ནུབ་བྱང་མི་རིགས་རིག་པའི་གླེང་སྟེགས་ལན་གྲུ་སློབ་ཆེན་དུ་ཚོགས་པ།

         ཉེ་ལམ། སློབ་གསོ་པུའུ་མི་ཆོས་སྤྱི་ཚོགས་རིག་པའི་གལ་ཆེའི་ཞིབ་འཇུག་རྟེན་གཞི་ལན་གྲུ་སློབ་ཆེན་གྱི་ནུབ་བྱང་གྲངས་ཉུང་མི་རིགས་ཞིབ་འཇུག་ལྟེ་གནས་དང་། མི་རིགས་རིག་པའི་ཞིབ་འཇུག་གླིང་གཉིས་ཀྱིས་གཙོ་སྒྲུབ་གནང་བའི་སྐབས་དང་པོའི་ནུབ་བྱང་མི་རིགས་རིག་པའི་གླེང་སྟེགས་དེ་ལན་གྲུ་སློབ་ཆེན་དུ་གཟབ་རྒྱས་ངང་སྤེལ།
         ཀན་སུའུ་ཞིང་ཆེན་གྱི་འབྲེལ་ཡོད་འགོ་ཁྲིད་ཐེངས་འདིའི་ཚོགས་ཐོག་ཏུ་ཞུགས་པ་མ་ཟད། ལན་གྲུ་སློབ་ཆེན་དང་། ཞིན་ཅང་སློབ་ཆེན། མཚོ་སྔོན་སློབ་ཆེན། མཚོ་སྔོན་མི་རིགས་སློབ་ཆེན། ནུབ་ཕྱོགས་མི་རིགས་སློབ་ཆེན། ཀྲུང་གོའི་སྤྱི་ཚོགས་ཚན་རིག་གླིང་། ནུབ་བྱང་མི་རིགས་སློབ་ཆེན་སོགས་རྒྱལ་ནང་གི་སློབ་ཆེན་ཁག་དང་ཞིབ་འཇུག་ལས་ཁུངས་ཀྱི་ཤེས་ཡོན་པ་དང་ཆེད་མཁས་པ60ལྷག་ཀྱང་ཚོགས་འདུར་ཞུགས་ཏེ་ནུབ་བྱང་མི་རིགས་རིག་པའི་ཞིབ་འཇུག་གི་གནས་བབས་དང་། ཞིབ་འཇུག་ལས་ཁུངས་བར་གྱི་འབྲེལ་འདྲིས་དང་མཉམ་འབྲེལ་བྱེད་ཤུགས་ཇི་ལྟར་ཆེར་བསྐྱེད་པ།  ནུབ་བྱང་མི་རིགས་རིག་པའི་ཞིབ་འཇུག་གི་ཕྱོགས་ཡོངས་ཆུ་ཚད་ཇི་ལྟར་མཐོར་འདེགས་གཏོང་བ། མི་རིགས་རིག་པའི་རིག་ཚན་གྱི་འཛུགས་སྐྲུན་དང་ཕྱོགས་ཡོངས་འཕེལ་རྒྱས་ཀྱི་གནད་དོན་ཇི་ལྟར་ཐག་གཅོད་བྱེད་པ་སོགས་ཀྱི་ཐད་ནས་ཁྱབ་རྒྱ་ཆེ་བའི་ངང་བགྲོ་གླེང་མཛད།
         དེར་མཐུད་དེ་དགེ་རྒན་ཆེན་མོ་རྣམས་ཀྱིས་ཆེད་དོན་གཏམ་བཤད་གནང་བ་སྟེ། མི་རིགས་རིག་པའི་གཅིག་གྱུར་རང་བཞིན་དང་སྣ་མང་རང་བཞིན་གྱི་གནད་དོན་དང་།  མིག་སྔའི་མི་རིགས་ཞིབ་འཇུག་ཁྲོད་བྱུང་བའི་གནས་ཚུལ་གྱི་གདེང་འཇོག   མི་རིགས་གནད་དོན་དང་མི་རིགས་མཐུན་སྦྱོར། དེང་རབས་རང་བཞིན་དང་གྲངས་ཉུང་མི་རིགས་དེང་རབས་ཅན་གྱི་གནད་དོན་སོགས་ཀྱི་ཐད་ནས་གླེང་མོལ་བྱས།