རྒྱལ་སྤྱིའི་རུལ་རྒོལ་ཅུའུ་མཉམ་འབྲེལ་ལྷན་ཚོགས་ཀྱི་ཞིབ་བསྡུར་ཚོགས་འདུ་སྐབས་བཞི་བ་ཚེས་ཉེར་དྲུག་ཉིན་ལེའོ་ཉིན་ཞིང་ཆེན་ཏ་ལེན་གྲོང་ཁྱེར་ནས་ཚོགས་མགོ་བརྩམས་ལ། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ། ཀྲུང་དབྱང་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཀྲིག་ཡུང་ཁང་གྲོས་ཚོགས་སུ་ཞུགས་ཏེ་གསུངས་བཤད་གནང་།

རྒྱལ་སྤྱིའི་རུལ་རྒོལ་ཅུའུ་མཉམ་འབྲེལ་ལྷན་ཚོགས་ཀྱི་ཞིབ་བསྡུར་ཚོགས་འདུ་སྐབས་བཞི་བ་ཚེས་ཉེར་དྲུག་ཉིན་ལེའོ་ཉིན་ཞིང་ཆེན་ཏ་ལེན་གྲོང་ཁྱེར་ནས་ཚོགས་མགོ་བརྩམས་ལ། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ། ཀྲུང་དབྱང་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཀྲིག་ཡུང་ཁང་གྲོས་ཚོགས་སུ་ཞུགས་ཏེ་གསུངས་བཤད་གནང་།

ཀྲིག་ཡུང་ཁང་གིས་ཐོག་མར་ཀྲུང་གོ་སྲིད་གཞུང་གི་ཚབ་མཛད་དེ་གྲོས་ཚོགས་བསྡུས་པར་དགའ་སྤྲོའི་རྟེན་འབྲེལ་ཞུས་ཤིང་གྲོས་ཚོགས་སུ་ཞུགས་པའི་རྒྱལ་ཁབ་སོ་སོའི་འཐུས་མི་ལ་སྤྲོ་སེམས་འཁོལ་བའི་ངང་དགའ་བསུ་ཞུས། ཁོང་གིས་གསུངས་རྒྱུར། ཀྲུང་གོ་གུང་ཁྲན་ཏང་དང་ཀྲུང་གོ་སྲིད་གཞུང་གིས་བློ་ཐག་རྦད་ཆོད་ཀྱིས་ཁྲིམས་ལྟར་རྒྱལ་སྐྱོང་གི་གཞི་རྩའི་སྲིད་ཇུས་ལག་བསྟར་བྱས་པ་དང་། ཁྲིམས་འཛིན་ལས་ཁུངས་ཀྱི་བྱེད་ནུས་འདོན་སྤེལ་བྱེད་རྒྱུར་གཙིགས་འཛིན་བྱས་ཏེ། ཁྲིམས་ལྟར་རུལ་སུངས་ནག་ཉེས་ལ་ཕན་འབྲས་ལྡན་པའི་སྔོན་འགོག་དང་ཉེས་ཆད་བཅད་ནས་མངོན་གསལ་གྱི་ཕན་འབྲས་གསར་བ་བླངས་ཡོད་དེ། གཅིག་ནི་རུལ་སུངས་ནག་ཉེས་ལ་ཉེས་ཆད་གཅོད་ཤུགས་མུ་མཐུད་དུ་ཆེ་རུ་བཏང་ཡོད། མི་དམངས་ཞིབ་དཔྱོད་ཁང་གིས་