ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཉེ་ཆར་ནང་སོག་རང་སྐྱོང་ལྗོངས་ཐུང་ལེའོ་གྲོང་ཁྱེར་གྱི་ཨ་ཤོམ་ཞིང་ཁ་མུའུ་ཁྲི་500ལ་ལོ་20ཡི་རིང་མཐོང་དཀོན་པའི་འབུ་སྐྱོན་ཚབས་ཆེན་བྱུང་ཞིང་།ད་ལྟ་གནོད་འཚེ་ཕོག་པའི་ཞིང་ཁ་མུའུ་80%ཡན་ལ་འབུ་སྐྱོན་འགོག་བཅོས་ཐུབ་ནས་རྩ་བའི་ཆར་ཚོད་འཛིན་བྱུང་ཡོད།

ངོ་སྤྲོད་བྱས་པར་གཞིགས་ན།གནོད་འབུར་ཐག་རིང་པོར་འཕུར་ཐུབ་པ་དང་སྡེབ་གཅིག་ཏུ་གནོད་འཚེ་གཏོང་བའི་ཁྱད་ཆོས་ལྡན་པས་ཨ་ཤོམ་སོགས་ཞིང་ལས་སྐྱེ་དངོས་ཡུལ་ངེས་མེད་ཐོག་ནས་རྩ་སྟོང་བཟོ་བར་བརྟེན་ད་ལྟ་ལྟ་སྐུལ་ཚད་ལེན་གྱིས་སྔོན་འགོག་ཚོད་འཛིན་བྱེད་པའི་འགག་རྩའི་དུས་སུ་སླེབས་ཡོད།

ནང་སོག་ཞིང་འབྲོག་ཐིང་སྐྱེ་དངོས་སྲུང་སྐྱོང་ས་ཚུགས་ཀྱི་ཀྲེན་ཀྲང་གཞོན་པ་ལིའུ་ཅ་ཤང་གིས་ངོ་སྤྲོད་བྱས་པར་གཞིགས་ན།འདི་ལོའི་ཟླ་7པའི་ཟླ་སྨད་ནས་བཟུང་ནང་སོག་ཏུ་ཆར་ཞོད་ཆེ་བ་དང་གནམ་གཤིས་ཡག་པོ་བསྟན་སྟབས་སྔ་པོ་ནས་འབུ་སྐྱོན་ཐོན་ཏེ་འདི་ལོ་ནང་སོག་ཏུ་ལོ་བཅུ་གྲངས་ནང་ཨ་ཤོམ་ཞིང་ཁར་འབུ་སྐྱོན་ཚབས་ཆེ་ཤོས་བྱུང་བའི་ཁྲོད་ཨ་ཤོམ་ཐོན་ཁུལ་ཐུང་ལེའོ་གྲོང་ཁྱེར་གྱི་ཨ་ཤོམ་ཞིང་ཁ་གསུམ་ཆ་གཅིག་ལ་འབུ་སྐྱོན་ཚབས་ཆེན་ཐོན་ཡོད།

ལིའུ་ཅ་ཤང་གིས“འགོག་བཅོས་ནུས་ལྡན་བྱེད་མ་ཐུབ་ཚེ་གནོད་འབུ་ཐོན་ཁུལ་ཞིང་ཁའི་ཐོན་འབབ་10%མན་ཆག་རྒྱུ་མ་ཟད།གནོད་ཚབས་ཆེ་ཁུལ་ནས་འབྲུ་རྡོག་གཅིག་ཀྱང་བསྡུ་རྒྱུ་མེད་པ་ཆགས་རྒྱུ་རེད”ཅེས་བཤད།

ཐུང་ལེའོ་གྲོང་ཁྱེར་ཞིང་འབྲོག་ཅུས་སྐྱེ་དངོས་འདེབས་འཛུགས་ཚན་པའི་ཁོའོ་ཀྲང་ལུའུ་ཅིང་ཧུད་ཀྱིས“ད་ཆ་འགོག་བཅོས་བྱས་པར་ཕན་འབྲས་ཐོན་ནས་འབུ་སྐྱོན་ཕོག་ཁྱོན་ཆེ་རུ་སོང་མེད་ལ་གནོད་འབུའང་རྩ་བའི་ཆར་གསོད་ཐུབ་པ་བྱུང་ཡོད”ཅེས་བཤད། །