ཀྲུང་གོའི་བོད་ཀྱི་དྲ་བའི་འཕྲིན། ཟླ7པའི་ཚེས6ཉིན་མཚོ་སྔོན་ཞིང་ཆེན་འགྲིམ་འགྲུལ་ཐིན་ནས་རྒྱུས་ལོན་བྱུང་བ་ལྟར་ན། མཚོ་ཤར་ས་ཁུལ་གྱིས་ཁུལ་ཡོངས་ཀྱི་ཞིང་སྡེའི་གཞུང་ལམ་འཛུགས་སྐྲུན་ལས་གཞི་ལ་ཁ་གསབ་མ་དངུལ་སྒོར་མོ་དུང་ཕྱུར2ལྷག་བཏང་།

ད་ལོའི་ལོ་སྟོད་དུ། མཚོ་ཤར་འགྲིམ་འགྲུལ་ཅུའུ་ཡིས་ས་ཁུལ་གྱི་ལས་གཞི་འཛུགས་སྐྲུན་ལོའི་རེ་བ་ལྟར། འགྲིམ་འགྲུལ་ལས་གཞི་འཆར་འགོད་དང་། ཡིག་ཐོག་སྙན་ཞུ། ལག་བསྟར་གྱི་ཆུ་ཚད་སྔར་ལས་མཐོ་རུ་བཏེགས་ཏེ། ཞིང་སྡེའི་གཞུང་ལམ་འཛུགས་སྐྲུན་གྱི་ནུས་ཤུགས་མུ་མཐུད་དུ་ཇེ་དྲག་ཏུ་བཏང་བ་དང་། ལས་གཞི་འབྲེལ་མཐུད་དང་ལག་བསྟར་བྱ་བ་གཙིགས་སུ་བཟུང་ནས་དམ་འཛིན་བྱས་པ་མ་ཟད། ཧུར་ཐག་གིས་རྫོང་དང་ཞང་གི་གཞུང་ལམ་ལས་པ་དང་། སྡེ་བར་སྣུམ་ལམ་ལས་པ། དགོན་པར་གཞུང་ལམ་ལས་པ། ཞང་དང་སྡེ་བར་ཟམ་པ་འཕེན་པ། ཞིང་ལས་གླིང་ཁུལ་དང་། དབུལ་སྐྱོར་གནས་སྤོར་སྡེ་བར་གཞུང་ལམ་ལས་པ་དང་། ས་ཁུལ་རིམ་པའི་དཔེ་སྟོན་སྡེ་བར་གཞུང་ལམ་ལས་པ་སོགས་ཞིང་སྡེའི་གཞུང་ལམ་ལས་གཞི་བརྩོན་ལེན་བྱས་ཏེ། སྟོབས་ཤུགས་ཡོད་རྒུས་ཞིང་སྡེའི་འགྲིམ་འགྲུལ་རྨང་གཞིའི་སྒྲིག་ཆས་ཀྱི་ཆ་རྐྱེན་ལེགས་བཅོས་དང་། ཕན་ནུས་ལྡན་པའི་སྒོ་ནས་གྲོང་གསེབ་འགྲིམ་འགྲུལ་གཞི་རྩའི་སྤྱི་བའི་ཞབས་ཞུ་སོགས་ཆ་སྙོམས་ཅན་དུ་བཏང་ནས། ལོ་སྟོད་དུ་གཏན་འབེབས་བྱས་པའི་དངུལ་གཏོང་དམིགས་འབེན་ཁྱོན་ཡོངས་ནས་ལེགས་འགྲུབ་འབྱུང་བར་རྨང་གཞི་བརྟན་པོ་བཏིངས།