ཟླ་བ9པའི་ཚེས21ཉིན།དཀར་མཛེས་ཁུལ་ཆོས་ལུགས་མི་སྣ་གསོ་སྦྱོང་ལྟེ་གནས་ཀྱི་སྒོ་བྱང་འགེལ་བའི་མཛད་སྒོ་དར་མདོར་སྤེལ་བ་རེད།ཁུལ་ཨུའི་ཧྲུའུ་ཅི་ཧུའུ་ཁྲང་ཁྲེང་མཛད་སྒོར་ཞུགས་ཤིང་གསུང་བཤད་གལ་ཆེན་གནང་བ་རེད། ལི་ཁེ་དང་ལི་མིང་ཆོན།ཏོན་ནེ་ཁེ་དང་། ལིའོཚའེ་ཁོན། སུའུ་ཏ་ཁྲུན། ཧྥན་ཝུན་ཧྭ། རྒྱལ་སྟོན་བློ་བཟང་བྱམས་པ། གདུགས་དཀར་ཚེ་རིང་བཅས་མཛད་སྒོར་ཞུགས་ཤིང་།ཁུལ་ཨུའི་ཧྲུའུ་ཅི་གཞོན་པ་ལིའུ་ཕིང་གིས་མཛད་སྒོའི་གཙོ་འགན་བཞེས་པ་རེད།
    ཧུའུ་ཁྲང་ཧྲེང་དང་ལི་ཁེ་རྣམ་གཉིས་ཀྱིས་ཁུལ་སྤྱི་ཚོགས་རིང་ལུགས་སློབ་གྲྭར་ཆོས་ལུགས་མི་སྣའི་གསོ་སྦྱོང་ལྟེ་གནས་ཀྱི་སྒོ་བྱང་གནང་བ་དང་།གསོ་སྦྱོང་སློབ་མའི་འཐུས་ཚབ་རྣམས་ལ་མང་ཚོགས་ལས་ཀའི་དཔེ་དེབ་གནང་བ་རེད།
    མཛད་སྒོའི་ཐོག་ཧུའུ་ཁྲང་ཁྲེང་གིས་གསུང་བཤད་གནང་བ་རེད།ཁོང་གིས་ཐོག་མར་ཁུལ་ཚོགས་པ་ཆེན་པོ་བཞིའི་ཚབ་བྱས་ནས་གསོ་སྦྱོང་ལྟེ་གནས་དབུ་བརྙེས་པར་རྟེན་འབྲེལ་ཞུས་ཤིང་དུས་ཡུན་རིང་པོར་དཀར་མཛེས་ཁུལ་གྱི་ཆོས་ལུགས་ལས་དོན་ལ་ཐུགས་ཁུར་དང་རྒྱབ་སྐྱོར་གནང་མཁན་གྱི་ལས་རིགས་ཁག་གི་མི་སྣ་རྣམས་ལ་ཐུགས་རྗེ་ཆེ་ཞུ་བ་དང་། གསོ་སྦྱོང་ལྟེ་གནས་ཀྱི་ཐེངས་དང་པོའི་སློབ་མ་རྣམས་ལ་དགའ་བསུ་གནང་བ་རེད།
    ཁོང་གིས་བསྟན་དོན།གསོ་སྦྱོང་ལྟེ་གནས་དབུ་བརྙེས་པ་དེས་རང་ཁུལ་སྲིད་གཞུང་གིས་གཙོ་ཁྲིད་བྱེད་པའི་ཆོས་ལུགས་གསོ་སྦྱོང་སློབ་གསོ་བྱེད་ས་མེད་པའི་སྟོང་ཆ་བསྐོངས་བ་ཡིན་ཞིང་།དེས་རང་ཁུལ་གྱི་ཆོས་ལུགས་སློབ་གསོའི་གསོ་སྦྱོང་ལས་ཀ་གོམ་གང་མདུན་སྤོས་ཡོང་བར་མཚོན།ཆོས་ལུགས་མི་སྣའི་གསོ་སྦྱོང་ལྟེ་གནས་ནི་ཆོས་ལུགས་མི་སྣའི་སློབ་སྦྱོང་གི་ལྡུམ་ར་དང་བསམ་པའི་ཁྱིམ་གཞིས་ཤིག་ཡིན་པ་རེད།སྤྱི་ཚོགས་གོང་འཕེལ་ཕྱིན་པ་དང་བསྟུན་ནས་ཆོས་ལུགས་ཀྱི་ཁྱབ་ཁོངས་སུ་ཚད་ངེས་མེད་ཀྱི་སྤྱི་ཚོགས་ཡར་རྒྱས་དང་མི་འཚམ་པའི་རྗེས་ལུས་ཀྱི་གནས་ཚུལ་བྱུང་བ་རེད།དེའི་འབྱུང་རྩ་ཡང་ཆོས་ལུགས་མི་སྣ་མང་པོས་རྒྱལ་ཁབ་ཀྱི་བྱེད་ཕྱོགས་དང་སྲིད་ཇུས་ལ་རྒྱུས་མེད་ཅིང་ཁྲིམས་