ཟླ་བ9པའི་ཚེས21ཉིན་གྱི་ཕྱི་དྲོར།རང་ཁུལ་གྱི་སྐབས་བཅུ་དྲུག་པའི་ཆོས་ལུགས་མི་སྣའི་གསོ་སྦྱོང་འཛིན་གྲྭའི་ཐོག་ལ་ཁུལ་ཨུའི་ཧུའུ་ཅི་ཧུའུ་ཁྲང་ཧྲེང་གིས་ཆེད་དོན་འཆད་ཁྲིད་གནང་བ་རེད།ཧུའུ་ཁྲང་ཧྲེང་གིས་ཐོག་མར་ཆོས་ལུགས་ལ་ལྟ་ཚུལ་གང་ཞིག་འཛིན་གྱི་ཡོད་པའི་སྐོར་ངོ་སྤྲོད་གནང་བ་རེད།ཧུའུ་ཁྲང་ཧྲེང་གིས་གསུངས་རྒྱུར།མི་སུ་དང་སུ་ཡིན་རུང་ཆོས་ལུགས་དེ་དགྲ་བོར་བརྩིས་པ་ཡིན་ན་དེ་ནི་རྨོངས་པ་དང་ཤེས་རྒྱ་ཆུང་བས་མ་ཚད་ཕྱོགས་ལྷུང་གི་ནོར་འཁྲུལ་ཚབས་ཆེན་ཡིན་པ་རེད།ཆོས་ལུགས་དེ་གྲོགས་པོ་དང་མེ་ལོང་ལྟ་བུར་རྩི་བ་ཡིན་ན་དེ་ནི་ཕན་ཐོགས་ཡོད་ཅིང་ཡར་ཐོན་ལ་ཕན་པ་རེད།རང་ཁུལ་གྱི་རྒྱལ་གཅེས་ཆོས་ལུགས་མི་སྣས་ཁུལ་ཡོངས་ཀྱི་བརྟན་བརླིང་སྲུང་སྐྱོང་དང་། འཕེལ་རྒྱས་ལ་སྐུལ་སྤེལ། དམངས་འཚོ་ལེགས་བཅོས།འཆམ་མཐུན་ལ་སྐུལ་འདེད་བཅས་ཀྱི་ཐད་ལ་བཞག་པའི་བྱས་རྗེས་སྐོར་གླེང་སྐབས།ཁོང་གིས་གསུངས་རྒྱུར།རྒྱལ་གཅེས་ཆོས་ལུགས་མི་སྣ་ནི་རང་ཁུལ་འཕེལ་རྒྱས་དང་བརྟན་བརླིང་གི་སྟོབས་ཤུགས་གལ་ཆེན་ཞིག་ཡིན་པ་རེད།ཉེ་བའི་ལོ་ཤས་རིང་ལ།ཁུལ་ཡོངས་ཀྱི་རྒྱ་ཆེ་བའི་རྒྱལ་གཅེས་ཆོས་ལུགས་མི་སྣས་སྣེ་ཁྲིད་ནས་བཅའ་ཁྲིམས་ཀྱི་གཟི་རྔམ་སྲུང་སྐྱོང་དང་། མི་དམངས་ཀྱི་ཁེ་ཕན་སྲུང་སྐྱོང་། མི་རིགས་མཐུན་སྒྲིལ་སྲུང་སྐྱོང་། མེས་རྒྱལ་གཅིག་གྱུར་སྲུང་སྐྱོང་བཅས་བྱས་ནས་རང་རྟོགས་ཀྱིས་ཏང་གི་ཆོས་ལུགས་སྲིད་ཇུས་དྲིལ་བསྒྲགས་དོན་འཁྱོལ་ཧུར་ཐག་བྱས་པ་དང།རང་རྟོགས་ཀྱིས་ཏང་ཨུ་དང་སྲིད་གཞུང་ལ་གཞོགས་འདེགས་བྱས་ནས་བྱ་སྤྱོད་དངོས་ཀྱི་ཐོག་ནས་རྒྱལ་གཅེས་ཁྲིམས་སྲུང་གི་གཟི་བརྗིད་ལྡན་པའི་སྲོལ་རྒྱུན་ལག་ལེན་དངོས་སུ་བསྟར་བ་རེད།དངོས་ཡོད་གནས་ཚུལ་གྱིས་ར་སྤྲོད་བྱས་པར་ལྟར་ན།ཁུལ་ཡོངས་ཀྱི་གྲྭ་བཙུན་ཕལ་ཆེར་ནི་ཏང་དང་སྲིད་གཞུང་གིས་ཡིད་རྟོན་བྱེད་ས་དང་རྒྱབ་རྟེན་བྱེད་དུ་རུང་བའི་གཞི་རྩའི་སྟོབས་ཤུགས་ཤིག་ཡིན་ལ།རྒྱ་ཆེ་བའི་སྐྱེས་ཆེན་དམ་པ་རྣམས་ནི་ཁ་བྲལ་ལ་ངོ་རྒོལ་དང་བརྟན་བརླིང་ལ་སྲུང་སྐྱོང་བྱེད་པའི་སྟོབས་ཤུགས་གལ་ཆེན་ཞིག་ཀྱང་ཡིན་པ་རེད།རང་ཁུལ་གྱི་འབྱུང་འགྱུར་འཕེལ་རྒྱས་ཀྱི་དམིགས་ས་གཏན་འཁེལ་དང་འཕེལ་རྒྱས་དམིགས་ཡུལ་ངོ་སྤྲོད་གནང་སྐབས།ཧུའུ་ཁྲང་ཧྲེང་གིས་གསུངས་རྒྱུར།རང་ཁུལ་གྱིས་མཛེས་སྡུག་སྐྱེ་ཁམས་ལྡན་པ་དང་འཆམ་མཐུན་བདེ་སྐྱིད་ལྡན་པའི་དཀར་མཛེས་ཁུལ་གསར་པ་ཞིག་བསྐྲུན་རྒྱུ་དེ་འཐབ་ཇུས་ཀྱི་དམིགས་ས་གཏན་འཁེལ་བྱས་ཤིང་།འཕེལ་རྒྱས་ཀྱི་རྨང་གཞི་མཐོར་འདེགས་ཤུགས་ཆེན་བཏང་ཞིང་།སྐྱེ་ཁམས་ཀྱིས་ཁུལ་འཛུགས་པ་དང་།ཐོན་ལས་ཀྱིས་ཁུལ་སྤེལ་བ།ཚན་སློབ་ཀྱིས་ཁུལ་དར་བ།བཅའ་ཁྲིམས་ལྟར་ཁུལ་སྐྱོང་བ།བྱམས་ལྡན་གྱིས་ཁུལ་བརྟན་པ་བཅས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྤྱིའི་འཐབ་ཇུས་ལག་བསྟར་བྱེད་ཤུགས་ཆེ་རུ་གཏོང་དགོས།འདི་ལྟ་བུའི་འཐབ་ཇུས་ཀྱི་དམིགས་ས་དང་སྤྱི་ཁྱབ་འཐབ་ཇུས་མངོན་འགྱུར་ཡོང་ཆེད་ང་ཚོས་ཡུལ་སྐོར་ལྗོངས་རྒྱུ་ཁྱོན་ཡོངས་ཅན་དང་།གྲོང་རྡལ་དཔེ་གསར་ཅན།ཞིང་འབྲོག་ལས་དེང་རབས་ཅན་བཅས་གསུམ་ཅན་མཉམ་སྤེལ་གྱི་འཕེལ་རྒྱས་ཐབས་ལམ་བཏོན་ཡོད། 2016ལོར་སླེབས་ཚེ། ང་ཚོས་ལྡབ་འཕར་བཞི་དང་མཆོང་རྒལ་ལྔ་མངོན་འགྱུར་བྱ་རྒྱུ་ཡིན་པ་རེད།ཁོང་གིས་ད་དུང་ར་རྔ་ཁ་ནས་དཀར་མཛེས་དང་། སེར་ཤུལ་བར་གྱི་གློག་དྲ་སྦྲེལ་བའི་ཨར་ལས་དང་། ལྕགས་ལམ།མྱུར་བགྲོད་གཞུང་ལམ།གནམ་གྲུ་ཐང་བཅས་ཀྱི་འཛུགས་སྐྲུན་བྱེད་པའི་སྐོར་དང་མཐོ་སྒང་གི་ཁྱད་ཆོས་ལྡན་པའི་གྲོང་རྡལ་འཛུགས་སྐྲུན་བྱ་རྒྱུའི་གནས་ཚུལ་ངོ་སྤྲོད་གནང་བས་མ་ཚད།ཁུལ་ཡོངས་ཀྱི་ནུས་ཤུགས་བཏོན་ནས་མང་ཚོགས་ལས་ཀ་ཡོངས་སུ་ཁྱབ་པའི་ལས་དོན་ངོ་སྤྲོད་གནང་བ་རེད།
