རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཝུའུ་པང་གོ་ཡིས་ཚེས་ལྔ་ཉིན་མི་དམངས་ཚོགས་ཁང་ཆེན་མོའི་ནང་ཁུ་པ་རྒྱལ་སྲིད་ཨུ་ཡོན་ལྷན་ཁང་གི་ཀྲུའུ་ཞི་དང་པུའུ་ཀྲང་གྲོས་ཚོགས་ཀྱི་ཀྲུའུ་ཞིའི་འགན་གཅིག་ལྕོགས་སུ་འཁུར་མཁན་ལའོ་ཨར་ཁ་སི་ཐི་ལོ་ལ་མཇལ་འཕྲད་གནང་།

རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཝུའུ་པང་གོ་ཡིས་ཚེས་ལྔ་ཉིན་མི་དམངས་ཚོགས་ཁང་ཆེན་མོའི་ནང་ཁུ་པ་རྒྱལ་སྲིད་ཨུ་ཡོན་ལྷན་ཁང་གི་ཀྲུའུ་ཞི་དང་པུའུ་ཀྲང་གྲོས་ཚོགས་ཀྱི་ཀྲུའུ་ཞིའི་འགན་གཅིག་ལྕོགས་སུ་འཁུར་མཁན་ལའོ་ཨར་ཁ་སི་ཐི་ལོ་ལ་མཇལ་འཕྲད་གནང་།

མཇལ་འཕྲད་གནང་སྐབས་ཝུའུ་པང་གོ་ཡིས་གསུངས་རྒྱུར། ཀྲུང་གོ་དང་ཁུ་པ་རྒྱལ་ཁབ་གཉིས་ཀྱིས་འབྲེལ་བ་བཙུགས་ནས་ལོ་ང་གཉིས་ཀྱི་རིང་ལ་ཕན་ཚུན་ལ་རྒྱུས་ལོན་དང་ཕན་ཚུན་ལ་རྒྱབ་སྐྱོར་བྱས་པས་ཕྱོགས་གཉིས་བར་མཛའ་བཤེས་ཟབ་མོ་ཆགས་ཡོད་པར་མ་ཟད་གྲོགས་པོ་བཟང་བོ་དང་བློ་མཐུན་བཟང་བོ། སྤུན་ཟླ་བཟང་བོ་བཅས་སུ་གྱུར་ཡོད། ཉེ་བའི་ལོ་འགའི་རིང་ལ་ཕྱོགས་གཉིས་ཀྱིས་མཉམ་དུ་འབད་བརྩོན་བྱས་འོག ཀྲུང་གོ་དང་ཁུ་པའི་འབྲེལ་བ་སྔར་ལས་ཇེ་བཟང་ལ་སོང་བ་དང་ཕྱོགས་ཡོངས་ནས་འཕེལ་རྒྱས་སུ་འགྲོ་བའི་དུས་རིམ་གསར་བར་བསླེབས། ཀྲུང་གོ་ཕྱོགས་ཀྱིས་ཁུ་པ་ཕྱོགས་ཀྱིས་ཐེ་ཝན་དང་བོད་ལ་འབྲེལ་བ་ཡོད་པ། མིའི་དབང་ཆ་སོགས་གནད་དོན་ཐད་ནས་རྒྱབ་སྐྱོར་བྱས་པར་བཀའ་དྲིན་ཞུ་བར་མ་ཟད། སྔོན་ཆད་དང་འདྲ་བར་ཁུ་པ་མི་དམངས་ཀྱིས་རྒྱལ་ཁབ་ཀྱི་བདག་དབང་སྲུང་སྐྱོབ་དང་ཕྱི་ཕྱོགས་ཀྱི་ཐེ་གཏོགས་ལ་ངོ་རྒོལ་བྱེད་པར་རྒྱབ་སྐྱོར་བྱེད་པ་དང་། ཁུ་པ་རྒྱལ་ཁབ་ཀྱིས་རྒྱལ་ཁབ་རང་གི་གནས་ཚུལ་ལྟར་གདམ་གསེས་བྱས་པའི་ཆབ་སྲིད་ཀྱི་སྒྲིག་སྲོལ་དང་འཕེལ་རྒྱས་ཀྱི་བགྲོད་ལམ་རྒྱབ་སྐྱོར་བྱེད་པར་མ་ཟད་མུ་མཐུད་ནས་ཁུ་པའི་དཔལ་འབྱོར་དང་སྤྱི་ཚོགས་འཕེལ་རྒྱས་སུ་གཏོང་བའི་ཐད་ལ་རོགས་སྐྱོར་འདོན་སྤྲོད་བྱེད་རྒྱུ་ཡིན་ཟེར།

