ཟླ་བ9པའི་ཚེས23ཉིན་སི་ཁྲོན་ཞིང་ཆེན་ཡུལ་སྐོར་ཅུས་དང་དཀར་མཛེས་ཁུལ་མི་དམངས་སྲིད་གཞུང་གིས་གཙོ་གཉེར་བྱས་པ་དང་།དར་མདོ་རྫོང་མི་དམངས་སྲིད་གཞུང་དང་།དཀར་མཛེས་ཁུལ་ཡུལ་སྐོར་ཅུས།དཀར་མཛེས་ཁུལ་རིག་གནས་ལུས་རྩལ་དང་རྒྱང་སྒྲོག་གློག་བརྙན་བརྙན་འཕྲིན་ཅུས་བཅས་ཀྱིས་སྒྲུབ་འགན་ཁུར་བ།ཁྲེང་ཏུའུ་གསར་འགྱུར་མཚམས་སྦྱར་ཚོགས་པ་དང་།ཁྲེང་ཏུའུ་རྒྱང་བསྒྲགས་བརྙན་འཕྲིན་ཁང་།ཁྲེང་ཏུའུ་སྒྲ་ཕབ་པར་སྐྲུན་ཁང་ཚད་ཡོད་འགན་འཁྲི་ཀུང་སི་བཅས་ཀྱིས་ལག་བསྟར་བྱས་པའི2012ལོའི་ཀྲུང་གོའི་དར་མདོ་རྒྱལ་སྤྱིའི་མཛའ་གཞས་དུས་ཆེན་གྱི་མཛད་སྒོ་དེ་མཛའ་གཞས་ཕ་ཡུལ་དུ་སྤེལ་འགོ་ཚུགས་པ་རེད།
    ཁུལ་ཨུའི་ཧྲུའུ་ཅི་ཧུའུ་ཁྲང་ཧྲེང་འགོ་ཚུགས་མཛད་སྒོར་ཞུགས་ནས་ཤིས་ཚིག་ཕུལ་བ་རེད།ཤིས་ཚིག་ནང་གསུངས་དོན།ཀྲུང་གོའི་དར་མདོ་རྒྱལ་སྤྱིའི་མཛའ་གཞས་དུས་ཆེན་ནང་དཀར་མཛེས་ཁུལ་གྱིས་སྐྱེ་ཁམས་ལྡན་པའི་ཁུལ་དང་འཆམ་མཐུན་དང་དགེ་སེམས་བདེ་འཇགས་བཅས་ཀྱི་ཁུལ་བཙུགས་པའི་འཐབ་ཇུས་ལག་བསྟར་བྱེད་འགོ་ཚུགས་པ་དེའི་ཐོག་ནས་མཛེས་སྡུག་ལྡན་ཤིང་འཆམ་མཐུན་བདེ་སྐྱིད་བཅས་ཀྱི་དཀར་མཛེས་ཁུལ་གསར་པར་རྒྱང་སྐྱོད་གསར་པ་བྱེད་པ་མཚོན།ཁོང་གིས་ཁུལ་ཨུ་དང་ཁུལ་སྲིད་གཞུང་གི་ཚབ་ཞུས་ནས་ཀྲུང་གོའི་དར་མདོ་རྒྱལ་སྤྱིའི་མཛའ་གཞས་དུས་ཆེན་གཟབ་རྒྱས་ངང་འཚོགས་འགོ་ཚུགས་པར་སྤྲོ་སེམས་འཁོལ་བའི་ངང་ནས་རྟེན་འབྲེལ་ཞུས།འཛམ་གླིང་གི་ས་གནས་ཁག་ནས་ཡོང་བའི་སྐུ་མགྲོན་དང་འཁྲབ་སྟོན་ལས་རིགས་ཀྱི་སྒྱུ་རྩལ་པ་ཚོར་ལྷག་བསམ་རྣམ་དག་གིས་དགའ་བསུ་ཞུས་པ་རེད།དཀར་མཛེས་ཁུལ་གྱི་ལྗོངས་རྒྱུ་རིག་གནས་འཕེལ་རྒྱས་ལ་སེམས་ཁུར་དང་རྒྱབ་སྐྱོར་བྱེད་མཁན་གྱི་ལས་རིགས་ཁག་གི་མི་སྣ་ལ་སྙིང་ཐག་པ་ནས་ཐུགས་རྗེ་ཆེ་ཞུས་པ་རེད།
    2012ལོའི་ཀྲུང་གོའི་དར་མདོ་རྒྱལ་སྤྱིའི་མཛའ་གཞས་དུས་ཆེན་སྤེལ་འགོ་ཚུགས་པའི་མཛད་སྒོའི་ནང་རྒྱལ་ནང་བོད་ཁུལ་གྱི་གླུ་པ་གྲགས་ཅན་དང་སྙན་ཞིང་འཇེབས་པའི་གླུ་དབྱངས་བླངས་པ་རེད།དར་མདོ་ནས་འཚར་ལོངས་ཡོང་བའི་སྐད་གྲགས་ཅན་གྱི་གླུ་པ་ཨ་རྣམ་ཟླ་བ་སྒྲོལ་མ་སྟེགས་བུའི་ཐོག་ཕྱིན་དུས་ཕ་ཡུལ་གྱི་ལྟད་མོ་བས་དགའ་སྤྲོ་ཚད་མེདབྱས།ཨ་རྣམ་གྱིས་དགའ་སྤྲོ་ཆེན་པོས་ཕ་ཡུལ་གྱི་ལྟད་མོ་བ་དང་མཉམ་དུ་གླུ་དབྱངས་བླངས།ཐའེ་ཝན་གྱི་གླུ་པ་གྲགས་ཅན་ཅང་ཡུས་ཧེན་གྱིས་གླུ་གསུམ་ཙམ་བླངས་ནས་བྱེད་སྒོ་དེར་མཐོ་རླབས་ཤིག་བསླངས།འགོ་ཚུགས་མཛད་སྒོ་དེ་བོད་ཁུལ་གྱི་གླུ་པ་བསམ་ཁོ་ཡིས༼དར་མདོའི་མཛའ་གཞས༽ཀྱི་གླུ་དབྱངས་ལེན་པའི་ཁྲོད་དུ་མཇུག་བསྒྲིལ་བ་རེད།
    རྒྱལ་ཁབ་ཕྱི་ནང་གི་སྐད་གྲགས་ཅན་གྱི་ཁེ་ལས་པ་དང་དགེ་སྒྲུབ་པ།རིག་གནས་པ།རིག་རྩལ་པ་དང་རང་ཁུལ་གྱི་རྫོང་ཁག་བཅུ་བདུན་དང་དུང་དཀར་ལུང་པའི་དོ་དམ་ཅུས་སོགས་ཀྱི་འགན་ཁུར་མི་སྣ་དང་།ཀྲུང་དབྱང་བརྙན་འཕྲིན་ཁང་དང་མི་དམངས་ཉིན་རེའི་ཚགས་པར།སི་ཁྲོན་བརྙན་འཕྲིན་ཁང་དང་སི་ཁྲོན་ཉིན་རེའི་ཚགས་པར་སོགས་གསར་འགྱུར་མཚམས་སྦྱོར་བྱེད་མཁན20ལྷག་ཙམ་གྱི་གསར་འགོད་པ་ཚོ་འགོ་ཚུགས་མཛད་སྒོའི་ནང་ཞུགས་ཡོད།