གྱོད་དོན་གྱི་ཁུངས་སྣེ་དོ་དམ་ཐད་ཤུགས་བསྣན་པ་དང་། མྱུལ་ཞིབ་བཀོད་འདོམས་རོགས་ལས་ཀྱི་སྒྲིག་གཞི་འཐུས་ཚང་དུ་བཏང་ཞིང་། ཁྲིམས་ལུགས་ལག་བསྟར་དང་སྒྲིག་ཁྲིམས་ཞིབ་བཤེར་ལག་བསྟར་སྡེ་ཁག་ལ་རམ་འདེགས་དམ་པོ་བྱས་ཏེ་ཁྲིམས་ལྟར་རུལ་སུངས་ནག་ཉེས་ལ་ཞིབ་གཅོད་ནན་མོ་བྱས། མི་དམངས་ཁྲིམས་ཁང་གིས་ཁྲིམས་ལུགས་ཀྱི་མདུན་དུ་མི་ཚང་མ་འདྲ་མཉམ་ཡིན་པའི་རྩ་དོན་རྒྱུན་འཁྱོངས་བྱས་ཏེ་ནན་ལྷོད་ཟུང་འབྲེལ་གྱི་ཉེས་དོན་སྲིད་ཇུས་ལག་ལེན་མཐའ་འཁྱོལ་བྱས་པ་དང་། ཁྲིམས་ལྟར་རུལ་སུངས་ནག་ཉེས་ཀྱི་གྱོད་དོན་ལ་འདྲི་གཅོད་བྱས་ནས་ཁྲིམས་ཆད་ཀྱི་ཟིལ་ཤུགས་ནུས་པ་འདོན་སྤེལ་བྱས་ཡོད། གཉིས་ནི་རུལ་སུངས་ནག་ཉེས་སྔོན་འགོག་བྱེད་པའི་ཕན་འབྲས་མུ་མཐུད་དུ་ཕྱིར་མངོན་ཡོད་དེ། ཁྲིམས་ཆད་དང་སྔོན་འགོག་ཟུང་འབྲེལ་དང་། སྔོན་འགོག་གཙིགས་སུ་འཛིན་པ་རྒྱུན་འཁྱོངས་བྱས་ཏེ་གྱོད་དོན་ལ་དབྱེ་ཞིབ་དང་ཐ་ཚིག་དྲིལ་བསྒྲགས་སློབ་གསོ་ལ་ཤུགས་བསྣན་ནས་ཧུར་ཐག་གིས་རུལ་སུངས་ནག་ཉེས་སྔོན་འགོག་དང་ཇེ་ཉུང་དུ་བཏང་ཡོད། ཁྲིམས་འཛིན་སྒྲིག་གཞི་བཅོས་བསྒྱུར་གཏིང་ཟབ་སྒོས་སྤེལ་བ་དང་། ཁྲིམས་འཛིན་དབང་ཆ་བཀོད་སྒྲིག་འཐུས་ཚང་དུ་བཏང་ནས་ཁྲིམས་འཛིན་དམངས་གཙོ་རྒྱ་བསྐྱེད་པ་དང་ཁྲིམས་འཛིན་ཡོངས་བསྒྲགས་གཏིང་ཟབ་དུ་སྤེལ་ནས་ཁྲིམས་འཛིན་དབང་ཆ་མངོན་གསལ་སྒོས་འཁོར་སྐྱོད་བྱེད་པར་ཁག་ཐེག་བྱས། གསུམ་ནི་རུལ་སུངས་ངོ་རྒོལ་གྱི་རྒྱལ་སྤྱིའི་ཁྲིམས་འཛིན་མཉམ་ལས་མུ་མཐུད་དུ་གཏིང་ཟབ་ཏུ་སྤེལ། ཀྲུང་གོས་རྒྱལ་ཁབ་སོ་སོ་དང་ས་གནས་སོ་སོའི་བར་དུ་རུལ་སུངས་ངོ་རྒོལ་གྱི་འབྲེལ་འདྲིས་དང་མཉམ་ལས་སྤེལ་བའི་ཐད་ཤུགས་བསྣན་ནས་ཧུར