    ཧུའུ་ཁྲང་ཧྲེང་གིས་སྤྱི་ཚོགས་འཕེལ་རྒྱས་དང་མཐུན་དགོས་པ་ནི་ཆོས་ལུགས་འཕེལ་རྒྱས་ཁྲོད་དུ་ངེས་པར་དུ་སྲུང་དགོས་པའི་ཆོས་ཉིད་ཅིག་ཡིན་ལ།སྤྱི་ཚོགས་འཕེལ་རྒྱས་དང་མཐུན་དགོས་པ་ནི་བོད་བརྒྱུད་ནང་བསྟན་ཆོས་ལུགས་རང་ངོས་འཕེལ་རྒྱས་ཀྱི་དགོས་མཁོ་ཡང་ཡིན་པ་རེད།ཆོས་ལུགས་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཕྲོད་པ་བྱ་རྒྱུ་ནི་དུས་རབས་ཀྱི་བླང་བྱ་ཡིན་པ་བཅས་ཀྱི་ཐད་ནས་ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་མཐུན་པོར་ཡོང་དགོས་པར་འགྲེལ་བཤད་གནང་བ་རེད།ཁོང་གིས་གསུངས་རྒྱུར།ཆོས་ལུགས་ནི་སྤྱི་ཚོགས་འཕེལ་རྒྱས་ཀྱི་འགྱུར་བཀོད་དང་མཐུན་པར་རིམ་པར་འགྱུར་ལྡོག་འགྲོ་བ་ནི་ལོ་རྒྱུས་འཕེལ་རྒྱས་ཀྱི་དངོས་ཡོད་ཆོས་ཉིད་ཅིག་རེད།ཆོས་ལུགས་དེ་སྤྱི་ཚོགས་འཕེལ་རྒྱས་དང་མཐུན་པོར་ཡོང་དགོས་ཀྱི་རེད་མ་གཏོགས་རང་ཉིད་ཀྱི་འཕེལ་རྒྱས་ལ་སྐུལ་སྤེལ་ཡོང་ཐུབ་ཀྱི་མ་རེད།ཧུའུ་ཁྲང་ཧྲེང་གིས་འགྲེལ་བཤད་ཀྱི་ནང་དུ་ཝུའུ་རྒྱལ་རབས་དང་ཅིན་རྒྱལ་རབས།རྒྱལ་རབས་ལྷོ་མ་དང་བྱང་མའི་དུས་སུ་ཀྲུང་གོའི་ནང་བསྟན་ཧ་ཅང་དར་རྒྱས་མགྱོགས་པ་དང་།ཐང་རྒྱལ་རབས་ཀྱི་དུས་འགོར་མཱ་ཙུའུ་སྒོམ་ཆེན་དང་དེའི་སློབ་མ་པའེ་ཀྲང་སྒོམ་ཆེན་བཅས་ཀྱིས་ཀྲུང་གོར་བརྒྱུད་པའི་རྒྱ་གར་གྱི་གདོད་མའི་ནང་པའི་ཆོས་ལ་ཀྲུང་གོའི་སྤྱི་ཚོགས་དང་མཐུན་པའི་བཅོས་བསྒྱུར་བྱས་ཡོད་ཚུལ་ལུང་འདྲེན་གནང་བ་དང་། བོད་བརྒྱུད་ནང་བསྟན་ཆོས་ལུགས་དེ་སྲོང་བཙན་སྒམ་པོ་ནས་སློབ་དཔོན་པད་མ་འབྱུང་གནས།གླང་དར་མ་ནས་ཙོང་ཁ་པའི་བར་བརྒྱུད་པའི་དུས་རིམ་ནང་དུ་བཅོས་བསྒྱུར་དང་འཕེལ་རྒྱས་སྣ་ཚོགས་བྱུང་ཡོད་པའི་སྐོར་གྱི་དཔེ་དོན་དྲངས་ནས་འགྲེལ་བཤད་གནང་བ་རེད། ཁོང་གིས་གསུངས་དོན།བོད་བརྒྱུད་ནང་བསྟན་ཆོས་ལུགས་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཕྲོད་པ་བྱེད་དགོས་ན།ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་འབངས་ཡིན་པའི་ཆོས་ལུགས་མི་སྣས་ངེས་པར་དུ་མེས་རྒྱལ་ལ་དགའ་ཞེན་དང་།ངེས་པར་དུ་ཀྲུང་གོ་གུང་ཁྲན་ཏང་གི་དབུ་ཁྲིད་ལ་བརྩི་སྲུང་།ངེས་པར་དུ་སྤྱི་ཚོགས་རིང་ལུགས་ཀྱི་ལམ་ལུགས་ལ་བརྩི་སྲུང་བྱེད་དགོས་པ་རེད།འདི་ནི་ཕན་ཚུན་མཐུན་པོར་ཡོང་བའི་ཆབ་སྲིད་ཀྱི་རྨང་གཞི་ཡིན།ང་ཚོའི་རྒྱལ་ཁབ་ནང་དུ་མི་སུ་ཞིག་དང་ཚོགས་པ་གང་ཞིག་ཆོས་ལུགས་གང་ཡང་རུང་བ་གཏོགས་པའི་ཚང་མས་རྒྱལ་ཁབ་བཅའ་ཁྲིམས་ཀྱི་གཟི་རྔམ་ལ་སྲུང་སྐྱོང་དང་།མི་དམངས་ཀྱི་ཁེ་དབང་ལ་སྲུང་སྐྱོང་།མི་རིགས་མཐུན་སྒྲིལ་ལ་སྲུང་སྐྱོང་།མེས་རྒྱལ་གཅིག་གྱུར་ལ་སྲུང་སྐྱོང་བཅས་བྱེད་དགོས་ངེས་རེད།སྲུང་སྐྱོང་བྱ་རྒྱུ་རིགས་བཞི་པོ་འདི་ནི་ཆོས་ལུགས་དེ་སྤྱི་ཚོགས་རིང་ལུགས་སྤྱི་ཚོགས་དང་འཕྲོད་པ་བྱེད་ཡས་ཀྱི་གཞི་རྩའི་ཚད་གཞི་ཡིན་པས་མ་ཚད།ང་ཚོས་ངེས་པར་དུ་སེམས་ལ་བརྟན་པོ་ངེས་དགོས་པའི་ཆབ་སྲིད་ཀྱི་ཁ་ཕྱོགས་ཀྱི་ཡིན་པ་རེད། རྒྱལ་གཅེས་ཁྲིམས་སྲུང་བྱེད་དགོས་ཀྱི་རེད། ཆོས་དད་བྱེད་མཁན་ཡིན་ནའང་འདྲ། ཆོས་དད་པ་མི་བྱེད་མཁན་ཡིན་ནའང་འདྲ།མི་སུ་ཞིག་ཡིན་ཡང་ངེས་པར་དུ་བཅའ་ཁྲིམས་ལྟར་སྤྱི་འབངས་ཀྱི་འོས་འགན་སྒྲུབ་དགོས་པ་ལས་རྩ་ཁྲིམས་དང་བཅའ་ཁྲིམས་ལས་བརྒལ་ནས་དམིགས་བསལ་གྱི་དབང་ཆ་ལོངས་སུ་སྤྱོད་རྒྱུ་མེད་ཅིང་།ཁ་གཡར་ས