ཀྲུང་གོའི་བོད་ཀྱི་དྲ་བའི་འཕྲིན། ཉེ་དུས་གསར་འགོད་པས་བོད་རང་སྐྱོང་ལྗོངས་ལྷ་ས་གྲོང་ཁྱེར་དབུལ་སྐྱོར་གཞུང་ལས་ཁང་ནས་ཤེས་རྟོགས་བྱས་པར་གཞིགས་ན། ད་ལོར་ལྷ་ས་གྲོང་ཁྱེར་གྱིས་དཀའ་ངལ་ཆེ་ཤོས་ཀྱི་མང་ཚོགས་ལ་དོ་ཁུར་ཆེ་ཤོས་བྱེད་པ་དང་དབུལ་ཕོངས་མང་ཚོགས་ཀྱི་ཁ་ཚ་དགོས་གཏུགས་ཀྱིས་ཐག་གཅོད་བྱེད་དགོས་པའི་གནད་དོན་སྔོན་ལ་ཐག་གཅོད་བྱ་རྒྱུ་དེ་དབུལ་སྐྱོར་གྱི་ལས་འགན་ཨང་དང་པོར་བརྩིས་ནས། དབུལ་ཕོངས་དབུལ་སྒྲོལ་ཐུབ་རྒྱུར་སྣེ་ཁྲིད་བྱས་པ་དང་ཞིང་འབྲོག་ལས་ཀྱི་ཐོན་འཕར་དང་ཞིང་འབྲོག་མང་ཚོགས་ཀྱི་འབབ་འཕར་ལ་སྐུལ་མ་བཏང་བ་རེད།

ལྷ་ས་གྲོང་ཁྱེར་དབུལ་སྐྱོར་གཞུང་ལས་ཁང་གི་ཀྲུའུ་རེན་ལྷག་པ་དོན་གྲུབ་ཀྱིས་ངོ་སྤྲོད་གནང་བར་གཞིགས་ན། ད་ལོར་ལྷ་ས་གྲོང་ཁྱེར་གྱི་དབུལ་སྐྱོར་རྣམ་གྲངས་གཙོ་བོ་ནི། ཤང་ཧྲིལ་པོར་སྐུལ་སྤེལ་གཏོང་རྒྱུ་དང་སྤྱི་ཡོངས་ལ་དབུལ་སྐྱོར་བྱེད་རྒྱུ། ངལ་ནུས་ལྷག་མ་ཕྱིར་གཏོང་བྱེད་རྒྱུ། ཁྱད་ལྡན་ཐོན་ལས་ལ་དབུལ་སྐྱོར་བྱེད་རྒྱུ། ཡུག་སྦྲེལ་གསར་སྤེལ་གྱི་ཚོད་ལྟ་བྱེད་རྒྱུ། རོགས་རེས་མ་དངུལ་གྱི་ཚོད་ལྟ་བྱེད་རྒྱུ། གནས་གཏན་འཁེལ་གྱི་དབུ་སྐྱོར་བྱེད་རྒྱུ། དབུལ་ཕོངས་དུད་ཚང་གི་བདེ་སྡོད་ལས་གཞི་ལག་བསྟར་བྱེད་རྒྱུ་སོགས་རེད།

ལྷ་ས་གྲོང་ཁྱེར་དབུལ་སྐྱོར་གཞུང་ལས་ཁང་གིས་རྣམ་གྲངས་ཀྱི་མ་དངུལ་མང་དུ་བཏང་ནས་གསར་སྤེལ་བྱེད་ཤུགས་ཆེ་རུ་གཏོང་བ་དང་། མང་ཚོགས་དབུལ་སྒྲོལ་ཕྱུག་འགྱུར་ལ་སྣེ་ཁྲིད་བྱས་ཏེ། གཞི་རིམ་གྱི་རྣམ་པ་རིམ་བཞིན་འགྱུར་ལྡོག་གཏོང་བ་སོགས་ཀྱི་བྱ་ཐབས་བཟུང་ནས། དབུལ་སྐྱོར་ལས་དོན་ཁྲོད་ཀྱི་འགོག་རྐྱེན་སེལ་རྒྱུ་མ་ཟད། ལྗོངས་ནང་ཁུལ་གྱི་ས་ཁུལ་གཞན་དུ་རྟོག་ཞིབ་སློབ་སྦྱོང་དང་ནང་སར་གཟིགས་སྐོར་རྟོག་ཞིབ། ཇུས་འགོད་དང་དོ་དམ་གྱི་སྦྱོང་བརྡར་འཛིན་གྲྭ་གཉེར་བ། དབུལ་ཕོངས་གྲོང་ཚོའི་རོགས་རེས་མ་དངུལ་རྣམ་གྲངས་དོ་དམ་གྱི་སྦྱོང་བརྡར་འཛིན་གྲྭ་གཉེར་བ་སོགས་བྱ་ཐབས་མང་པོ་བཟུང་ནས་དབུལ་སྐྱོར་ལས་དོན་ཁྲོད་ཀྱི་ཞན་ཆ་སེལ་རྒྱུ་རེད།   །