་ཐག་གིས་རུལ་སུངས་ངོ་རྒོལ་གྱི་འབྲེལ་ཡོད་རྒྱལ་སྤྱིའི་རྩ་འཛུགས་ཁྲོད་ཞུགས་པ་དང་། རུལ་སུངས་ངོ་རྒོལ་ཕྱོགས་མང་སྤྱི་ཆིངས་ཀྱི་རྣམ་གྲངས་མང་པོའི་ནང་ཞུགས་པས། རྒྱལ་སྤྱིའི་རུལ་སུངས་ངོ་རྒོལ་གྱི་སྟོབས་ཤུགས་གཙོ་བོར་གྱུར་ཡོད་ཟེར།

ཀྲིག་ཡོང་ཁང་གིས་བསྟན་དོན། རྒྱུ་ནོར་འདེད་ལེན་ནི་རྒྱལ་སྤྱིའི་མཉམ་ལས་ཀྱིས་རུལ་སུངས་ནག་ཉེས་ལ་རྡུང་རྡེག་བྱེད་པའི་བརྒྱུད་རིམ་དང་བྱེད་ཐབས་གཙོ་བོ་ཡིན་ཏེ། མཉམ་འབྲེལ་རྒྱལ་ཚོགས་རུལ་རྒོལ་སྤྱི་ཆིངས་ལག་བསྟར་བྱས་ནས་ཧུར་ཐག་གིས་རུལ་སུངས་རྒྱུ་ནོར་འདེད་ལེན་བྱ་རྒྱུ་ནི་རྒྱལ་ཁབ་སོ་སོ་དང་ས་གནས་སོ་སོའི་རུལ་རྒོལ་ལས་ཁུངས་ཀྱི་ཐུན་མོང་གི་རེ་འདུན་དང་དགོས་ངེས་ཀྱི་བླང་བྱ་ཡིན།སྐབས་འདིའི་ཞིབ་བསྡུར་ཚོགས་འདུས་རྒྱུ་ནོར་འདེད་ལེན་དེ་བརྗོད་བྱ་བྱས་ནས་འབྲེལ་འདྲིས་ཞིབ་བསྡུར་བྱས་པས་རུལ་སུངས་རྒྱུ་ནོར་འདེད་ལེན་བྱེད་པའི་རྒྱལ་སྤྱིའི་མཉམ་ལས་ལ་ཤུགས་སྣོན་པ་དང་།རུལ་སུངས་ལ་ཕན་འབྲས་ལྡན་པའི་སྔོན་འགོག་དང་ཁྲིམས་ཆད་གཅོད་པའི་ཐད་དུ་ནུས་པ་ཆེན་པོ་ཐོན་ངེས་ཡིན། ཀྲུང་གོས་རུལ་སུངས་རྒྱུ་ནོར་འདེད་ལེན་དང་གཞུང་བཞེས་བྱེད་པའི་ཐད་ལ་བརྩི་མཐོང་ཆེན་པོ་བྱེད་བཞིན་ཡོད་དེ། རུལ་སུངས་མཁན་ཕྱི་རུ་འབྲོ་བར་སྔོན་འགོག་དང་ཕྱི་རྒྱལ་ནས་འཛིན་བཟུང་བྱེད་པ། གྱོད་དོན་དང་འབྲེལ་བའི་རྒྱུ་ནོར་ཕྱིར་སློག་པ་སོགས་ཀྱི་སྒྲིག་གཞི་བཙུགས་པ་དང་འཐུས་ཚང་དུ་བཏང་བ་བརྒྱུད་རྒྱལ་ཁབ་སོ་སོ་དང་ས་གནས་སོ་སོའི་བར་མཉམ་ལས་སྤེལ་ཏེ་ཚད་ཆེས་མཐོ་བའི་སྒོ་ནས་རུལ་སུངས་རྒྱུ་ནོར་དང་ནག་ཉེས་ཡོང་སྒོ་ཕན་ནུས་ལྡན་པའི་སྒོ་ནས་འདེད་ལེན་བྱེད་པར་སྐུལ་འདེད་དང་མངོན་འགྱུར་བྱེད་དགོས། ད་ལོའི་ཟླ་གསུམ་པར་རྒྱལ་ཡོངས་དམངས་ཆེན་གྱིས་གྲོས་ཞིབ་བྱས་ཏེ་གྲོས་འཆམ་བྱུང་བའི་ཉེས་དོན་གཏུག་བཤེར་བཅའ་ཁྲིམས་བཟོ་བཅོས་འཆར་ཟིན་གྱིས་མཉམ་འབྲེལ་རྒྱལ་ཚོགས་རུལ་རྒོལ་སྤྱི་ཆིངས་ལས་རྒྱུ་ནོར་འདེད་ལེན་སྐོར་གྱི་གཏན་ཁེལ་དང་སྦྲེལ་མཐུད་བྱས། ཀྲུང་གོས་རྒྱལ་སྤྱིའི་སྤྱི་ཚོགས་དང་མཉམ་དུ་བདག་དབང་ལ་བརྩི་འཇོག་དང་། འདྲ་མཉམ་དང་ཕན་ཚུན་ཕན་པ། མཐུན་པ་ཡོང་ཐབས་དང་མི་མཐུན་པ་སོར་འཇོག དངོས་ཕན་ལ་མཐོང་ཆེན་བཅས་ཀྱི་རྩ་དོན་འོག་རྒྱུ་ནོར་འདེད་ལེན་ནང་དུ་འདུ་བའི་རྒྱལ་སྤྱིའི་རུལ་སུངས་ངོ་རྒོལ་ཐད་ཀྱི་འབྲེལ་འདྲིས་དང་མཉམ་ལས་ལ་ཤུགས་སྣོན་པ་དང་། མུ་མཐུད་དུ་རྒྱལ་མཚམས་བརྒལ་བ་དང་ས་ཆ་བརྒལ་བའི་རུལ་སུངས་ནག་ཉེས་ལ་ཁྲིམས་ཆད་གཅོད་ཤུགས་ཆེ་རུ་བཏང་ནས་རྒྱལ་སྤྱིའི་རུལ་རྒོལ་ལས་དོན་བདེ་བླག་ངང་འཕེལ་རྒྱས་སུ་གཏོང་བར་སྐུལ་འདེད་བྱེད་འདོད་ཡོད་ཟེར།

ཆེས་མཐོ་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་པོ་ཚའོ་ཅན་མེན་གྱིས་ཚོགས་འདུ་མགོ་རྩོམ་པའི་མཛད་སྒོར་མགོ་འཛིན་མཛད།

མཛད་སྒོ་མ་བསྡུས་གོང་དུ་ཀྲིག་ཡུང་ཁང་གིས་གྲོས་ཚོགས་སུ་ཞུགས་པའི་ཕྱི་རྒྱལ་གྱི་སྐུ་མགྲོན་ལ་མཇལ་འཕྲད་གནང་བ་མ་ཟད། གྲོས་ཚོགས་སུ་ཞུགས་པའི་འཐུས་མི་ཡོངས་དང་མཉམ་དུ་དྲན་རྟེན་འདྲ་པར་བླངས་། རྒྱལ་ཁབ་དང་ས་གནས་བརྒྱད་ཅུ་ལྷག་ནས་ཡོང་བའི་སྤྱིའི་ཞིབ་དཔྱོད་དཔོན་དང་ཁྲིམས་འཛིན་པུའུ་ཀྲང་། ལྟ་ཞིབ་པུའུ་ཀྲང་། རུལ་རྒོལ་ལས་ཁུངས་ཀྱི་འགན་འཁུར་པ་དང་རྒྱལ་སྤྱིའི་རྩ་འཛུགས་ཀྱི་མགོ་ཁྲིད་པ། ཆེད་མཁས་པ་སོགས་བསྡོམས་པས་མི་བཞི་བརྒྱ་ལྷག་གྲོས་ཚོགས་སུ་ཞུགས།