གངས་ལྗོངས་རྡོར་ལུགས་ཐང་ཁ་སྤུས་ལེགས།
ཉེ་ཆར་གངས་ལྗོངས་རྡོར་ལུགས་ཐང་གའི་སྲོལ་གཏོད་མཁན་པོ་ཉན་ཤུལ་རྡོ་རྗེ་དོན་གྲུབ་ལགས་ཀྱིས༼གངས་ལྗོངས་རྡོར་ལུགས་ཐང་ཁ་སྤུས་ལེགས༽ཞེས་པའི་བརྙན་ཡིག་རང་བཞིན་ཅན་གྱི་སྣ་འདུས་ཀྱི་དེབ་ཅིག་སྐུ་ཞབས་ཧོ་ཀྲུང་གི་གཙོ་སྒྲིག་གི་ཕྱག་འགན་འོག་ཀྲུང་གོ་མི་རིགས་བརྙན་ལེན་སྒྱུ་རྩལ་པར་བསྐྲུན་ཁང་ནས་པར་དུ་བསྐྲུན་པ་རེད།དེབ་དེར་བོད་ཀྱི་བསྐལ་བ་ཡ་ཐོག་གི་དུས་ནས་བོད་དུ་རི་མོ་དར་ཏེ།བོན་གྱི་སྐབས་དང།བསྟན་པ་སྔ་དར་དང་ཕྱི་དར།དུས་རབ་རིམ་བྱུང་ནས་བཀའ་གདམས་པའི་རི་མོ་དང་།ཀརྨ་སྒར་བྲིས།སྨན་གསར་ལུགས།སྒར་སྨན་འདྲེས་མ་སོགས་ནས་ཉེ་དུས་བསྟན་པ་ཡང་དར་གྱི་དུས་སྐབས་སུ་རྡོར་ལུགས་ཐང་ཁ་གསར་དུ་བཏོད་པའི་བར་དུ་བོད་ཀྱི་རི་མོ་འཕེལ་འགྲིབ་ཀྱི་ལོ་རྒྱུས་སོགས་གསལ་བོར་འཁོད་པའི་བོད་ཀྱི་རི་མོ་སྐོར་གྱི་སྣ་འདུས་རང་བཞིན་གྱི་སྔར་མེད་གསར་གཏོད་ཀྱི་ཕུལ་བྱུང་གི་དེབ་སྤུས་ལེགས་ཤིག་ཏུ་འཁུམས་སོ། །
དེབ་དེར་ཁྱོན་ཤོག་གྲངས་ཉིས་བརྒྱ་བཞི་བཅུ་ཞེ་བརྒྱད་ཡོད་པ་དང་།དེར་བོད་རྒྱ་དབྱིན་སོགས་ཡིག་རིགས་བཞིའི་སྒོ་ནས་བོད་ཀྱི་རི་མོའི་སྒྱུ་རྩལ་དང་འབྲེལ་བའི་ལོ་རྒྱུས་དང་།རྡོར་ལུགས་ཐང་ཁའི་གསར་གཏོད་ཀྱི་བརྒྱུད་རིམ་དང་།བོད་ཀྱི་རྡོར་ལུགས་ཐང་ཁའི་ཁྱད་ཆོས།རྡོར་ལུགས་ཐང་ཁའི་ཕུལ་བྱུང་གི་རི་མོ།རྡོ་ལུགས་ཐང་ཁའི་སྲོལ་གཏོད་མཁན་པོ་ཉན་ཤུལ་རྡོ་རྗེ་དོན་གྲུབ་ཀྱི་མི་ཚེའི་བརྒྱུད་རིམ་སོགས་གསལ་བོར་བཀོད་ཅིང་།རྡོར་ལུགས་ཐང་ཁའི་རས་གཞི་བཟོ་སྟངས་དང་ཚོན་བྱུག་སྟངས།བཅད་འགྲོ་སྟངས་སོགས་ཐང་ཁའི་ལས་ལ་འཇུག་མཁན་དག་ལ་ཁ་ཚ་དགོས་གཏུག་གིས་ཚད་གཞིར་འཛིན་ཆོག་པའི་དེབ་ཅིག་ཏུ་གྱུར་འདུག