ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཚེས29ཉིན་གྱི་དུས་ཚོད10དང་སྐར་མ3སྟེང་། ཉིན་བཅུ་གསུམ་རིང་གི་བར་སྣང་དུ་འཕུར་བསྐྱོད་བྱས་པ་བརྒྱུད་རྗེས། ལྷ་གྲུ་དགུ་བ་རྟགས་ཅན་གྱི་མི་སྡོད་འཕུར་གྲུ་དེ་བདེ་བླག་ངང་སར་བབས་ཤིང་།མཁའ་བསྐྱོད་པ་ཅིན་ཧེ་ཕིན་དང་ལིག་ཝང་།ལིག་ཡང་གསུམ་ཀྱང་བདེ་འཇགས་ངང་ཕྱིར་ལོག ནམ་མཁའི་ཕོ་བྲང་དང་པོ་དང་ལྷ་གྲུ་དགུ་བ་རྟགས་ཅན་གྱི་མི་སྡོད་སྦྲེལ་མཐུད་ཀྱི་ལས་འགན་རྒྱལ་ཁའི་ངང་ལེགས་འགྲུབ་བྱུང་ཡོད།ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་།ཀྲུང་དབྱང་དམག་ཨུ་བཅས་ཀྱིས་གློག་འཕྲིན་བསྐུར་ནས་རྟེན་འབྲེལ་ཞུས།ཀྲུང་གུང་ཀྲུང་དབྱང་ཆབ་སྲིད་ཅུའུ་རྒྱུན་ཨུའམ། རྒྱལ་སྲིད་སྤྱི་ཁྱབ་ཁང་གི་ཙུང་ལིས་ཝུན་ཅ་པའོ་དང་།ཀྲུང་གུང་ཀྲུང་དབྱང་ཆབ་སྲིད་ཅུའུ་རྒྱུན་ཨུའམ། ཀྲུང་དབྱང་སྒྲིག་ཨུའི་ཧྲུའུ་ཅི་ཧི་ཀོ་ཆང་།ཀྲུང་གུང་ཀྲུང་དབྱང་ཆབ་སྲིད་ཅུའུ་རྒྱུན་ཨུའམ། ཀྲུང་དབྱང་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཀྲོའུ་ཡུང་ཁིང་སོགས་ཀྱི་པེ་ཅིན་མཁའ་བསྐྱོད་འཕུར་གཏོང་ཚོད་འཛིན་ལྟེ་གནས་སུ་འཕུར་གྲུ་ཕྱིར་ལོག་པའི་གནས་ཚུལ་ངོ་མར་གཟིགས་ཤིང་།ཝུན་ཅ་པའོ་ཡིས་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་།ཀྲུང་དབྱང་དམག་ཨུ་གསུམ་གྱི་རྟེན་འབྲེལ་གློག་འཕྲིན་སྒྲོག་འདོན་མཛད།

སྔ་དྲོའི་དུས་ཚོད་དགུ་ལྷག་གི་སྟེང་།ཝུན་ཅ་པའོ་དང་ཧི་ཀོ་ཆང་།ཀྲོའུ་ཡུང་ཁིང་སོགས་མགོ་ཁྲིད་པེ་ཅིན་མཁའ་བསྐྱོད་འཕུར་གཏོང་ཚོད་འཛིན་ལྟེ་གནས་ཀྱི་འཕུར་གཏོང་ཚོད་འཛིན་ཚོམས་ཁང་ཆེན་མོའི་ནང་།ལྟེ་གནས་ཀྱིས་བཀོད་འདོམས་ལྟར་མངོན་པའི་མ་ལག་བརྒྱུད་དེ་ལྷ་གྲུ་དགུ་བའི་འཕུར་གྲུ་ཕྱིར་ལོག་པའི་གནས་ཚུལ་ངོ་མར་གཟིགས། འཕུར་གཏོང་ཚོད་འཛིན་ལྟེ་གནས་ཀྱི་ཚོམས་ཆེན་ནང་དུ།གློག་རྡུལ་བརྙན་ཡོལ་སྟེང་དུ་དུས་ལྟར་ལྷ་གྲུ་དགུ་བའི་འཕུར་གྲུ་ཡི་འགུལ་བསྐྱོད་རྗེས་ཤུལ་དང་ཟུར་ལྟའི་གྲངས་ཚད་མངོན་པར་ཤར་ཡོད་ཅིང་།ལས་གནས་སོ་སོའི་ལས་བྱེད་མི་སྣས་གོ་རིམ་ཡོད་ཅིང་བྲེལ་འཚུབ་ཆེ་བའི་ངང་བྱ་བ་བསྒྲུབ་བཞིན་ཡོད།

ལྷ་གྲུ་དགུ་བའི་འཕུར་གྲུ་དེ་ཟླ་དྲུག་པའི་ཚེས་བཅུ་དྲུག་ཉིན་གྱི་ཕྱི་དྲོའི་དུས་ཚོད་བཅོ་བརྒྱད་དང་སྐར་མ་སོ་བདུན་སྟེང་།ཅིག་ཆོན་འཁོར་སྐར་འཕེན་གཏོང་ལྟེ་གནས་ནས་མཁའ་དབྱིངས་སུ་འཕུར་གཏོང་བྱས་ཤིང་།སྔ་གཞུག་ཏུ་ནམ་མཁའི་ཕོ་བྲང་དང་པོ་རྟགས་ཅན་གྱི་དམིགས་འབེན་འཕུར་བསྐྱོད་འཕྲུལ་ཆས་ཀྱིས་བདེ་བླག་ངང་རང་འགུལ་དང་ལག་འགུལ་ལ་བརྟེན་ནས་ཐེངས་གཉིས་ལ་སྦྲེལ་མཐུད་བྱེད་པར་ཚོད་འཛིན་བྱས།འཕུར་ལམ་དུ་འཕུར་བསྐྱོད་བྱེད་སྐབས།མཁའ་བསྐྱོད་པ་ཅིན་ཧེ་ཕིན་དང་ལིག་ཝང་།ལིག་ཡུང་གསུམ་གྱིས་འཆར་གཞི་ལྟར་བར་སྣང་གི་ཚན་རིག་ཚོད་ལྟ་དང་ལག་རྩལ་ཚོད་ལྟ་རབས་དང་རིམ་པ་སྤེལ་ཏེ་ཕུན་སུམ་ཚོགས་པའི་གྲུབ་འབྲས་བླངས། དུས་ཚོད་དགུ་དང་སྐར་མ་སོ་བརྒྱད་སྟེང་ཕྱིར་ལོག་གྲུ་སྒམ་དང་ནང་ལོག་གྲུ་སྒམ་གཉིས་ཁ་བྲལ་སོང་།གློག་རྡུལ་བརྙན་ཡོལ་སྟེང་གི་བརྙན་རིས་གསལ་བོ་ཤར་ཡོད་པ་ནི་འཕུར་གྲུའི་ཕྱིར་ལོག་གྲུ་སྒམ་གྱི་འཕུར་བསྐྱོད་མཐོ་ཚད་མུ་མཐུད་དུ་ཇེ་དམའ་རུ་སོང་སྟེ།བར་སྣང་ནས་མེས་རྒྱལ་གྱི་པང་དུ་ཕྱིར་ལོག

དུས་ཚོད་བཅུ་དང་སྐར་མ་གསུམ་སྟེང་།རླངས་རིམ་ཆེན་པོ་སྟུག་པོ་དེ་བརྒལ་རྗེས།ཕྱིར་ལོག་གྲུ་སྒམ་དེ་ནང་སོག་དབུས་རྒྱུད་ཀྱི་སྔོན་དཔག་གཏན་འཁེལ་བྱས་པའི་ཁྱབ་ཁོངས་སུ་བདེ་འཇགས་ངང་སར་བབས།འཚོལ་སྐྱོབ་དང་ཕྱིར་ལོག་གི་འགན་ཁུར་བའི་ཞི་ཨན་འཁོར་སྐར་ཚད་ལེན་ཚོད་འཛིན་ལྟེ་གནས་ཀྱི་ཁོངས་གཏོགས་འབབ་ཚིགས་ཀྱིས་མྱུར་དུ་དམིགས་འབེན་རྙེད་དེ།བར་སྣང་འཚོལ་བསྐྱོད་ཡན་ལག་རུ་ཁག་དུས་དང་པོའི་ནང་དུ་ཕྱིར་ལོག་གྲུ་སྒམ་སར་འབབ་སའི་ཡུལ་དངོས་སུ་ཐོན་ཡོད།ཕྱིར་ལོག་གྲུ་སྒམ་གྱི་སྒོ་ཕྱེས་རྗེས།དུས་ཡུན་ཐུང་ངུའི་ནང་དུ་ས་ངོས་ཀྱི་ལྗིད་ཤུགས་ཡང་བསྐྱར་གོམས་ལོབས་སུ་བྱེད་པ་བརྒྱུད་དེ།མཁའ་བསྐྱོད་པ་ཅིན་ཧེ་ཕིན་དང་ལིག་ཝང་།ལིག་ཡུང་གསུམ་སྔ་གཞུག་ཏུ་བདེ་ཐང་གིས་གྲུ་སྒམ་ནས་ཕྱིར་བུད།

