རྒྱས་གཏོང་བ།རིག་གཞུང་དམངས་གཙོ་དང་སྒྱུ་རྩལ་དམངས་གཙོ་དར་སྤེལ་གཏོང་བ་བཅས་བྱས་ཏེ། མི་དམངས་ལ་རིག་གནས་ཀྱི་གར་སྟེགས་ཡངས་པོ་འདོན་སྤྲོད་དང་རིག་གནས་གསར་གཏོད་ཀྱི་ཆུ་འགོ་ཡོད་ཚད་ཀློང་དུ་བརྡོལ་ཞིང་དམངས་ཡོངས་ཀྱི་རིག་གནས་གསར་གཏོད་བྱེད་པའི་གསོན་ཤུགས་རྒྱུན་མཐུད་ངང་མཆེད་པ། སྤྱི་ཚོགས་ཀྱི་རིག་གནས་འཚོ་བ་སྔར་ལས་གྲ་རྒྱས་ཕུན་སུམ་ཚོགས་པ། མི་དམངས་ཀྱི་གཞི་རྩའི་རིག་གནས་ཁེ་དབང་སྔར་ལས་འགན་སྲུང་གང་ལེགས་ཐོབ་པ། མི་དམངས་ཀྱི་བསམ་བློ་དང་ཀུན་སྤྱོད་ཀྱི་བྱང་ཚད་དང་ཚན་རིག་རིག་གནས་ཀྱི་བྱང་ཚད་ཁྱོན་ཡོངས་ནས་ཇེ་མཐོར་གཏོང་བ། ཀྲུང་ཧྭ་རིག་གནས་ཀྱི་རྒྱལ་སྤྱིའི་ཤུགས་རྐྱེན་རྒྱུན་ཆད་མེད་པར་ཆེ་རུ་འགྲོ་བ་བཅས་ཀྱི་རྣམ་པ་གསར་པ་གཏོད་དགོས།
     གཅིག་ནས་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་མ་ལག་འཛུགས་སྤེལ་བྱེད་ཤུགས་ཆེ་རུ་གཏོང་དགོས། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་མ་ལག་སློབ་སྦྱོང་དང་སློབ་གསོ་གཏིང་ཟབ་ཏུ་སྤེལ་བར། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་མ་ལག་ལ་བརྟེན་ནས་སྤྱི་ཚོགས་ཀྱི་བསམ་པའི་རླབས་རྒྱུན་གྱི་སྣེ་ཁྲིད་དང་སྤྱི་ཚོགས་ཀྱི་ངོས་འཛིན་གཅིག་མཐུན་མཉམ་སྒྲིལ་བྱ་དགོས། མར་ཁེ་སི་རིང་ལུགས་ཀྲུང་གོ་ཅན་དང་དུས་རབས་ཅན། མང་ཚོགས་ཅན་བཅས་སུ་སྐུལ་སྤེལ་བྱེད་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གཞུང་མ་ལག་གིས་ཏང་ཡོངས་ལ་དྲག་ཆས་སྤྲོས་པ་དང་མི་དམངས་ལ་སློབ་གསོ་གཏོང་རྒྱུ་རྒྱུན་འཁྱོངས་ལྷོད་མེད་བྱེད་པ། སེམས་ནང་དུ་འཇགས་པ་བཅས་ཡོང་བར་བྱ་དགོས། ཕུགས་འདུན་དང་སེམས་ཀྱི་སློབ་གསོ་རྒྱ་ཁྱབ་ཏུ་སྤེལ་ནས་རྒྱ་ཆེའི་མི་དམངས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེའི་འོག་ཏུ་མཐུན་སྒྲིལ་གོང་བུར་འགྲིལ་བར་བྱ་དགོས། མི་རིགས་སྙིང་སྟོབས་དང་དུས་རབས་ཀྱི་སྙིང་སྟོབས་དར་སྤེལ་ཤུགས་ཆེན་གཏོང་བ་དང་། རྒྱལ་གཅེས་རིང་ལུགས་དང་ཐུན་