ཝུའུ་པང་གོ་ཡིས་གསུངས་རྒྱུར། ཀྲུང་གོ་དང་ཁུ་པ་རྒྱལ་ཁབ་གཉིས་ཀྱིས་རྒྱལ་ཁབ་རང་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་འཛུགས་སྐྲུན་བྱེད་པར་འབད་བརྩོན་བྱེད་བཞིན་ཡོད་པ་དང་། དཔལ་འབྱོར་འཕེལ་རྒྱས་དང་མང་ཚོགས་ཀྱི་འཚོ་བ་འགན་སྲུང་དང་ལེགས་བཅོས་བྱེད་པ་སོགས་ཀྱི་ཐད་ནས་ཐུན་མོང་མ་ཡིན་པའི་ཉམས་མྱོང་བསགས། ཀྲུང་གོ་རྒྱལ་ཡོངས་དམངས་ཆེན་གྱིས་ཁུ་པ་རྒྱལ་ཡོངས་དམངས་ཆེན་དང་མཉམ་དུ་རིམ་པ་སོ་སོ་དང་ཁྱབ་ཁོངས་སོ་སོ་ནས་བརྗེ་རེས་དང་མཉམ་ལས་བཟང་བོ་བྱེད་པ་དང་། དམངས་གཙོ་བཅའ་ཁྲིམས་དང་རྒྱལ་སྐྱོང་སྲིད་འཛིན་སོགས་ཀྱི་ཐད་ནས་ཕན་ཚུན་ལ་སློབ་སྦྱོང་དང་ཕན་ཚུན་དཔྱད་གཞིར་འཛིན་པར་ཤུགས་བསྣོན་པ། སྣ་མང་གྲོས་ཁང་ནང་རྐྱེན་ཁྲོད་དུ་འབྲེལ་འདྲིས་དང་གཞོགས་འདེགས་དམ་པོ་བྱས་ནས་མུ་མཐུད་དུ་ཀྲུང་གོ་དང་ཁུ་པའི་འབྲེལ་བའི་ནང་དོན་ཕུན་སུམ་ཚོགས་པར་གཏོང་འདོད་ཡོད་ཟེར།

ལའོ་ཨར་གྱིས་བཤད་དོན། རྒྱལ་ཁབ་གཉིས་ཀྱི་སྔོན་བྱོན་མགོ་ཁྲིད་པས་མཉམ་དུ་འབད་བརྩོན་བྱས་འོག ཁུ་པ་དང་ཀྲུང་གོའི་འབྲེལ་བ་བརྟན་འཇགས་སྒོས་འཕེལ་རྒྱས་སུ་སོང་བ་དང་ད་ལྟ་ལོ་རྒྱུས་ཀྱི་ཆེས་བཟང་བའི་དུས་སྐབས་སུ་གནས་ཡོད། རྒྱལ་སྤྱི་དང་ས་གནས་ཀྱི་གནས་བབ་ལ་འགྱུར་ལྡོག་བྱུང་བའི་རྒྱབ་ལྗོངས་འོག་ཏུ་ཁུ་པ་རྒྱལ་ཁབ་ཀྱིས་ཀྲུང་གོ་བར་གྱི་མཛའ་མཐུན་མཉམ་ལས་འབྲེལ་བ་སྔར་ལས་འཕེལ་རྒྱས་སུ་གཏོང་བར་མཐོང་ཆེན་བྱེད་བཞིན་ཡོད། ཁུ་པ་དང་ཀྲུང་གོ་རྒྱལ་ཁབ་གཉིས་ཀྱི་མདུན་དུ་དཔལ་འབྱོར་འཕེལ་རྒྱས་དང་མང་ཚོགས་ཀྱི་འཚོ་བ་ལེགས་བཅོས་བྱེད་པའི་ཐུན་མོང་གི་ལས་འགན་གནས་ཡོད་པ་དང་། ཁུ་པ་ཕྱོགས་ཀྱིས་ཀྲུང་གོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཕྱོགས་ཀྱི་ཉམས་མྱོང་བརྗེ་རེས་བྱེད་པར་ཧ་ཅང་མཐོང་ཆེན་བྱེད་ཀྱིན་ཡོད་པར་མ་ཟད། ཀྲུང་གོ་དང་འདྲ་བར་ཧུར་ཐག་སྒོས་དཔལ་འབྱོར་དང་སྤྱི་ཚོགས་སྙོམས་སྒྲིག་བྱེད་ཐབས་སྣ་ཚོགས་ལག་བསྟར་བྱས་ནས་མུ་མཐུད་དུ་རྒྱལ་ཁབ་འཕེལ་རྒྱས་སུ་གཏོང་རྒྱུ་ཡིན་ཟེར།