ཟླ8པའི་ཚེས1ཉིན། བོད་ལྗོངས་གཞིས་ཀ་རྩེ་ས་ཁུལ་བཞད་མཐོང་སྨོན་རྫོང་གི་ལོ་རེར་ཐེངས་གཅིག་ལ་སྤེལ་བཞིན་པའི་མང་ཚོགས་རང་བཞིན་གྱི་སྤྲོ་ཚོགས་ཏེ་རྟ་རྒྱུག་འགྲན་ཚོགས་སྐབས་བཞི་བའམ་དངོས་ཟོག་བརྗེ་རེས་ཚོང་ཚོགས་འགོ་བརྩམས་པ་རེད།
　　འགོ་རྩོམ་མཛད་སྒོའི་སྟེང་གཞིས་ཀ་རྩེའི་བཞད་མཐོང་སྨོན་རྫོང་ནས་ཡོང་བའི་རོང་འབྲོག་མང་ཚོགས་ཀྱིས་མཚོན་མདོག་རྣམ་པར་བཀྲ་བའི་རླངས་འཁོར་འགྲེམ་སྟོན་བྱས་པ་དང་། སློབ་མ་རྣམས་ཀྱིས་ཞབས་བྲོ་འཁྲབ་སྟོན་བྱས་པ། དེར་མ་ཟད་རོང་འབྲོག་མང་ཚོགས་ཀྱི་རྟ་རྒྱུག་འགྲན་ཞུགས་པ་རྣམས་ཀྱིས་སྲོལ་རྒྱུན་གྱི་རྟ་རྩལ་འཁྲབ་སྟོན་བྱས་པ་རེད།

ལུས་ལ་གཟབ་འཆོར་སྤྲས་ནས་སྤྲོ་ཚོགས་སྟེང་གར་གྱི་སྟངས་སྟབས་བསྒྱུར་བཞིན་པ།

　　རྒྱུས་ལོན་པ་ལྟར་ན་ཐེངས་འདིའི་བྱ་འགུལ་ཉིན་གསུམ་གྱི་རིང་དུ་སྤེལ་རྒྱུ་ཡིན་ལ། རྟ་རྒྱུག་འགྲན་ཚོགས་སྟེང་སྲོལ་རྒྱུན་གྱི་རྟ་རྩལ་འཁྲབ་སྟོན་དང་། ཐག་འཐེན་འགྲན་སྡུར། རྩལ་འགྲན་པ། རིག་རྩལ་འཁྲབ་སྟོན་སོགས་མང་ཚོགས་རང་བཞིན་གྱི་རིག་གནས་ལུས་རྩལ་བྱ་འགུལ་ཕུན་སུམ་ཚོགས་པོ་ཡོད་པ་རེད།
　　2005ལོ་ནས་བཟུང་། བོད་ལྗོངས་གཞིས་ཀ་རྩེ་གྲོང་རྡལ་བཞད་མཐོང་སྨོན་རྫོང་གིས་སྔ་གཞུག་ཏུ་ཐེངས་གསུམ་ལ་རྟ་རྒྱུག་དང་དངོས་ཟོག་བརྗེ་རེས་ཚོང་ཚོགས་སྤེལ་ཞིང་། གཙང་ཕྱོགས་ཀྱི་སྲོལ་རྒྱུན་རིག་གནས་དང་ཡུལ་གྲུའི་ཁྱད་ཆོས་ཀྱིས་ཕྱུག་པའི་རྟ་རྒྱུག་དུས་ཆེན་རིག་གནས་ཤིག་གྲུབ་འདུག་པར་མ་ཟད། རིགས་སོ་སོའི་མི་རྣམས་ཀྱིས་བཞད་མཐོང་སྨོན་རྫོང་ལ་རྒྱུས་ལོན་བྱེད་པའི་སྐར་ཁུང་ལྟ་བུ་ཞིག་ཏུ་གྱུར་འདུག་པ་རེད།
　　ད་ལོའི་རྟ་རྒྱུག་འགྲན་ཚོགས་དང་ཚོང་ཚོགས་ཀྱི་སྟེང་རྟ་མཆོག60ལྷག་དང་ཚོང་བ170ལྷག་ཞུགས་ཡོད་ཅིང་། སྔོན་རྩིས་བྱས་པ་ལྟར་ན་ལས་བྱེད་པ་དང་མང་ཚོགས5000ལྷག་བྱ་འགུལ་ཁྲོད་ཞུགས་ཡོད་པ་རེད།