དུས་ཚོད་བཅུ་གཅིག་དང་སྐར་མ་ཉེར་ལྔའི་སྟེང་།མི་སྡོད་མཁའ་བསྐྱོད་བཟོ་སྐྲུན་གྱི་སྤྱིའི་བཀོད་འདོམས་པ་ཁྲང་བན་ཆོན་གྱིས་པེ་ཅིན་མཁའ་བསྐྱོད་འཕུར་གཏོང་ཚོད་འཛིན་ལྟེ་གནས་སུ་བསྒྲགས་དོན།ལྷ་གྲུ་དགུ་བའི་འཕུར་གྲུའི་ཕྱིར་ལོག་གྲུ་སྒམ་དེ་ནང་སོག་གི་འབབ་ས་གཙོ་བོ་རུ་བདེ་འཇགས་ངང་སར་བབས་ཤིང་།མཁའ་བསྐྱོད་པ་གསུམ་པོའི་ལུས་ཕུང་གནས་ཚུལ་ཧ་ཅང་བཟང་།ནམ་མཁའི་ཕོ་བྲང་དང་པོ་དང་ལྷ་གྲུ་དགུ་བ་རྟགས་ཅན་གྱི་མི་སྡོད་འཕུར་གྲུ་གཉིས་ཀྱི་སྦྲེལ་མཐུད་འགན་ཁུར་རྒྱལ་ཁའི་ངང་ལེགས་འགྲུབ་བྱུང་ཞེས་བསྒྲགས། སྤྲོ་ཞིང་སྐྱིད་པའི་སྣང་ཚུལ་ཁྲོད་ཝུན་ཅ་པའོ་ཡིས་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་།ཀྲུང་དབྱང་དམག་ཨུའི་རྟེན་འབྲེལ་ཞུ་ཡིག་སྒྲོག་འདོན་མཛད།རྟེན་འབྲེལ་ཞུ་ཡིག་ལས་བསྟན་དོན།ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་།ཀྲུང་དབྱང་དམག་ཨུ་ཡིས་ཆེད་དུ་རྒྱལ་ཁའི་ངང་ཐེངས་འདིའི་འགན་ཁུར་ལེགས་འགྲུབ་བྱུང་མཁན་གྱི་མཁའ་བསྐྱོད་པ་དང་ཐེངས་འདིའི་འགན་ཁུར་ནང་ཞུགས་པའི་ཚན་རྩལ་ལས་བྱེད་པ་དང་ལས་བཟོ་པ།བཅིངས་འགྲོལ་དམག་གི་བཀོད་འདོམས་པ་སོགས་ལ་ལྷག་བསམ་ཟོལ་མེད་ཀྱིས་རྟེན་འབྲེལ་ཞུས་ཤིང་སྙིང་ཉེ་བའི་འཚམས་འདྲི་མཛད་ཡོད།

དེ་རྗེས་ཝུན་ཅ་པའོ་དང་ཧི་ཀོ་ཆིང་།ཀྲོའུ་ཡུང་ཁིང་སོགས་མགོ་ཁྲིད་བློ་མཐུན་རྣམས་མཁའ་བསྐྱོད་འཕུར་གཏོང་ཚོད་འཛིན་ལྟེ་གནས་ཚོམས་ཆེན་གྱི་ལས་སྟེགས་སུ་ཕེབས་ཏེ། ཚོད་ལྟའི་བྱ་བའི་ནང་ཞུགས་པའི་མི་སྣ་རྣམས་ལ་ཕྱག་འཇུ་མཛད་ནས་ཐུན་མོང་གིས་རང་རྒྱལ་གྱིས་ཐོག་དང་པོར་མི་སྡོད་སྦྲེལ་མཐུད་འགན་ཁུར་རྒྱལ་ཁའི་ངང་ལེགས་འགྲུབ་བྱུང་བར་རྟེན་འབྲེལ་ཞུས།ཀའོ་པའོ་ཞུན་དང་ལིང་ཀོང་ལའེ།མཱ་ཁད་སོགས་པེ་ཅིན་མཁའ་བསྐྱོད་འཕུར་གཏོང་ཚོད་འཛིན་ལྟེ་གནས་སུ་མཉམ་དུ་འཕུར་གྲུ་ཕྱིར་ལོག་པའི་གནས་ཚུལ་ངོ་མར་བལྟས་པ་རེད།  །