ད་ལོའི་སྟོན་དུས་སློབ་འགོ་བཙུགས་པ་ནས་བཟུང་། ཀན་སུའུ་ཞིང་ཆེན་གྱི་ཡུག་གཅིག་ཏུ་འབྲེལ་བའི་ཆེས་དབུལ་ཕོངས་རྫོང58ཀྱི་འོས་འགན་སློབ་གསོ་དུས་རིམ་གྱི་ཞིང་སྡེའི་སློབ་གྲྭ་ཆུང་འབྲིང་གི་སློབ་མ་ཁྲི231ཡིས་སྲིད་གཞུང་གིས་མཁོ་སྤྲོད་བྱས་པའི་འཚོ་བཅུད་བཟའ་བཅའ་ཟ་རྒྱུ་ལོན་པ་རེད། ཞག་སྡོད་ལམ་ལུགས་ཀྱི་སློབ་གྲྭའི་སློབ་ཆུང་སློབ་མ་རེ་ལ་ཉིན་རེར་བཟའ་ཐེངས་གསུམ་ལ་འཚོ་བཅུད་བཟའ་བཅའི་ཁ་གསབ་རོགས་དངུལ་སྒོར6གིས་ཚད་གཞི་བྱས་པ་དང་། དམའ་རིམ་སློབ་འབྲིང་གི་སློབ་མ་རེར་ཉིན་རེར་བཟའ་ཐེངས་གསུམ་ལ་སྒོར7གྱིས་ཚད་གཞི་བྱས་པ་རེད།

2012ལོའི་སྟོན་དུས་ཀྱི་སློབ་འགོ་བཙུགས་རྗེས། ཞིང་སྡེའི་སློབ་མ་དེ་བས་མང་པོས་སློབ་གྲྭར་འཚོ་བཅུད་བཟའ་བཅའ་ལ་རྒྱུ་ལོན་པ་དང་། ཞིང་སྡེའི་སློབ་མའི་གཟུགས་གཞི་བདེ་ཐང་གི་ཆུ་ཚད་མཐོ་རུ་གཏོང་བར་ཁག་ཐེག་བྱེད་ཆེད།  ནོར་སྲིད་པུའུ་དང་སློབ་གསོ་པུའུ་གཉིས་ཀྱིས་མཉམ་འབྲེལ་བྱས་ནས《ཞིང་སྡེའི་འོས་འགན་སློབ་གསོའི་དུས་རིམ་གྱི་སློབ་མར་འཚོ་བཅུད་ལེགས་བཅོས་འཆར་གཞིའི་ཆེད་སྤྱོད་མ་དངུལ་དོ་དམ་བྱ་རྒྱུའི་གནས་སྐབས་ཀྱི་བྱེད་ཐབས》ཁྱབ་བསྒྲགས་བྱས་ཤིང་། མ་དངུལ་བཀོད་སྒྲིག་དང་གཏོང་སྤྲོད། བེད་སྤྱོད། ལྟ་སྐུལ་དོ་དམ་བཅས་ཕྱོགས་བཞིའི་ཐད་ནས་ཞིང་སྡེའི་འོས་འགན་སློབ་གསོའི་དུས་རིམ་གྱི་སློབ་མར་འཚོ་བཅུད་ལེགས་བཅོས་འཆར་གཞིའི་ཆེད་སྤྱོད་མ་དངུལ་དོ་དམ་བྱ་རྒྱུར་ཚད་ལྡན་བྱས་པ་རེད།