མོང་རིང་ལུགས། སྤྱི་ཚོགས་རིང་ལུགས་བཅས་ཀྱི་སློབ་གསོ་གཏིང་ཟབ་ཏུ་སྤེལ་ཏེ། མི་དམངས་ཀྱི་སེམས་ཁམས་འཇིག་རྟེན་ཕུན་སུམ་ཚོགས་སུ་གཏོང་བ་དང་མི་དམངས་ཀྱི་བསམ་པའི་སྟོབས་ཤུགས་ཆེ་རུ་གཏོང་དགོས། སྟོབས་འབྱོར་དང་དམངས་གཙོ། དཔལ་ཡོན། འཆམ་མཐུན་བཅས་དར་སྤེལ་གཏོང་བ་དང་། རང་མོས་དང་འདྲ་མཉམ། དྲང་གཞག  ཁྲིམས་སྐྱོང་བཅས་དར་སྤེལ་གཏོང་བ། རྒྱལ་གཅེས་དང་ལས་སྤྲོ། ཡིད་རྟོན། མཛའ་མཐུན་བཅས་དར་སྤེལ་བཏང་སྟེ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་ཧུར་ཐག་བྱ་དགོས།    གཉིས་ནས་སྤྱི་དམངས་ཀྱི་ཀུན་སྤྱོད་བྱང་ཚད་ཁྱོན་ཡོངས་ནས་ཇེ་མཐོར་གཏོང་དགོས། ཁྲིམས་ལྟར་རྒྱལ་ཁབ་སྐྱོང་བ་དང་སྤྱོད་བཟང་ལ་བརྟེན་ནས་རྒྱལ་ཁབ་སྐྱོང་བ་གཉིས་ཟུང་འབྲེལ་བྱེད་ཅིང་། སྤྱི་ཚོགས་ཀྱི་ཀུན་སྤྱོད་དང་། ལས་རིགས་ཀྱི་ཀུན་སྤྱོད། ཁྱིམ་རྒྱུད་སྤྱོད་བཟང་། སྒེར་གྱི་སྤྱོད་ལམ་བཅས་ཀྱི་སློབ་གསོ་གཏོང་བར་ཤུགས་སྣོན་བརྒྱབ་སྟེ། ཀྲུང་ཧྭའི་སྲོལ་རྒྱུན་སྤྱོད་བཟང་དར་སྤེལ་དང་དུས་རབས་ཀྱི་སྲོལ་གསར་དར་སྤེལ་གཏོང་དགོས། སྤྱི་དམངས་ཀྱི་ཀུན་སྤྱོད་ལེགས་སྐྱོང་གི་ལས་གཞིར་སྐུལ་སྤེལ་དང་། བདེན་ལེགས་མཛེས་གསུམ་དར་སྤེལ་དང་རྫུན་ངན་སྐྱུག་བྲོ་གསུམ་དམའ་འབྱིན་ཁ་བརྡུངས་བཏང་ནས་མི་རྣམས་ཀྱིས་རང་འགུལ་དང་ཁྲིམས་བཀོད་འགན་འཁྲི་དང་། སྤྱི་ཚོགས་ཀྱི་འགན་འཁྲི། ཁྱིམ་ཚང་གི་འགན་འཁྲི་བཅས་སྒྲུབ་པའི་ཁྲིད་སྟོན་བྱས་ཏེ། ངལ་རྩོལ་གཟི་བརྗིད་ལྡན་ཞིང་གསར་གཏོད་རླབས་ཆེ་བའི་སྤྱི་ཚོགས་ཀྱི་སྣང་ཚུལ་བཏོད་པ་དང་། ཁྲེལ་གྲགས་ཤེས་པ་དང་སྤྱོད་བཟང་ལ་དང་དོད། བྱས་རྗེས་འཇོག་པ། འཆམ་མཐུན་ཡོང་བར་བྱེད་པ་བཅས་ཀྱི་དར་སྲོལ་བཟང་པོ་སྐྱེད་སྲིང་བྱ་དགོས། ཀུན་སྤྱོད་ཁྱབ་ཁོངས་ཀྱི་གནད་དོན་མངོན་གསལ་སྐོར་གྱི་ཆེད་དོན་སློབ་གསོ་དང་བཅོས་སྐྱོང་གཏིང་ཟབ་ཏུ་སྤེལ་ཏེ། སྲིད་དོན་ཡིད་རྟོན་དང་། ཚོང་དོན་ཡིད་རྟོན། སྤྱི་ཚོགས་ཡིད་རྟོན། ཁྲིམས་འཛིན་ཡིད་ཆེས་བཅས་ཡོང་བར་བྱེད་ཤུགས་ཆེ་རུ་གཏོང་དགོས། བསམ་བློ་དང་ཆབ་སྲིད་ལས་དོན་ལ་ཤུགས་སྣོན་ལེགས་བཅོས་དང་།མི་ཆོས་སེམས་ཁུར་དང་སེམས་གསོ་གཏོང་བར་དོ་སྣང་། མང་ཚོགས་ཀྱི་རང་བཞིན་ལྡན་པའི་བསམ་པའི་དཔལ་ཡོན་གསར་སྤེལ་གྱི་བྱེད་སྒོ་གཏིང་ཟབ་ཏུ་སྤེལ་བ་དང་དང་བླངས་ཞབས་ཞུ་རྒྱ་ཁྱབ་ཏུ་སྤེལ་ཏེ། ལེ་ཧྥེང་ལ་སློབ་སྦྱོང་བྱེད་པའི་བྱེད་སྒོ་དང་ཀུན་སྤྱོད་དཔེ་བཟང་ལ་སློབ་སྦྱོང་དང་དྲིལ་བསྒྲགས་བྱ་རྒྱུ་དེ་རྒྱུན་ལྡན་ཅན་དུ་འགྱུར་བར་བྱ་དགོས།       གསུམ་ནས་མི་དམངས་ཀྱི་བསམ་པའི་རིག་གནས་འཚོ་བ་ཕུན་སུམ་ཚོགས་སུ་གཏོང་དགོས། མི་དམངས་ཀྱི་ལྟེ་བར་གྱུར་བའི་གསར་གཏོད་ཀྱི་ཁྲིད་ཕྱོགས་མཐའ་འཁྱོངས་བྱས་ཏེ། རིག་གནས་ཐོན་རྫས་ཀྱི་སྤུས་ཀ་ཇེ་ལེགས་སུ་བཏང་ནས་མི་དམངས་ལ་བསམ་པའི་རྒྱགས་ཕྱེ་སྔར་ལས་ལེགས་ཤིང་མང་པོ་འདོན་སྤྲོད་བྱ་དགོས། གཞི་རིམ་ལ་ཁ་ཕྱོགས་པ་དང་མང་ཚོགས་ལ་ཞབས་འདེགས་ཞུ་རྒྱུ་མཐའ་འཁྱོངས་བྱས་ཏེ། རིག་གནས་ཀྱི་དམངས་ཕན་ལས་གཞི་གཙོ་གནད་ལ་སྐུལ་སྤེལ་གང་མགྱོ གས་གཏོང་བ་དང་། གྲོང་ཚོ་དང་དར་རྒྱས་ཞན་ཁུལ་དུ་རིག་གནས་དར་སྤེལ་གཏོང་རོགས་བྱེད་ཤུགས་ཆེ་རུ་བཏང་ནས་སྤྱི་པའི་རིག་གནས་ཞབས་ཞུའི་སྒྲིག་བཀོད་དེ་སྤྱི་ཚོགས་ཐོག་རིན་པ་མི་ལེན་པར་སྒོ་འབྱེད་པར་མུ་མཐུད་སྐུལ་སྤེལ་བཅས་གཏོང་དགོས། སྲོལ་རྒྱུན་རིག་གནས་ཕུལ་བྱུང་རྒྱུན་འཛིན་བྱེད་པའི་མ་ལག་བཙུགས་ཏེ། ཀྲུང་ཧྭའི་སྲོལ་རྒྱུན་རིག་གནས་ཕུལ་བྱུང་དར་སྤེལ་གཏོང་དགོས། རྒྱལ་ཁབ་ཀྱིས་ཡོངས་སུ་སྤྱོད་པའི་སྐད་དང་ཡི་གེ་ཁྱབ་སྤེལ་དང་ཚད་ལྡན་བཟོ་དགོས་པ་དང་། གྲངས་ཉུང་མི་རིགས་ཀྱི་རིག་གནས་བྱ་གཞག་དར་རྒྱས་དང་འཕེལ་རྒྱས་གཏོང་དགོས། མང་ཚོགས་རང་བཞིན་གྱི་རིག་གནས་བྱེད་སྒོ་སྤེལ་ཏེ། དྲ་སྦྲེལ་གྱི་ནང་དོན་དར་རྒྱས་གཏོང་བར་ཤུགས་སྣོན་དང་ལེགས་བཅོས་བྱས་ཏེ། དྲ་ཐོག་ཏུ་བརྗོད་གཞི་གཙོ་བོ་དར་སྤེལ་གཏོང་དགོས། ཚན་རིག་ཤེས་བྱ་ཁྱབ་གདལ་དུ་གཏོང་བ་དང་། ཚན་རིག་གི་སྙིང་སྟོབས་དར་སྤེལ་བཏང་སྟེ། དམངས་ཡོངས་ཀྱི་ཚན་རིག་བྱང་ཚད་ཇེ་མཐོར་གཏོང་དགོས། དམངས་ཡོངས་ཀྱི་ལུས་སྦྱོང་བྱེད་སྒོ་རྒྱ་ཁྱབ་ཏུ་སྤེལ་ནས་མང་ཚོགས་ཀྱི་ལུས་རྩལ་དང་རྩལ་འགྲན་ལུས་རྩལ་ཁྱོན་ཡོངས་ནས་འཕེལ་རྒྱས་ཡོང་བར་བྱ་དགོས།      