གྲོས་ཆིངས་ལྟར་བོད་ལྗོངས་སློབ་གསོ་ཐིང་གིས་ནུས་ཤུགས་ཡོད་དགུས་བོད་ལྗོངས་སློབ་ཆེན་སོགས་མཐོ་རིམ་སློབ་གྲྭ་ཁག་དང་པེ་ཅིང་འགྲིམ་འགྲུལ་སློབ་ཆེན་བར་གྱི་མཉམ་ལས་ལ་སྐུལ་འདེད་བཏང་སྟེ། མཐོ་རིམ་སློབ་གྲྭ་ཁག་གི་མཉམ་ལས་ཀྱི་དཔུང་སྡེ་གྲུབ་ཏུ་འཇུག་རྒྱུ་ཡིན་ཞིང་། ཕྱོགས་གཅིག་ནས་པེ་ཅིང་འགྲིམ་འགྲུལ་སློབ་ཆེན་གྱིས་བོད་ལྗོངས་ཀྱི་མཐོ་རིམ་སློབ་གསོའི་འཕེལ་རྒྱས་ལ་རྒྱབ་སྐྱོར་གནང་པར་གོ་སྐབས་བཟང་པོ་སྐྲུན་པ་དང་། ཕྱོགས་གཞན་ཞིག་ནས་བོད་ལྗོངས་ཀྱི་འབྲེལ་ཡོད་མཐོ་རིམ་སློབ་ཆེན་ཁག་དང་། ལྷག་པར་དུ་ལྕགས་ལམ་འཛུགས་སྐྲུན་དང་འབྲེལ་བ་ཟབ་པའི་མཐོ་རིམ་སློབ་གྲྭ་ཁག་ལ་ཕྱིའི་རྒྱབ་སྐྱོར་ཐོབ་ཅིང་སློབ་གསོའི་ཆུ་ཚད་མཐོར་འདེགས་གཏོང་པའི་གོ་སྐབས་བཟང་པོ་སྐྲུན་དགོས་པ་རེད།

    པེ་ཅིང་འགྲིམ་འགྲུལ་སློབ་ཆེན་གྱིས་ལོ་རེ་བཞིན་དུས་ལྟར་བོད་ལྗོངས་ས་ཁུལ་ལ་ཕྱོགས་པའི་ཆེད་ལས་ཀྱི་སློབ་མ་བསྡུ་བའི་འཆར་གཞི་སྙོམས་སྒྲིག་བྱས་ཏེ། རྒྱལ་ཁབ་ཀྱིས་བོད་ལྗོངས་ས་ཁུལ་ནས་ཆེད་དུ་སློབ་མ་བསྡུ་བའི་འཆར་གཞི་ལག་བསྟར་ཡག་པོ་ཡོང་བར་བྱ་རྒྱུ་ཡིན་ལ། བོད་རང་སྐྱོང་ལྗོངས་ཀྱི་ལྕགས་ལམ་འཕེལ་རྒྱས་ལ་མཁོ་བའི་ཆེད་ལས་མི་སྣར་བྱ་བའི་སྦྱོང་བརྡར་བྱེད་དུ་འཇུག་པ་དང་། ན་གཞོན་ལས་བྱེད་པ་དང་དགེ་རྒན། ཞིབ་འཇུག་སློབ་མ་བཅས་པེ་ཅིང་འགྲིམ་འགྲུལ་སློབ་ཆེན་དང་མཉམ་དུ་བསྒྲུབས་པའི་མཐོ་རིམ་སློབ་ཆེན་གྱི་མཉམ་ལས་དཔུང་སྡེ་ལས་བོད་ལྗོངས་ཀྱི་མཐོ་རིམ་སློབ་ཆེན་དུ་རྟོག་ཞིབ་སྦྱོང་བརྡར་དང་དགེ་རྒན་བྱེད་དུ་མངགས་རྒྱུ་ཡིན་ཞིང་། ཕྱོགས་གཉིས་ཀྱིས་དེ་མིན་གཞན་ད་དུང་མཉམ་དུ་དངོས་སྦྱོང་ལག་ལེན་གྱི་གནས་གཞི་འཛུགས་པ་དང་། ཆེད་མཁས་པའི་བགྲོ་གླེང་དང་ཚན་རིག་ཞིབ་འཇུག་གི་མཉམ་ལས་སོགས་ཤུགས་ཆེར་སྤེལ་རྒྱུ་རེད། །