ལུགས་ཁྲིམས་སྲོལ་གྱི་འདུ་ཤེས་ཞན་པའི་རྐྱེན་གྱིས་གསོ་སྦྱོང་བྱེད་ཤུགས་ཆེ་རུ་མི་གཏོང་ཀ་མེད་རེད། ཧུའུ་ཁྲང་ཧྲེང་གིས་བསྟན་དོན།དེ་རིང་གསོ་སྦྱོང་ལྟེ་གནས་དབུ་བརྙེས་ནས་ཆོས་ལུགས་མི་སྣ་ལ་རིག་གཞུང་དང་སྲིད་ཇུས་བྱེད་ཕྱོགས་ལ་སློབ་སྦྱོང་བྱས་ཏེ་བསམ་བློ་རིག་གནས་ཀྱི་བྱང་ཚད་མཐོར་འདེགས་གཏོང་བའི་སྟེགས་གཞི་ཞིག་བསྐྲུན་པ་དང་ཆོས་ལུགས་ཚོགས་པས་རང་ངོས་ཀྱི་འཛུགས་སྐྲུན་ལ་ཤུགས་སྣོན་རྒྱག་ཅིང་།ཆོས་ལུགས་མི་སྣའི་དོ་དམ་ལེགས་འཛིན་དང་བྱང་ཚད་མཐོར་འདེགས་གཏོང་བར་ཆ་རྐྱེན་དེ་བས་བཟང་པོ་བསྐྲུན་ཡོད་པ་རེད། གསོ་སྦྱོང་ལྟེ་གནས་ཀྱིས་ངེས་པར་དུ་འགན་འཁྲི་དང་བླངས་སྒོས་རིག་པའི་གཞུང་ལུགས་ཀྱིས་དྲག་ཆས་སྤྲས་རྒྱུ་དེ་ལས་འགན་ཨང་དང་པོར་རྩིས་རྒྱུ་རྒྱུན་འཁྱོངས་བྱས་ནས་ཆོས་ལུགས་མི་སྣ་གསོ་སྐྱོང་བྱེད་པའི་གནས་གཞི་དང་།ཆོས་ལུགས་རིག་གཞུང་ཞིབ་འཇུག་བྱེད་པའི་གནས་གཞི། སྲིད་ཇུས་བྱེད་ཕྱོགས་དྲིལ་བསྒྲགས་བྱེད་པའི་གནས་གཞི་བཅས་ཀྱི་ནུས་པ་འདོན་སྤེལ་གང་ལེགས་བྱེད་དགོས།ཆབ་སྲིད་ཀྱི་སྣེ་ཁྲིད་བྱེད་ཤུགས་ཆེ་རུ་བཏང་ནས་དམིགས་སའི་རང་བཞིན་ལྡན་པའི་དོགས་གནད་བསལ་ཏེ་བསམ་བློའི་བརྗེ་རེས་ཀྱི་ཁྲོད་དུ་ཆོས་ལུགས་མི་སྣའི་རྒྱལ་ཁབ་ཀྱི་འདུ་ཤེས་དང་།སྤྱི་འབངས་ཀྱི་འདུ་ཤེས།ཁྲིམས་ལུགས་ཀྱི་འདུ་ཤེས་བཅས་རིམ་བཞིན་ཇེ་དྲག་ཏུ་ཕྱིན་ཐུབ་པ་དང་།ཆོས་ལུགས་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཕྲོད་པ་བྱ་རྒྱུར་སྣེ་ཁྲིད་ཧུར་ཐག་བྱེད་དགོས།གསོ་སྦྱོང་དུ་ཞུགས་པའི་སློབ་མ་ཚོས་ཀྱང་གོ་སྐབས་དམ་འཛིན་བྱས་ནས་ཤེས་བྱའི་བདུད་རྩི་བླངས་ཤིང་ཕྱོགས་བསྡུས་ཀྱི་བྱང་ཚད་ཇེ་མཐོར་གཏོང་བ།སྤྱན་རྒྱང་རིང་པོས་ཆོས་ལུགས་འཕེལ་རྒྱས་ཀྱི་གནས་ངོར་ལེགས་པོར་གཟིགས་དགོས་པ་དང་།ཁུལ་ཡོངས་ཀྱི་མི་དམངས་བདེ་སྐྱིད་ཐོབ་པར་ནུས་པ་གང་ལེགས་བཏོན་དགོས། ཏང་ཨུ་སྲིད་གཞུང་དང་བསམ་བློའི་ཐོག་བློ་གཅིག་སེམས་གཅིག་དང་། དམིགས་ཡུལ་གྱི་ཐོག་བློ་སེམས་མཉམ་གཏད།བྱ་སྤྱོད་ཀྱི་ཐོག་ཁ་ཞེ་གཉིས་མཐུན་བཅས་ཡོང་བར་བྱེད་དགོས།