བཞི་ནས་རིག་གནས་ཀྱི་དངོས་ཡོད་སྟོབས་ཤུགས་དང་འགྲན་རྩོད་སྟོབས་ཤུགས་ཧྲིལ་པོ་ཆེ་རུ་གཏོང་དགོས། སྤྱི་ཚོགས་ཀྱི་ཕན་འབྲས་ཨང་དང་པོ་འཇོག་པ་དང་སྤྱི་ཚོགས་ཀྱི་ཕན་འབྲས་དང་དཔལ་འབྱོར་གྱི་ཕན་འབྲས་ཕན་ཚུན་གཅིག་གྱུར་ཡོང་བ་རྒྱུན་འཁྱོངས་བྱས་ཏེ་རིག་གནས་བྱ་གཞག་ཁྱོན་ཡོངས་ནས་དར་རྒྱས་དང་རིག་གནས་ཐོན་ལས་འཕེལ་རྒྱས་མགྱོ གས་པོ་ཡོང་བར་བྱ་དགོས། མཚན་ཉིད་རིག་པ་དང་སྤྱི་ཚོགས་ཚན་རིག་དང་། གསར་འགྱུར་དཔེ་སྐྲུན། རླུང་འཕྲིན་དང་གློག་བརྙན་བརྙན་འཕྲིན། རྩོམ་རིག་སྒྱུ་རྩལ་བཅས་ཀྱི་ལས་དོན་འཕེལ་རྒྱས་གཏོང་དགོས། སྤྱི་པའི་རིག་གནས་ལས་གཞི་དང་རིག་གནས་ཀྱི་རྣམ་གྲངས་གལ་ཆེན་འཛུགས་སྐྲུན་བྱེད་པར་ཤུགས་སྣོན་བརྒྱབ་སྟེ། སྤྱི་པའི་རིག་གནས་ཞབས་ཞུའི་མ་ལག་འཐུས་ཚང་དུ་གཏོང་བ་དང་། རིག་གནས་དང་ཚན་རྩལ་མཉམ་འདྲེས་ཡོང་བ་དང་དཔེ་གསར་ཅན་གྱི་རིག་གནས་རྣམ་པ་འཕེལ་རྒྱས་བཏང་ནས། རིག་གནས་ཀྱི་ཐོན་ལས་གཞི་ཁྱོན་ཅན་དང་ཞིབ་ལས་ཅན། ཆེད་ལས་ཅན་བཅས་ཀྱི་ཆུ་ཚད་ཇེ་མཐོར་གཏོང་དགོས། དེང་རབས་ཀྱི་འགྲེམས་སྤེལ་མ་ལག་འཛུགས་པ་དང་འཕེལ་རྒྱས་བཏང་སྟེ། འགྲེམས་སྤེལ་ནུས་པ་ཇེ་ཆེར་གཏོང་དགོས། རིག་གནས་ཁྱབ་ཁོངས་ཀྱི་ཕྱོགས་ལ་སྒོ་འབྱེད་རྒྱ་ཆེ་རུ་བཏང་སྟེ། ཕྱི་རྒྱལ་གྱི་ཕུལ་དུ་བྱུང་བའི་རིག་གནས་གྲུབ་འབྲས་བསྡུ་ལེན་དང་དཔྱད་གཞིར་འཛིན་གང་ཐུབ་བྱ་དགོས།    ཧུའུ་ཅིན་ཐའོ་ཡིས་བསྟན་དོན། ང་ཚོས་ངེས་པར་དུ་སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་མདུན་དུ་སྐྱོད་པའི་ཁ་ཕྱོགས་མཐའ་འཁྱོངས་བྱེད་པ་དང་། རིག་གནས་རང་རྟོགས་དང་རིག་གནས་ཡིད་ཆེས་ཀྱི་བསམ་པ་ཆེན་པོ་བཅངས་ཏེ། སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་འཛུགས་པའི་དམིགས་འབེན་རླབས་པོ་ཆེའི་ཕྱོགས་སུ་གོམ་སྟབས་ཆེན་པོས་མདུན་དུ་བསྐྱོད་དགོས།