ཟླ་བ11པའི་ཚེས8ཉིན་ཞིན་ཧྭ་གསར་འགྱུར་ཁང་པེ་ཅིན་ནས་གློག་འཕྲིན་འབྱོར་གསལ།བློ་མཐུན་ཧུའུ་ཅིན་ཐའོ་ཡིས་ཚོགས་ཆེན་བཅོ་བརྒྱད་པའི་སྙན་ཞུའི་ནང་འདས་པའི་ལོ་ལྔའི་རིང་གི་ལས་ཀ་དང་ལོ་བཅུའི་གནས་ཚུལ་སྤྱི་བསྡོམས་བྱས་ཚུལ་ངོ་སྤྲོད་གནང་བ།
ཧུའུ་ཅིན་ཐའོ་ཡིས་གསུང་དོན།ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་བཅོ་བརྒྱད་པ་ནི་རང་རྒྱལ་འདི་ཉིད་འབྱོར་འབྱིང་སྤྱི་ཚོགས་ཁྱོན་ཡོངས་ནས་འཛུགས་སྐྲུན་བྱེད་རིམ་དུ་སླེབས་པའི་ཐག་གཅོད་ཀྱི་རང་བཞིན་ལྡན་པའི་དུས་རིམ་དུ་འཚོགས་པའི་ཚོགས་ཆེན་གལ་ཆེན་ཞིག་རེད།ཚོགས་ཆེན་གྱི་བརྗོད་བྱ་གཙོ་བོ་ནི།ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་བསྒྲེང་བ་དང་ཏེང་ཞའོ་ཕིན་གྱི་རིགས་པའི་གཞུང་ལུགས་དང་“མཚོན་བྱེད་གསུམ་”གྱི་དགོངས་དོན་གལ་ཆེན།།ཚན་རིག་གི་འཕེལ་རྒྱས་ལྟ་བ་བཅས་སློབ་སྟོན་དུ་བྱེད་པ་དང་།བསམ་བློར་བཅིངས་འགྲོལ་གཏོང་བ།བསྒྱུར་བཅོས་སྒོ་འབྱེད།སྟོབས་ཤུགས་ཆིག་སྒྲིལ།འགག་སྒྲོལ་དཀའ་སེལ།ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བགྲོད་ལམ་བརྒྱུད་དེ་བློ་རྩ་བརྟན་པོའི་སྒོ་ནས་མདུན་སྐྱོད་བཅས་བྱས་ཏེ་འབྱོར་འབྲིང་གི་སྤྱི་ཚོགས་ཁྱོན་ཡོངས་ནས་འཛུགས་སྐྲུན་བྱེད་ཕྱིར་འབད་འཐབ་བྱ་དགོས་པ་འདི་རེད།   ཧུའུ་ཅིན་ཐའོ་ཡིས་གསུང་དོན།ཚོགས་ཆེན་བཅུ་བདུན་པ་འཚོགས་པ་ནས་བཟུང་གི་ལོ་ལྔ་ནི་ང་ཚོས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བགྲོད་ལམ་ཐོག་བློ་སྟོབས་ཆེན་པོས་མདུན་དུ་བསྐྱོད་པའི་ལོ་ལྔ་ཡིན་པ་དང་།ང་ཚོས་དཀའ་ངལ་དང་ཉམས་ཉེན་སྣ་ཚོགས་ཉམས་བསད་ཐེག་སྟེ་འབྱོར་འབྲིང་གི་སྤྱི་ཚོགས་ཁྱོན་ཡོངས་ནས་འཛུགས་སྐྲུན་བྱེད་པར་རྒྱལ་ཁ་གསར་པ་བླངས་པའི་ལོ་ལྔ་རེད།ལོ་ལྔའི་རིང་།ཕྱོགས་གང་ཅིའི་ལས་དོན་ཐད་གྲུབ་འབྲས་གསར་པ་གལ་ཆེན་ཐོབ་པ་རེད།དཔལ་འབྱོར་བརྟན་པོའི་ངང་འཕེལ་རྒྱས་ཅུས་མགྱོ གས་པོ་བྱུང་བ་དང་།བསྒྱུར་བཅོས་སྒོ་འབྱེད་འཕེལ་རྒྱས་གལ་ཆེན་བྱུང་བ།མི་དམངས་ཀྱི་འཚོ་བའི་ཆུ་ཚད་མངོན་གསལ་དོད་པོ་མཐོ་རུ་ཕྱིན་པ།དམངས་གཙོ་དང་ཁྲིམས་ལུགས་འཛུགས་སྐྱོང་བྱེད་པའི་གོམ་སྟབས་གསར་པ་སྤོས་པ།རིག་གནས་དར་རྒྱས་སྐས་རིམ་གསར་པར་འཛེགས་པ།སྤྱི་ཚོགས་ལེགས་སྐྱོང་སྔར་མེད་ཡར་རྒྱས་བྱུང་བ།རྒྱལ་སྲུང་དང་དམག་དཔུང་འཛུགས་སྐྲུན་གྱི་རྣམ་པ་གསར་པ་གཏོད་པ།ཀང་ཨའོ་ཐའེ་གསུམ་གྱི་ལས་དོན་སྒྲུབ་ཤུགས་སྔར་ལས་ཆེ་རུ་བཏང་བ།ཕྱི་འབྲེལ་ལས་དོན་ལ་གྲུབ་འབྲས་གསར་པ་ཐོབ་པ་བཅས་བྱུང་ཡོད།  ལོ་ལྔའི་རིང་ལ།ཏང་གི་སྲིད་སྐྱོང་ནུས་པ་ཆེ་རུ་གཏོང་བ་དང་སྔོན་ཐོན་རང་བཞིན་ལེགས་སྤེལ་ལ་མུ་མཐུད་དེ་སྐུལ་སྤེལ་བཏང་བ་དང་།བསམ་བློ་དང་རིགས་པའི་གཞུང་ལུགས་ལེགས་སྤེལ་ལ་གྲུབ་འབྲས་མངོན་གསལ་དོད་པོ་ཐོབ་ཅིང་།ཚན་རིག་གི་འཕེལ་རྒྱས་ལྟ་བ་སློབ་སྦྱོང་དང་ལག་བསྟར་བྱེད་པར་གྲུབ་འབྲས་མངོན་གསལ་ཐོབ་ལ།ཏང་ལེགས་སྐྱོང་དང་བསྒྱུར་བཅོས་སྒོ་འབྱེད་ཀྱི་གོམ་སྟབས་གསར་པ་གལ་ཆེན་སྤོས་པ་རེད།ཏང་ནང་གི་དམངས་གཙོ་སྔར་ལས་རྒྱ་སྐྱེད་བྱུང་ཡོད།ལས་བྱེད་པའི་དཔུང་ཁག་འཛུགས་སྐྱོང་འཕེལ་རྒྱས་གལ་ཆེན་བྱུང་བ་དང་།ཤེས་ལྡན་པའི་ལས་དོན་གྱི་རྣམ་པ་གསར་གཏོད་པ་རེད།སྔོན་ཐོན་དང་དཔེ་བཟང་བརྩོན་ལེན་གྱི་བྱེད་སྒོ་དང་སློབ་སྦྱོང་བྱེད་པའི་ཏང་རྩ་འཛུགས་ལེགས་སྐྱོང་གཏིང་ཟབ་བྱས་པ་དང་།གཞི་རིམ་ཏང་འཛུགས་ལ་རྒྱུན་ཆད་མེད་པར་ཤུགས་སྣོན་བརྒྱབ་པ་རེད།ཏང་སྲོལ་དང་སྲིད་དོན་གཙང་སྐྱོང་དང་རུལ་རྒོལ་གྱི་འཐབ་རྩོད་ལ་གྲུབ་འབྲས་གསར་པ་ཐོབ་པ་རེད།   