ཟླ་དྲུག་པའི་ཚེས་ཉེར་དགུ་ཉིན་ནས་ཟླ་བདུན་པའི་ཚེས་གསུམ་ཉིན་བར། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ་ལིས་ཁྲང་ཁྲུན་སྔ་རྗེས་སུ་ལེའོ་ཉིན་ཞིང་ཆེན་གྱི་ལེའོ་ཡང་དང་ཨན་ཧྲན། དབྱིན་ཁི། ཕན་ཅིན། ཧྲིན་ཡང་སོགས་ས་ཁུལ་དུ་ཕེབས་ཏེ། ཁེ་ལས་དང་མཐོ་རིམ་སློབ་གྲྭ། ཞིང་སྡེ། འདུས་སྡེ། དྲིལ་སྒྲོག་རིག་གནས་ལས་ཁུངས་བཅས་སུ་དཔལ་འབྱོར་འཕེལ་སྟངས་མྱུར་དུ་བསྒྱུར་བ་དང་རིག་གནས་བཅོས་བསྒྱུར་འཕེལ་རྒྱས་སུ་གཏོང་བ་སོགས་ལ་རྟོག་ཞིབ་མཛད།ལིས་ཁྲང་ཁྲུན་གྱིས་ལེའོ་ཉིན་བཟོ་ལས་རྟེན་གཞི་རྙིང་བ་འཕེལ་རྒྱས་སུ་གཏོང་བའི་གནས་ཚུལ་ལ་ཐུགས་ཁུར་གནང་གིན་ཡོད། ཁོང་ཉིད་ཀྲུང་གོ་རྡོ་སྣུམ་ལེའོ་ཡང་རྡོ་སྣུམ་རྫས་འགྱུར་བཟོ་ལས་ཀུང་ཟི་དང་ཨན་ཀང་པ་ཡུས་ཆོན་ཡན་ལག་ཀུང་ཟི། ལེའོ་ཧི་རྡོ་སྣུམ་གོ་མཚོན་བཟོ་སྐྲུན་ཀུང་ཟི། གློག་ལས་ཧྲིན་ཡང་གློག་གནོན་སྒྱུར་ཆས་ཀུང་ཟི། ཀྲུང་གོ་མཁའ་སྐྱོད་བཟོ་ལས་ཧྲིན་ཧྥེ་ཀུང་ཟི་དང་ལིས་མེན་ཀུང་ཟི། ཧྲིན་ཡང་འཕྲུལ་སྟེགས་ཀུང་ཟི་བཅས་སུ་ཕེབས་ཏེ། ཁེ་ལས་ཀྱིས་དེང་རབས་ཁེ་ལས་ལམ་ལུགས་ཧུར་ཐག་སྒོས་སྒྲིག་འཛུགས་བྱེད་པ་དང་། ཞིབ་འཇུག་དང་གསར་སྤེལ་ཚོགས་པ་སྟོབས་དང་ལྡན་པ་བཙུགས་ཏེ། ཞིབ་འཇུག་དང་གསར་སྤེལ་ལ་མ་དངུལ་མང་དུ་བཏང་ནས་རྒྱལ་སྤྱི་དང་རྒྱལ་ནང་གི་ཚོང་རའི་འགྲན་རྩོད་ཁྲོད་གོ་གནས་མཐོན་པོ་འཛིན་དགོས་པའི་སྐུལ་མ་གནང་། ཧྭ་ཁྲིན་རླངས་འཁོར་མ་རྐང་ཚོད་འཛིན་ཀུང་ཟི་རུ་ལིས་ཁྲང་ཁྲུན་གྱིས་ཁེ་ལས་ཀྱིས་ཀྲུང་ཧྭ་རླངས་འཁོར་ཏེ་མིང་དོན་གཉིས་མཚུངས་དང་ངེས་པ་དོན་གྱིས་རྒྱལ་ཁབ་ཀྱི་ཆུ་ཚད་མཚོན་པའི་རང་བཟོས་ཐོན་རྫས་སུ་བསྒྱུར་དགོས་པའི་རེ་བ་བཏོན། ཧྲིན་ཡང་ཡོན་ཏཱ་སྡེ་ཚོགས་དང་ཕན་ཅིན་ཧི་ཡུན་ཀུང་ཟི་སོགས་དམངས་གཉེར་ཁེ་ལས་སུ་ལིས་ཁྲང་ཁྲུན་གྱིས་ཁེ་ལས་རིག་གནས་འཛུགས་སྐྲུན་ཇེ་མགྱོགས་སུ་གཏོང་བ་དང་། ལས་དོན་གྱིས་མི་ཚུར་འགུག་པ་དང་ཟླ་ཕོགས་ཀྱིས་མི་ལ་སྐུལ་མ་གཏོང་བ། ཁེ་ལས་རིག་གནས་ཀྱིས་མི་སེམས་གཅིག་ཏུ་སྒྲིལ་དགོས་པའི་སྐུལ་མ་གནང་། ལིས་ཁྲང་ཁྲུན་གྱིས་ནན་གྱིས་བསྟན་དོན། ཤར་བྱང་ས་ཁུལ་གྱི་བཟོ་ལས་རྟེན་གཞི་རྙིང་བ་དར་རྒྱས་