ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཡོངས་ཀྱི་ནགས་ལས་ཚན་རྩལ་ཚོགས་ཆེན་ཚེས24ཉིན་པེ་ཅིན་ནས་ཚོགས་པ་དང་། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ། རྒྱལ་ཡོངས་ལྗང་སྒྱུར་ཨུ་ཡོན་ལྷན་ཁང་གི་ཀྲུའུ་རིན་ཧོས་ལེང་ཡུས་ཚོགས་ཆེན་ལ་ཞུགས། ཚོགས་ཆེན་སྟེང་ཧོས་ལེང་ཡུས་ཀྱིས་བཤད་རྒྱུར། ཉེ་བའི་ལོ་འགའི་རིང་ལ་རང་རྒྱལ་གྱི་ནགས་ལས་འཕེལ་རྒྱས་ཐད་ནས་གྲུབ་འབྲས་ཆེན་པོ་ཐོབ། ལོ་རྒྱུས་ཀྱི་དུས་རིམ་གསར་བའི་ནང་དུ་ནགས་ལས་འཕེལ་རྒྱས་སུ་གཏོང་དགོས་ན་ངེས་པར་དུ་ཚན་རྩལ་གྱི་ནུས་པ་འདོན་སྤེལ་གང་ལེགས་བྱེད་དགོས་པ་དང་། ནགས་ལས་ཚན་རྩལ་གྱི་སྤྱི་ཕན་རང་བཞིན་དང་རྨང་གཞི་རང་བཞིན། སྤྱི་ཚོགས་རང་བཞིན་བཅས་ཀྱི་ཁྱད་ཆོས་གཞིར་བཟུང་སྟེ་དཀྱིལ་སྙིང་ལག་རྩལ་བརྒལ་གཏོར་དང་ཁྱབ་གདལ་བཀོལ་སྤྱོད་ལ་ཤུགས་སྣོན་པ། ཁོར་ཡུག་ལེགས་སྒྱུར་དང་གསར་སྐྲུན་བྱེད་པ་བཅས་གཙོ་བོར་འཛིན་པ་དང་། རྒྱལ་ཁབ་ཀྱི་ནགས་ལས་ཚན་རྩལ་གསར་སྐྲུན་མ་ལག་མྱུར་དུ་འཛུགས་སྐྲུན་བྱེད་པར་མ་ཟད། ནགས་ལས་ཀྱི་ཚན་རྩལ་གསར་སྐྲུན་ནུས་པ་ཕྱོགས་ཡོངས་ནས་ཇེ་ཆེར་བཏང་ནས། དེང་རབས་ནགས་ལས་འཛུགས་སྐྲུན་ཐད་ལ་རྣམ་པ་གསར་བ་གསར་སྐྲུན་བྱེད་དགོས་ཟེར།

ཚོགས་ཐོག་ནས་རྒྱལ་ཡོངས་ཀྱི་ནགས་ལས་ཚན་རྩལ་འཕེལ་རྒྱས་ཐད་ལ་བྱས་རྗེས་ཆེན་པོ་བཞག་པའི་སྔོན་ཐོན་ཐུན་མོང་དང་སྔོན་ཐོན་མི་སྒེར་ལ་གཟེངས་བསྟོད་བྱས་པ་དང་བྱ་དགའ་ཐོབ་པའི་འཐུས་མི་ལྔ་ཡིས་གཏམ་བཤད།  །