ཉེ་ལམ།  མཚོ་སྔོན་ཞིང་ཆེན་དམངས་ཁྲོད་རིག་རྩལ་པའི་མཐུན་ཚོགས་ནས་རྒྱུས་ལོན་བྱུང་བ་ལྟར་ན།  2012ལོའི་སྐབས་དང་པོའི་ཀྲུང་གོའི་མཛའ་གཞས་ཏེ་བོད་ཀྱི་ལ་གཞས་འགྲན་བསྡུར་ཀན་སུའུ་འགྲན་ཁུལ་ནས་ཕྱོགས་མང་པོའི་འོས་སྦྱོར་དང་འདེམས་སྒྲུག་འོག་འགྲན་ཞུགས་པའི་མིང་ཐོ་ཁྱབ་བསྒྲགས་བྱས་ཡོད་དེ། བསྡོམས་པས་གླུ་བ3དང་གླུ་མ3ཐེངས་འདིའི་འགྲན་ཚོགས་སྟེང་ཞུགས་རྒྱུ་ཡིན་ཞིང་། ཁོ་ཚོ་ནི་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ཀླུ་ཆུ་རྫོང་གི་མགོན་པོ་རྣམ་རྒྱལ་དང་། མེ་ཏོག་མཚོ། རིག་འཛིན་ལྷ་མོ། རྨ་ཆུ་རྫོང་གི་དཀོན་མཆོག་བསམ་འགྲུབ་དང་ཚེ་རིང་སྒྲོལ་མ། བསང་ཆུ་རྫོང་གི་སངས་རྒྱས་མཁར་བཅས་ཡིན།  
         རྒྱུས་ལོན་བྱུང་བ་ལྟར་ན། ཐེངས་འདིའི་འགྲན་བསྡུར་ནང་ས་ཁུལ་འགྲན་ཞུགས་པ་འདེམས་ཐོན་བྱུང་རྗེས། ཟླ7པའི་ཟླ་སྨད་ལ་མཚོ་སྔོན་མདོ་ལ་རྫོང་བཙུན་མོ་དམར་ཡག་མའི་གནས་བསྐོར་མཛེས་ལྗོངས་སུ་རྟིང་རྩོད་འགྲན་བསྡུར་སྤེལ་རྒྱུ་ཡིན་པ་དང་མཚུངས་སུ་སྐབས་དང་པོའི་རྒྱལ་ཡོངས་བོད་ཀྱི་ལ་གཞས་བགྲོ་གླེང་ཚོགས་འདུ་བསྡུ་རྒྱུ་རེད།