སུ་གཏོང་བའི་ཐད་བླངས་པའི་འཕེལ་རིམ་དྲིལ་སྒྲོག་ཆེན་པོ་བྱེད་པ་དང་། སྤྱི་ཚོགས་ཡོངས་སུ་ཚན་རིག་གི་འཕེལ་རྒྱས་དང་འོད་སྟོང་གི་གྲུབ་འབྲས་དར་སྤེལ་བཏང་སྟེ་ཏང་གི་ཚོགས་ཆེན་ཐེངས་བཅོ་བརྒྱད་པ་རྒྱལ་ཁའི་ངང་འཚོགས་པར་གླེང་ཕྱོགས་ཀྱི་ཁོར་ཡུག་བཟང་བོ་བསྐྲུན་དགོས་ཟེར།ཉེ་བའི་ལོ་འགའི་རིང་ལེའོ་ཉིན་གྱིས་རིག་གནས་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པའི་གོམ་སྟབས་ཇེ་མགྱོགས་སུ་བཏང་བ་དང་། རིག་གནས་སྒྲིག་སྲོལ་བཅོས་བསྒྱུར་ཕྱོགས་ཡོངས་ནས་སྤེལ་ཏེ། ཕྱོགས་གང་ཐད་ནས་ཐོལ་བརྒལ་བྱུང་སྟེ་རྒྱལ་ཡོངས་ཀྱི་མདུན་གྲས་སུ་བསྐྱོད་ཡོད། ལིས་ཁྲང་ཁྲུན་དབྱིན་ཁི་གྲོང་ཁྱེར་ཧི་ལཱེ་ཧྲན་སྡེ་བ་རུ་ཕེབས་ཏེ། གཞི་རིམ་རིག་གནས་དམངས་ཕན་བཟོ་སྐྲུན་འཛུགས་སྐྲུན་གནས་ཚུལ་ལ་རྒྱུས་ལོན་མཛད་པ་དང་། ལེའོ་ཉིན་གྱི་རྒྱང་བསྒྲགས་དང་བརྙན་འཕྲིན་དྲ་བ་དང་ཐད་གཏོང་འཁོར་སྐར་གྱིས་རིག་གནས་བརྡ་འཕྲིན་ཐོན་ཁུངས་མཉམ་སྤྱོད་བཟོ་སྐྲུན་སྡེ་བའི་ནང་དུ་སྤེལ་བའི་སྒྲུབ་སྟངས་ལ་གདེང་འཇོག་མཛད། ཧྲིན་ཡང་གྲོང་ཁྱེར་ཏོ་ཧྥུ་འདུས་སྡེ་རུ་ལིས་ཁྲང་ཁྲུན་གྱིས་ཆེད་ལས་རིག་གནས་བྱ་བ་སྒྲུབ་མཁན་གྱིས་འདུས་སྡེ་རུ་ཟབ་ཞུགས་བྱས་ནས་གཞི་རིམ་རིག་གནས་བྱ་འགུལ་ལ་མཛུབ་སྟོན་གནང་ནས་མང་ཚོགས་ཀྱི་བསམ་བློའི་རིག་གནས་འཚོ་བ་ཕུན་སུམ་ཇེ་ཚོགས་སུ་བཏང་བར་བསྟོད་བསྔགས་ཆེན་པོ་མཛད། ཁོང་ཉིད་ཨན་ཧྲན་གྲོང་ཁྱེར་དཔེ་མཛོད་ཁང་དུ་ཕེབས་ནས་དྲ་བའི་རིག་གནས་དོ་དམ་མ་ལག་འཁོར་སྐྱོད་གནས་ཚུལ་ལ་ལྟ་ཞིབ་མཛད་པ་དང་། ཁོ་ཚོས་དྲ་ཁང་འབྲེལ་མཐུད་བདག་གཉེར་དང་གཅིག་གྱུར་ཁྲིམས་འཛིན་གྱི་གྲུབ་འབྲས་མུ་མཐུད་དུ་སྲ་བརྟན་དུ་བཏང་ནས་བདེ་ཐང་གོ་རིམ་ཅན་གྱི་དྲ་བའི་རིག་གནས་ཁོར་ཡུག་ཅིག་བསྐྲུན་དགོས་པའི་སྐུལ་མ་གནང་། དབྱིན་ཁི་གྲོང་ཁྱེར་སྒྱུ་རྩལ་ཟློས་གར་ཁང་ཚད་ཡོད་ཀུང་ཟི་རུ་ལིས་ཁྲང་ཁྲུན་གྱིས་ཁོ་ཚོས་ཁེ་ལས་ཀྱི་སྒྲིག་གཞི་བཅོས་བསྒྱུར་བྱས་རྗེས་འཁྲབ་སྟོན་བྱེད་ཐེངས་དང་ཟློས་གར་གྱི་སྤུས་ཚད། འཁྲབ་སྟོན་པའི་ཡོང་སྒོ་སོགས་ལྡབ་གཅིག་ཇེ་མཐོར་སོང་བ་ཤེས་འཕྲལ་དགའ་སྤྲོ་ཆེན་པོ་སྐྱེས། ན་ནིང་གི་ཚུན་ལ་ལེའོ་ཉིན་གྱིས་དེང་རབས་ལེ་ཧྥིན་གོ་མེན་དབྱི་ཡིས་དངོས་མིང་བཀོལ་ནས་པོད་ཆུང་དུ་ཞུགས་པར་རྒྱབ་སྐྱོར་ཆེན་པོ་བྱས་ནས་ལོ་གཅིག་ལྷག་གི་དུས་ཡུན་ཐུང་ངུའི་ནང་དད་མོས་པ་བྱེ་བ་གཅིག་ལས་བརྒལ། ལིས་ཁྲང་ཁྲུན་གྱིས་གོ་མེན་དབྱི་དང་ཝུའུ་ཞིག་ཅུན་སོགས་རྒྱལ་ཡོངས་ཀྱི་ཀུན་སྤྱོད་དཔེ་ལེགས་ཅན་ལ་བརྩེ་བའི་ཁ་བརྡ་བྱས་པ་དང་། ལེའོ་ཉིན་གྱིས་གསར་དར་སྨྱན་བྱད་ཁྱབ་སྤེལ་སྔོན་ཐོན་རིག་གནས་སྔར་ལས་ལེགས་པོའི་སྒོ་ནས་བེད་སྤྱོད་བྱས་ནས་སྤྱི་ཚོགས་ཀྱི་དར་སྲོལ་ལ་སྣེ་ཁྲིད་བྱེད་པར་སྐུལ་མ་གནང་ཞིང་། ཉེ་བའི་ལོ་འགའི་རིང་། ལེའོ་ཉིན་གྱིས་རྒྱང་བསྒྲགས་དང་བརྙན་འཕྲིན་མཉམ་བསྲེས་འཕེལ་རྒྱས་ལ་སྐུལ་འདེད་བཏང་ནས་ལེའོ་ཉིན་རྒྱང་སྒྲོག་བརྙན་འཕྲིན་ཁང་བཙུགས་ཏེ། ཐོན་ཁུངས་མཉམ་སྤྱོད་བྱས་པར་གདེང་འཇོག་མཐོན་པོ་གནང་། ལེའོ་ཉིན་ཉིན་རེའི་ཚགས་པར་ཁང་དུ་ལིས་ཁྲང་ཁྲུན་གྱིས་ཁོ་ཚོས་ཕྱོགས་གཅིག་ནས་གསར་འགྱུར་དྲིལ་སྒྲོག་གསར་སྐྲུན་འཛིན་པ་དང་། ཕྱོགས་གཅིག་ནས་སྒྲིག་སྲོལ་བཅོས་བསྒྱུར་སྤེལ་ཏེ། ཏང་གི་ཚགས་པར་གྱི་འགུག་ཤུགས་དང་ཤན་ཤུགས་ཇེ་ཆེར་གཏོང་དགོས་པའི་རེ་བ་བཏོན། ཧྲིན་ཡང་རོལ་མོ་སློབ་གླིང་དུ་ལིས་ཁྲང་ཁྲུན་གྱིས་སློབ་མ་ཚོས་མིང་དུ་གྲགས་པའི་དབྱངས་རྩོམ་མཁན་ཅེ་ཧྥུ་སོགས་ཀྱིས་གསར་རྩོམ་བྱས་པའི་ཕུལ་དུ་བྱུང་བའི་གླུ་དབྱངས་ནང་སྦྱོང་བྱེད་པར་གཟིགས་ཏེ་སློབ་གླིང་གིས་ཕུལ་བྱུང་འཇོན་ཐང་མི་སྣ་དེ་བས་མང་པོ་སྐྱེད་སྲིང་བྱས་ནས་ཕུལ་བྱུང་བརྩམས་ཆོས་སྔར་ལས་མང་པོ་གསར་རྩོམ་བྱེད་དགོས་པའི་སྐུལ་མ་གནང་།རྟོག་ཞིབ་མཇུག་རྫོགས་དུས་ལིས་ཁྲང་ཁྲུན་གྱིས་ལེའོ་ཉིན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བྱ་བའི་སྙན་ཞུ་ལ་གསན་པ་དང་། ལེའོ་ཉིན་གྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་བླངས་པའི་གྲུབ་འབྲས་ལ་གདེང་འཇོག་མཐོན་པོ་གནང་ནས་ལེའོ་ཉིན་གྱིས་བརྗོད་གཞི་ཁོང་དུ་ཆུད་པར་བྱས་ཏེ་ལེའོ་ཉིན་ས་ཆ་རང་གི་ཁྱད་ཆོས་ཡོད་པའི་ཚན་རིག་འཕེལ་རྒྱས་དང་གསར་སྐྲུན་འཕེལ་རྒྱས། འཆམ་མཐུན་འཕེལ་རྒྱས་བཅས་ཀྱི་བགྲོད་ལམ་གསར་བ་ཞིག་ཏུ་བསྐྱོད་དགོས་པའི་རེ་བ་བཏོན།