ཉེ་ལམ། སྦྲ་ནག་རིག་གནས་སྒྱུ་རྩལ་ཚོགས་པས་སློབ་རིན་མི་དགོས་པའི་བོད་ཀྱི་ཆེས་ཐོག་མའི་གློག་བརྙན་ཟབ་སྦྱོང་འཛིན་གྲྭ་ཞིག་བསྒྲུབས་ཤིང་གློག་བརྙན་སྒྱུ་རྩལ་ལ་སྤྲོ་བ་ཆེ་བའི་མདོ་དབུས་ཁམས་གསུམ་གྱི་སློབ་མ་བཅུ་ཙམ་འདུས་པ་རེད།
        འདིར་ཆེད་དུ་བོད་ཀྱི་གསར་བྱུང་ན་གཞོན་འཁྲབ་ཁྲིད་པ་དགྲ་འདུལ་ལགས་ཀྱིས་གློག་བརྙན་གྱི་རྨང་གཞིའི་ཤེས་བྱ་སྟེ། བརྙན་ལེན་དང་སྒྲིག་སྦྱོར། འཁྲབ་གཞུང་འབྲི་སྦྱང་དང་འཛམ་གླིང་གི་གློག་བརྙན་གྱི་ཁ་ཕྱོགས་སོགས་ཀྱི་སློབ་ཁྲིད་བྱས་ཞིང་། བོད་ཀྱི་འཁྲབ་ཁྲིད་པ་དང་བརྙན་ལེན་པ་གྲགས་ཅན་ཟོན་ཐར་རྒྱལ་ལགས་ཀྱང་ཐེངས་འདིའི་ཟབ་སྦྱོང་སྟེང་དངོས་སུ་ཕེབས་དེ་སྤྲོ་དགའ་ཆེན་པོས་ངང་གློག་བརྙན་ཕྱོགས་ཀྱི་གསུང་གླེང་མང་པོ་གནང་ལ། གློག་བརྙན་ཆེད་ལས་འཁྲབ་ཁྲིད་པ་དང་། བརྙན་ལེན་པ། སྒྲིག་སྦྱོར་བ། འཁྲབ་གཞུང་རྩོམ་པ་པོ་སོགས་གདན་འདྲེན་བྱས་ཏེ་སློབ་ཁྲིད་བྱེད་རྒྱུའི་འཆར་གཞི་ཡོད་ལ། མཚོ་སྔོན་བོད་སྐད་བརྙན་འཕྲིན་ཁང་གིས་ཐེངས་འདིའི་ཟབ་སྦྱོང་འཛིན་གྲྭའི་གྲུབ་འབྲས་བཟང་པོར་གཟེངས་བསྟོད་བླ་མེད་བྱས་ཞིང་རྨ་འབྲིའི་རླབས་ཀྱི་ཟེགས་མའི་ལེ་ཚན་དུ་བཀོད་པ་དང་། ཆེད་དུ་དགྲ་འདུལ་ལགས་ཀྱིMVཡི་བརྩམས་ཆོས་གཉིས་བཅས་འགྲེམ་སྟོན་བྱེད་ཀྱིན་ཡོད། ཟབ་སྦྱོང་འཛིན་གྲྭའི་སློབ་སྦྱོང་བྱེད་པའི་གནས་ཚུལ་དང་དགྲ་འདུལ་ལགས་ཀྱི་བརྩམས་ཆོས་དངོས་སུ་གཏོང་མགོ་བརྩམས་ཞིང་ཉིན་བཞིའི་རྨ་འབྲིའི་རླབས་ཀྱི་ཟེགས་མའིི་ལེན་ཚན་དུ་བཀོད་ཡོད།

        སློབ་རིན་མེད་པའི་གློག་བརྙན་ཟབ་སྦྱོང་འཛིན་གྲྭ་འདི་ལོ་རེར་མུ་མཐུད་དུ་བསྒྲུབ་རྩིས་ཆེ་མོད་བརྙན་ཆས་དང་གློག་ཀླད་སོགས་ཉེར་མཁོའི་ཡོ་བྱད་ཀྱི་དཀའ་ངལ་ཅུང་ཡོད་པས་འདི་ལ་ལྷག་བསམ་གཙང་མའི་རྒྱབ་སྐྱོར་གནང་མཁན་ཡོད་ན་ལྷག་བསམ་རྣམ་དག་གིས་ཐུགས་རྗེ་ཆེ་ཞུ་ངེས་ཡིན།