ཟླ7པའི་ཚེས18ཉིན་ནས་ཚེས19ཉིན་བར། ཀྲུང་དབྱང་རྩ་འཛུགས་པུའུ་ཡིས་ཟི་ལིང་ནས་སྤྱི་ལ་དབང་བའི་ལམ་ལུགས་མ་ཡིན་པའི་ཁེ་ལས་ཀྱི་ཏང་འཛུགས་བྱ་བ་དང་གཞི་རིམ་རྩ་འཛུགས་འཛུགས་སྐྲུན་ལོའི་བྱ་བ། ཞིང་ཆེན་དང་གྲོང་ཁྱེར་གྱི་སྡོད་ཁུལ་གྱི་ཏང་འཛུགས་བྱ་བ་བཅས་བཞུགས་མོལ་ཚོགས་འདུ་གསུམ་བསྡུས། ཀྲུང་དབྱང་རྩ་འཛུགས་པུའུ་རྩ་འཛུགས་ཅུའུ་གཉིས་པའི་ཅུའུ་ཀྲང་ཁྲིན་ཞང་ཆུན་གྲོས་ཚོགས་སུ་ཞུགས་པར་མ་ཟད་གཏམ་བཤད། ཞིང་ཆེན་ཏང་ཨུའི་རྒྱུན་ལས་ཨུ་ཡོན། རྩ་འཛུགས་པུའུ་ཡི་པུའུ་ཀྲང་ཆི་ཡུས་གྲོས་ཚོགས་སུ་ཞུགས་པར་མ་ཟད་ཞུ་ཚིག་ཕུལ། ཧྲན་ཞི་དང་ཀན་སུའུ། མཚོ་སྔོན། ཉིན་ཞ། ཞིན་ཅང་སོགས་ཞིང་ཆེན་དང་རང་སྐྱོང་ལྗོངས། ཞིན་ཅང་འཛུགས་སྐྲུན་དཔུང་ཚོགས་བཅས་ཀྱི་ཏང་ཨུའི་རྩ་འཛུགས་པུའུ་ཡི་པུའུ་ཀྲང་གཞོན་པ་དང་། སྤྱི་ལ་དབང་བའི་ལམ་ལུགས་མ་ཡིན་པའི་ཁེ་ལས་ཀྱི་ཏང་ཨུའི་ཧྲུའུ་ཅི་སོགས་མི་བརྒྱ་དང་བཅུ་གྲོས་ཚོགས་སུ་ཞུགས།

ཚོགས་ཐོག་ནས་ནན་གྱིས་བསྟན་དོན། སྤྱི་ལ་དབང་བའི་ལམ་ལུགས་མ་ཡིན་པའི་ཁེ་ལས་དང་སྤྱི་ལ་དབང་བའི་ལམ་ལུགས་མ་ཡིན་པའི་ཁེ་ལས་ཀྱི་ཏང་འཛུགས་བྱ་བའི་གོ་གནས་དང་ནུས་པ་ཁོང་དུ་ཆུད་པར་བྱས་ནས། སྤྱི་ལ་དབང་བའི་ལམ་ལུགས་མ་ཡིན་པའི་ཁེ་ལས་ཀྱི་ཏང་འཛུགས་བྱ་བའི་དོན་སྙིང་གལ་ཆེན་ལ་ངོས་འཛིན་ཟབ་མོ་བྱེད་པ་དང། ཏང་རྩ་འཛུགས་ཀྱི་བྱ་བ་བཟང་བོར་བསྒྲུབ་པ། ཏང་རྩ་འཛུགས་ཀྱི་ལས་བཟོ་བ་དང་མང་ཚོགས་ཁྲོད་ཀྱི་ཆབ་སྲིད་སྲོག་ཤིང་གི་ནུས་པ་དང་ཁེ་ལས་འཕེལ་རྒྱས་ཁྲོད་ཀྱི་ཆབ་སྲིད་སྣེ་ཁྲིད་ཀྱི་ནུས་པ་འདོན་སྤེལ་གང་ལེགས་བྱེད་པ། མགོ་ཁྲིད་ལམ་ལུགས་དང་བྱ་བའི་ལམ་ལུགས་སྔར་ལས་འཐུས་ཚང་དུ་གཏོང་བ་སོགས་ཕྱོགས་མང་པོའི་བྱ་བ་བཟང་བོར་བསྒྲུབས་ཏེ། སྤྱི་ལ་དབང་བའི་ལམ་ལུགས་མ་ཡིན་པའི་ཁེ་ལས་ཀྱི་ཏང་འཛུགས་བྱ་བའི་ཆུ་ཚད་རྒྱུན་ཆད་མེད་པར་མཐོར་འདེགས་སུ་གཏོང་དགོས་ཟེར།

ཚོགས་ཐོག་ནས་ཉེ་བའི་ལོ་འགའི་རིང་ལ་གྲོང་ཁྱེར་སྡོད་ཁུལ་གྱི་ཏང་འཛུགས་བྱ་བའི་ཐད་ནས་བླངས་པའི་གྲུབ་འབྲས་གསར་བར་ཁས་ལེན་གང་ལེགས་བྱས་ཏེ། ཞིང་ཆེན་དང་གྲོང་ཁྱེར་གྱི་སྡོད་ཁུལ་གྱི་ཏང་འཛུགས་བྱ་བའི་ཆུ་ཚད་སྔར་ལས་མཐོར་འདེགས་སུ་གཏོང་བའི་ཐད་ལ་རེ་བ་གསལ་བོ་བཏོན། །