་གང་ཡང་རུང་བ་ལ་བརྟེན་ནས་ཀྲུང་གོ་གུང་ཁྲན་ཏང་གི་དབུ་ཁྲིད་དང་སྤྱི་ཚོགས་རིང་ལུགས་ཀྱི་ལམ་ལུགས་ལ་ངོ་རྒོལ་དང་།རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་མི་ཆོགམཐུན་སྒྲིལ་ཡར་ཐོན་བྱེད་དགོས་ཀྱི་རེད།ཆོས་ལུགས་ཁག་དང་གྲུབ་མཐའ་ཁག་གི་བར་དུ་ཕན་ཚུན་བརྩི་བཀུར་དང་།འཆམ་མཐུན་མཉམ་གནས།མཐུན་སྒྲིལ་རོགས་རམ་བཅས་བྱེད་དགོས།  ཁོང་གིས་ད་དུང་རང་ཉིད་ཀྱི་འཛམ་གླིང་ཆོས་ལུགས་ཀྱི་འཕེལ་ཕྱོགས་སྐོར་གྱི་གཟིགས་སྟངས་ངོ་སྤྲོད་གནང་ཞིང་། ཆོས་ལུགས་དེ་འཇིག་རྟེན་ཅན་གྱི་ཕྱོགས་སུ་འགྲོ་དགོས་པ་དང་། དེང་རབས་ཅན་གྱི་ཕྱོགས་སུ་འགྲོ་བ།འཆམ་མཐུན་ཅན་གྱི་ཕྱོགས་སུ་འགྲོ་བ་སོགས་ཀྱི་ལྟ་བ་བཏོན་ནས་གསོ་སྦྱོང་སློབ་མ་རྣམས་ལ་བསམ་འཆར་སྤེལ་རེས་གནང་རེད།ཧུའུ་ཁྲང་ཧྲེང་གིས་དགོན་པའི་གྲྭ་བཙུན་ཚོས་རང་འགུལ་གྱིས་སྲིད་གཞུང་གིས་བཅའ་ཁྲིམས་ལྟར་དོ་དམ་བྱེད་པར་དང་ལེན་ཞུས་དགོས་པ་དང་།ང་ཚོས་ངེས་པར་དུ་དོ་དམ་གྱི་བྱ་ཡུལ་ནི་བྱ་སྤྱོད་ཡིན་པ་ལས་དད་པ་མ་ཡིན་ལ།དད་པ་ནི་མི་སྒེར་གྱི་བསམ་པའི་ངོས་ཀྱི་བྱ་ཡུལ་ཡིན་ཞིང་རང་དབང་བ་ཡིན་ལ།བྱ་སྤྱོད་ཀྱིས་མི་གཞན་དང་སྤྱི་ཚོགས་ལ་ཤུགས་རྐྱེན་ཐེབས་སྲིད་པས་ངེས་པར་དུ་བཅའ་ཁྲིམས་དང་ཁྲིམས་སྲོལ་གྱིས་འཆུན་འདོམས་བྱེད་པ་ལ་ངོས་འཛིན་གང་ལེགས་བྱེད་དགོས་ཞེས་ནན་གསུང་གནང་བ་རེད། ཧུའུ་ཁྲང་ཧྲེང་གིས་ཆོས་ལུགས་མི་སྣ་ཡོངས་ལ་སློབ་སྦྱོང་ལ་འབད་བརྩོན་བྱས་ཤིང་སྒོམ་སྒྲུབ་ལ་གཞོལ་ནས་དཀར་མཛེས་ཁུལ་གྱི་འཆམ་མཐུན་སྤྱི་ཚོགས་བསྐྲུན་པར་མཛད་རྗེས་གསར་པ་འཇོག་དགོས་ཞེས་ཐུགས་རེ་གནང་བ་རེད། ཡིད་དབང་འཕྲོག་པའི་འཆད་ཁྲིད་གནང་བར་ཚོགས་ཞུགས་སློབ་མ་ཚང་མའི་དགའ་བསུའི་ཐལ་སྒྲའི་ཡང་ཡང་ཐོབ་པ་རེད།