རྒྱུས་ལོན་བྱུང་བ་ལྟར་ན་ཀན་སུའུ་ཞིང་ཆེན་ཝུའུ་ཝེ་གྲོང་ཁྱེར་དཔའ་རིས་བོད་རིགས་རང་སྐྱོང་རྫོང་གི་བོད་ཀྱི་སྐད་དང་ཡི་གེའི་ལས་ཀ་གཉེར་མཁན་རྣམས་མཚོ་སྔོན་དུ་ཕྱིན་ནས“དཔའ་རིས”ས་མིང་རིག་གནས་ཁུངས་འདེད་དང་རྟོག་ཞིབ་བྱས།
　　“དཔའ་རིས”ས་མིང་རིག་གནས་རྟོག་དཔྱོད་རུ་ཁག་སྤྱི་ལེ700ལྷག་གི་ལམ་དུ་བསྐྱོད་ནས་ས་གནས50ལྷག་ལ་རྩད་ཞིབ་དང་། དམངས་ཁྲོད་སྒྱུ་རྩལ་པ60ལྷག་ལ་བཅར་འདྲི་བྱས་ནས་ས་མིང300ལྷག་ལེགས་སྒྲིག་བྱས་ཤིང་། 《ཟི་ལིང་མཁར་གྱི་ས་གནས་ལོ་རྒྱུས་གསར་མ》དང་། 《ཟི་ལིང་མཁར་གྱི་ས་གནས་ལོ་རྒྱུས་ལྷན་ཐབས》། 《མཚོ་སྔོན་བོད་བརྒྱུད་ནང་བསྟན་དགོན་སྡེའི་གདན་རབས》། 《རྒྱ་རྡོར་རྫོང་རབས》། 《གསེར་ཁོག་རྫོང་རབས》། 《དགོན་ལུང་རྫོང་རབས》། 《རྒྱ་རྡོར་རྫོང་ས་མིང་རྣམ་བཤད》། 《གསེར་ཁོག་རྫོང་ས་མིང་རྣམ་བཤད》། 《དཔའ་བོའི་ཚོ་བ》། 《དགོན་ལུང་རྫོང་ཞང(གྲོང་རྡལ)སྡེ་བའི་ས་མིང་རགས་བཤད》། དེ་མིན་སྒྱུ་རྩལ་པ་འགའི་བྲིས་དཔེ་སོགས་རྒྱུ་ཆ་དང་བསྟན་བཅོས་ཁག17འཚོལ་སྡུད་དང་ལེགས་སྒྲིག་བྱས། དེར་མ་ཟད་ཡུལ་དངོས་ནས་དཔའ་རིས་རིག་གནས་ས་ཁོངས་ཀྱི་སྤྱི་ཁོག་ལ་རྟོག་ཞིབ་བྱས་པ་རེད།
　　ས་རྒྱུས་རིག་གནས་སྟེང་ནས་བཤད་ན་དཔའ་རིས་ཞེས་པ་དེང་གི་ཀན་སུའུ་ཞིང་ཆེན་གྱི་དཔའ་རིས་རྫོང་དང་སུའུ་ནན་རྫོང་། མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྒྱ་རྡོར་རྫོང་གི་སེམས་ཉིད་ཡུལ་ཚོ་དང་འབྲུ་གུ་ཡུལ་ཚོ། གཞན་དགོན་ལུང་རྫོང་དང་གསེར་ཁོག་རྫོང་གཉིས་ཀྱི་ས་ཆ་ཁ་ཤས་བཅས་འདུས་པ་རེད།