ང་ཚོའི་ལས་ཀའི་ཁྲོད་དུ་མི་འདང་བ་མང་པོ་ཡོད་དང་།མདུན་སྐྱོད་ཀྱི་བགྲོད་ལམ་ཐོག་སྔར་བཞིན་དཀའ་ངལ་དང་གནད་དོན་མི་ཉུང་བ་ཡོད་པ་དུས་མཚུངས་སུ་ང་ཚོས་རིག་པ་དྭངས་གསལ་གྱིས་ཤེས་པར་བྱ་དགོས།འཕེལ་རྒྱས་གཏོང་རིམ་དུ་དོ་མི་མཉམ་པ་དང་།མཐུན་སྦྱོར་མེད་པ་།རྒྱུན་མཐུད་མི་ཐུབ་པ་བཅས་ཀྱི་གནད་དོན་སྔར་བཞིན་མངོན་གསལ་དོད་པ་དང་།ཚན་རིག་དང་མཐུན་པའི་འཕེལ་རྒྱས་གཏོང་བར་གནོད་པའི་སྒྲིག་སྲོལ་དང་ལམ་སྲོལ་འགོག་རྐྱེན་ཅུང་མང་བ་།གྲོང་ཁྱེར་དང་གྲོང་གསེབ་བར་ས་ཁོངས་འཕེལ་རྒྱས་ཀྱི་ཁྱད་པར་ཆེ་བ་དང་གྲོང་མིའི་ཡོང་འབབ་བགོ་བཤའ་ཁྱད་པར་སྔར་བཞིན་ཆེ་བ།གཞི་རིམ་ཏང་འཛུགས་ཁ་ཤས་ནུས་མེད་ཉམས་ཞན་ཡིན་པ།ཏང་ཡོན་ལས་བྱེད་པ་ཉུང་ཤས་ཀྱི་ཕུགས་འདུན་དད་སེམས་ལ་འགྱུར་བ་བྱུང་བ།དམིགས་ཡུལ་གྱི་འདུ་ཤེས་ཞན་པ།ཕྱི་ཚུལ་རིང་ལུགས་དང་།དཔོན་ཉམས་རིང་ལུགས་ཀྱི་གནད་དོན་མངོན་གསལ་དོད་པ།རྒྱས་སྤྲོས་ཆུད་ཟོས་ཀྱི་སྣང་ཚུལ་ཚབས་ཆེན་བ་བཅས་དང་།ཁྱབ་ཁོངས་ཁ་ཤས་སུ་སྒྱིད་ལུས་དང་རུལ་སུངས་སུ་གྱུར་བའི་སྣང་ཚུལ་ཐོན་སླ་བ་དང་ཐོན་མང་བས།རུལ་རྒོལ་འཐབ་རྩོད་ཀྱི་གནས་བབ་སྔར་བཞིན་དྲག་པོ་ཡིན་པ་བཅས་རེད།དཀའ་ངལ་དང་གནད་དོན་དེ་རིགས་ལ་ང་ཚོས་ངེས་པར་དུ་མཐོང་ཧ་ཅང་ཆེན་པོ་བྱས་ཏེ་ཐག་གཅོད་སྔར་ལས་ནན་པོར་བྱ་དགོས།  ལོ་བཅུའི་རིང་གི་ལས་ཀར་ཕྱོགས་སྡོམ་གནང་སྐབས།ཧུའུ་ཅིན་ཐའོ་ཡིས་གསུང་དོན།ང་ཚོས་རང་རྒྱལ་འཕེལ་རྒྱས་གཏོང་བའི་འཐབ་ཇུས་ཀྱི་གོ་སྐབས་བཟང་པོ་དམ་འཛིན་དང་བཀོལ་སྤྱོད་ཡག་པོར་བྱས་པས།འགྲན་སློང་གལ་ཆེན་རབ་དང་རིམ་པ་ལས་རྣམ་པར་རྒྱལ་ཏེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་སྟོབས་ཤུགས་ཆེར་སྐྱེད་ཀྱིས་འཕེལ་རྒྱས་ཀྱི་དུས་རིམ་གསར་པར་སྐུལ་སྤེལ་བཏང་བ་རེད།
ཁོང་གིས་གསུང་དོན།ལོ་བཅུའི་རིང་ལ་ང་ཚོར་ལོ་རྒྱུས་ཀྱི་རང་བཞིན་ལྡན་པའི་གྲུབ་འབྲས་རབ་དང་རིམ་པ་ཐོབ་སྟེ་འབྱོར་འབྲིང་གི་སྤྱི་ཚོགས་ཁྱོན་ཡོངས་ནས་འཛུགས་སྐྲུན་བྱེད་པར་རྨང་གཞི་བརྟན་པོ་བཏིང་བས།རྒྱལ་ཁབ་ཀྱི་རྣམ་པར་ལོ་རྒྱུས་ཀྱི་རང་བཞིན་ལྡན་པའི་འགྱུར་ལྡོག་གསར་པ་བྱུང་བ་རེད།
ལོ་བཅུའི་རིང་གི་འབད་འཐབ་བྱེད་རིམ་ཕྱོགས་སྡོམ་བྱེད་དུས་གལ་ཆེ་ཤོས་ནི་ང་ཚོས་མར་ཁེ་སི་ལེ་ཉིན་རིང་ལུགས་དང་།མའོ་ཙེ་ཏུང་གི་དགོངས་པ།ཏེང་ཞའོ་ཕིན་གྱི་རིགས་པའི་གཞུང་ལུགས།“མཚོན་བྱེད་གསུམ་”གྱི་དགོངས་པ་གལ་ཆེན་བཅས་སློབ་སྟོན་དུ་འཛིན་རྒྱུ་རྒྱུན་འཁྱོངས་བྱས་ནས་ལག་ལེན་གྱི་རྨང་གཞིའི་ཐོག་གཞུང་ལུགས་གསར་གཏོད་བྱ་རྒྱུར་སྐུལ་འདེད་གཏོང་ཕོད་པ་དང་།ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་རྒྱུར་དམིགས་ཏེ་ཕན་ཚུན་ཟུང་འབྲེལ་དམ་པོ་དང་ཕན་ཚུན་འབྲེལ་མཐུད་བྱེད་པའི་བསམ་བློ་གསར་པ་དང་།ལྟ་བ་གསར་པ།ཆོད་གཏམ་གསར་པ་བཅས་རབ་དང་རིམ་པ་བཏོན་ནས་ཚན་རིག་དང་མཐུན་པའི་འཕེལ་རྒྱས་ལྟ་བར་གྲུབ་པ་དང་ལག་ལེན་མཐར་ཕྱིན་བསྟར་བ་དེ་རེད།ཚན་རིག་དང་མཐུན་པའི་འཕེལ་རྒྱས་ལྟ་བ་ནི་མར་ཁེ་སི་རིང་ལུགས་དེ་དེང་རབས་ཀྱི་ཀྲུང་གོའི་དོན་དངོས་དང་དུས་རབས་ཀྱི་ཁྱད་ཆོས་དང་ཕན་ཚུན་ཟུང་འབྲེལ་བྱས་པའི་ཐོན་དངོས་ཡིན་པ་དང་།འཕེལ་རྒྱས་སྐོར་གྱི་མར་ཁེ་སི་རིང་ལུགས་ཀྱི་འཇིག་རྟེན་ལྟ་བ་དང་བརྟག་ཐབས་སྨྲ་བ་གཅིག་བསྡུས་ཀྱིས་མཚོན་པ་ཞིག་ཡིན་ཞིང་།གནས་བབ་གསར་པའི་འོག་འཕེལ་རྒྱས་ཇི་འདྲ་ཞིག་ཡོང་བར་བྱ་རྒྱུ་དང་འཕེལ་རྒྱས་ཇི་ལྟར་གཏོང་རྒྱུ་སོགས་ཀྱི་གནད་དོན་གལ་ཆེ་རིགས་ལ་ཚན་རིག་ཐོག་ནས་ལན་གསར་པ་བརྒྱབ་ཡོད་པས།ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆོས་ཉིད་ཐད་ཀྱི་ང་ཚོའི་ངོས་འཛིན་ཆུ་ཚད་གསར་པ་ཞིག་ཏུ་མཐོ་རུ་བཏང་བ་དང་།དེང་རབས་ཀྱི་ཀྲུང་གོའི་མར་ཁེ་སི་རིང་ལུགས་འཕེལ་རྒྱས་གཏོང་བའི་བསམ་ཕྱོགས་གསར་པ་ཞིག་བཏོད་ཡོད།ཚན་རིག་དང་མཐུན་པའི་འཕེལ་རྒྱས་ལྟ་བ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིགས་པའི་གཞུང་ལུགས་མ་ལག་གི་གྲུབ་འབྲས་གསར་རྐྱང་ཞིག་དང་ཀྲུང་གོའི་གུང་ཁྲན་ཏང་གི་ཐུན་མོང་བློ་རིག་གི་ཉིང་བཅུད།ཏང་དང་རྒྱལ་ཁབ་ཀྱི་ལས་དོན་ཡོངས་ལ་སློབ་སྟོན་བྱེད་པའི་བསམ་བློའི་དྲག་ཆས་སྟོབས་ལྡན་བཅས་ཡིན།ཚན་རིག་དང་མཐུན་པའི་འཕེལ་རྒྱས་ལྟ་བ་འདི་མར་ཁེ་སི་ལེ་ཉིན་རིང་ལུགས་དང་།མའོ་ཙེ་ཏུང་གི་དགོངས་པ།ཏེང་ཞའོ་ཕིན་གྱི་རིགས་པའི་གཞུང་ལུགས།“མཚོན་བྱེད་གསུམ་”གྱི་དགོངས་དོན་གལ་ཆེན་བཅས་པ་ལྷན་གཅིག་ཏུ་ཏང་གིས་དུས་ཡུན་རིང་པོར་ངེས་པར་དུ་རྒྱུན་འཁྱོངས་བྱ་དགོས་པའི་སློབ་སྟོན་བསམ་བློ་རེད།
འབྱུང་འགྱུར་ལ་ཁ་གཏད་ཚེ།ཚན་རིག་དང་མཐུན་པའི་འཕེལ་རྒྱས་ལྟ་བ་ལག་བསྟར་དང་དོན་འཁྱོལ་གཏིང་ཟབ་བྱ་རྒྱུ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བར་འཕྲལ་ཕུགས་གཉིས་ཀའི་ལོ་རྒྱུས་ཀྱི་དོན་སྙིང་ཟབ་མོ་གལ་ཆེན་ལྡན་པས་ཚན་རིག་དང་མཐུན་པའི་འཕེལ་རྒྱས་ལྟ་བ་འདི་རང་རྒྱལ་དེང་རབས་ཅན་དུ་འགྱུར་བའི་འཛུགས་སྐྲུན་བྱེད་རིམ་ཡོངས་ལ་ངེས་པར་དུ་ལག་བསྟར་མཐར་ཕྱིན་བྱེད་ཅིང་ཏང་ལེགས་སྐྱོང་བྱེད་ཕྱོགས་ཡོངས་སུ་མཚོན་པར་བྱ་དགོས།ཏང་ཡོངས་ཀྱིས་ངེས་པར་དུ་རང་རྟོགས་ཀྱི་སྒོ་ནས་དཔལ་འབྱོར་དང་སྤྱི་ཚོགས་གོང་འཕེལ་གཏོང་རྒྱུ་དེ་ཚན་རིག་དང་མཐུན་པའི་འཕེལ་རྒྱས་ལྟ་བ་ལག་བསྟར་དང་དོན་འཁྱོལ་གཏིང་ཟབ་བྱེད་པའི་དོན་གནད་དང་པོར་བརྩིས་ཏེ་སྔར་ལས་རང་རྟོགས་ཀྱི་སྒོ་ནས་མི་གཙོ་བོར་འཛིན་རྒྱུ་དེ་ཚན་རིག་དང་མཐུན་པའི་འཕེལ་རྒྱས་ལྟ་བ་ལག་བསྟར་དང་དོན་འཁྱོལ་གཏིང་ཟབ་བྱེད་པའི་ལྟེ་བའི་ལངས་ཕྱོགས་སུ་བཟུང་སྟེ།སྔར་ལས་རང་རྟོགས་ཀྱི་སྒོ་ནས་ཕྱོགས་ཡོངས་ནས་མཐུན་སྦྱོར་དང་རྒྱུན་མཐུད་པར་འཕེལ་རྒྱས་ཡོང་བར་བྱ་རྒྱུ་དེ་ཚན་རིག་དང་མཐུན་པའི་འཕེལ་རྒྱས་ལྟ་བ་ལག་བསྟར་དང་དོན་འཁྱོལ་གཏིང་ཟབ་བྱེད་པའི་གཞི་རྩའི་བླང་བྱར་བརྩིས་ཏེ་སྔར་ལས་རང་རྟོགས་ཀྱི་སྒོ་ནས་གཅིག་གྱུར་འཆར་འགོད་དང་ཕྱོགས་ཡོངས་ལ་ལྟ་རྟོག་བྱ་རྒྱུ་དེ་ཚན་རིག་དང་མཐུན་པའི་འཕེལ་རྒྱས་ལྟ་བ་ལག་བསྟར་དང་དོན་འཁྱོལ་གཏིང་ཟབ་བྱེད་པའི་རྩ་བའི་ཐབས་ཤེས་ཤིག་ཏུ་བརྩིས་དགོས།  ཧུའུ་ཅིན་ཐའོ་ཡིས་ནན་གསུང་གནང་དོན།བསམ་བློ་བཅིངས་འགྲོལ་དང་།དངོས་ཐོག་བདེན་འཚོལ།དུས་བསྟུན་མདུན་སྐྱོད་།བདེན་འཚོལ་དོན་གཉེར་བཅས་བྱ་རྒྱུ་ནི་ཚན་རིག་དང་མཐུན་པའི་འཕེལ་རྒྱས་ལྟ་བའི་དགོངས་དོན་གྱི་ངོ་བོ་མངོན་པར་གསལ་བ་ཞིག་ཡིན།ལག་ལེན་དངོས་ཀྱི་འཕེལ་རྒྱས་དང་།བདེན་དོན་ངོས་འཛིན།གཞུང་ལུགས་གསར་གཏོད་བཅས་བྱ་རྒྱུ་ནི་རྫོགས་མཐའ་གཏན་ནས་མེད་པ་ཞིག་ཡིན་པས།ཏང་ཡོངས་ཀྱིས་ངེས་པར་དུ་ལག་ལེན་བྱེད་ཕོད་པ་དང་འཕོ་འགྱུར་བྱེད་ཕོད་པ།གསར་གཏོད་ཡོད་པ་བཅས་བྱ་དགོས་པ་དང་།དུས་རབས་ཀྱི་འཕེལ་རྒྱས་བླང་བྱ་ཁོང་དུ་ཆུད་པ་དང་མི་དམངས་ཐུན་མོང་གི་རེ་འདོད་དང་མཐུན་པ་བྱེད་པ།ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆོས་ཉིད་རྒྱུན་འཁྱོངས་ལྷོད་མེད་ཀྱིས་འཚོལ་ཞིབ་དང་ཁོང་དུ་ཆུད་པར་བྱེད་པ་།ཏང་སྐྱེ་སྟོབས་དཔལ་འབར་དང་རྒྱལ་ཁབ་གོང་སྤེལ་གྱི་སྒུལ་ཤུགས་ནམ་ཡང་སྲུང་འཛིན་བྱས་ཏེ་ཏང་དང་མི་དམངས་ཀྱིས་གསར་སྐྲུན་རང་བཞིན་ལྡན་པའི་ལག་ལེན་ཁྲོད་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་འཕེལ་རྒྱས་གཏོང་བའི་མདུན་ལྗོངས་སྔར་ལས་ཡངས་ཤིང་རྒྱ་ཆེ་བ་སྟོབས་ཤུགས་གང་ཡོད་བཏོན་ནས་གསར་གཏོད་བྱ་དགོས།