ཧི་གོ་ཆཱང་གིས་མ་ལེ་ཞི་ཡའི་ཙུང་ལི་གཞོན་པར་མཇལ་འཕྲད་གནང་།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ས་དེའི་ཟླ6པའི་ཚེས16ཉིན་གྱི་དགོང་མོར། མ་ལེ་ཞི་ཡ་རུ་དངོས་གཞིའི་མཛའ་མཐུན་འཚམས་འདྲི་གནང་བཞིན་པའི་ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ། ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཧྲུའུ་ཅི་ཧི་གོ་ཆཱང་གིས་ཅི་ལུང་ཕོ་རུ་མ་ལེ་ཞི་ཡའི་སྲིད་གཞུང་གི་ཙུང་ལི་གཞོན་པ། མ་ལེ་མི་རིགས་གཅིག་གྱུར་ལས་ཁུངས་ཀྱི་གནས་སྐབས་ཀྲུའུ་ཞི་མུའུ་ཞི་ཏེན་ལ་མཇལ་འཕྲད་གནང་།

    ཧི་གོ་ཆཱང་གིས་གསུངས་རྒྱུར། ཀྲུང་གོ་དང་མ་ལེ་ཞི་ཡ་རྒྱལ་ཁབ་གཉིས་ནི་ཁྱིམ་མཚེས་རྒྱལ་ཁབ་ཡིན་ལ། གཉིས་ཀ་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་དང་ཨེ་ཤ་ཡའི་ཁོངས་གཏོགས་རྒྱལ་བ་གལ་ཆེན་ཡིན། རྒྱལ་ཁབ་གཉིས་བར་འབྲེལ་བ་བཙུགས་ནས་ལོ་ངོ་སོ་བརྒྱད་ཀྱི་རིང་ལ། ཕན་ཚུན་ལ་བརྩི་བཀུར་དང་ཡིད་ཆེས། མཛའ་མཐུན་མཉམ་ལས་བཅས་ནི་དུས་དང་རྣམ་པ་ཀུན་ཏུ་རྒྱལ་ཁབ་གཉིས་ཀྱི་འབྲེལ་བའི་འཕེལ་ཕྱོགས་གཙོ་བོ་ཡིན། གནས་བབ་གསར་བའི་འོག་རྒྱལ་ཁབ་གཉིས་ཀྱི་མཛའ་མཐུན་མཉམ་ལས་སྲ་བརྟན་དུ་གཏོང་བ་དང་ཤུགས་སྣོན་པ་ནི་ཀྲུང་གོ་དང་མ་ལེ་ཞི་ཡ་རྒྱལ་ཁབ་གཉིས་ཀྱི་འཕེལ་རྒྱས་ལ་ཕན་པ་དང་། ཨེ་ཤ་ཡ་ཤར་མ་ས་ཁུལ་གྱི་མཉམ་ལས་གཏིང་ཟབ་ཏུ་གཏོང་བར་ཕན་ལ། ས་ཁུལ་གྱི་ཞི་བདེ་དང་བརྟན་འཇགས། འཕེལ་རྒྱས་བཅས་ལ་སྐུལ་འདེད་གཏོང་བར་ཕན། ཀྲུང་གོའི་ཏང་དང་སྲིད་གཞུང་གིས་མ་ལེ་ཞི་ཡའི་བར་གྱི་མཛའ་མཐུན་འབྲེལ་བར་ཧ་ཅང་བརྩི་མཐོང་དང་མཐོང་ཆེན་བྱེད་བཞིན་ཡོད་ལ། མ་ལེ་ཞི་ཡ་དང་མཉམ་དུ་ཆབ་སྲིད་ཐད་ཀྱི་འགྲོ་འོང་ལ་ཤུགས་སྣོན་པ་དང་གཉིས་ཕན་མཉམ་ལས་རྒྱ་བསྐྱེད་ཅིང་། མཛའ་མཐུན་་མཉམ་ལས་ཀྱིས་སྔར་ལས་ལྷག་པའི་སྒོ་ནས་རྒྱལ་ཁབ་གཉིས་ཀྱི་འཕེལ་རྒྱས་ལ་སྐུལ་འདེད་བཏང་ནས་རྒྱལ་ཁབ་གཉིས་ཀྱི་མི་དམངས་ལ་ཁེ་ཕན་བསྐྲུན་འདོད་ཡོད་ཟེར།

    ཧི་གོ་ཆཱང་གིས་ཀྲུང་གོ་དང་མ་ལེ་ཞི་ཡ་གཉིས་ཀྱི་ཏང་རིམ་པའི་འབྲེལ་བར་གདེང་འཇོག་གང་ལེགས་མཛད། ཁོང་གིས་གསུངས་རྒྱུར། མ་ལེ་མི་རིགས་གཅིག་གྱུར་ལས་ཁུངས་ནི་ཨེ་ཤ་ཡ་ཤར་ལྷོའི་ས་ཁུལ་གྱི་རྒྱལ་ཁབ་ཁྲོད་ཆེས་སྔ་ཤོས་སུ་ཀྲུང་གོ་གུང་ཁྲན་ཏང་བར་འབྲེལ་བ་བཙུགས་པའི་སྲིད་འཛིན་ཏང་ཡིན། ལོ་ངོ་མང་བོའི་རིང་ལ་ཏང་གཉིས་ཀྱི་མཛའ་མཐུན་འགྲོ་འོང་ཉིན་བཞིན་ཇེ་ལེགས་སུ་སོང་སྟེ། ནུས་པ་ལྡན་པའི་སྒོ་ནས་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་སུ་འགྲོ་བར་སྐུལ་འདེད་བཏང་། ཀྲུང་གོ་གུང་ཁྲན་ཏང་གིས་མ་ལེ་མི་རིགས་གཅིག་གྱུར་ལས་ཁུངས་བར་གྱི་མཉམ་ལས་འབྲེལ་བར་ཧ་ཅང་མཐོང་ཆེན་བྱེད་བཞིན་ཡོད་ལ། མ་ལེ་མི་རིགས་གཅིག་གྱུར་ལས་ཁུངས་དང་མཉམ་དུ་ཏང་གཉིས་ཀྱི་བརྗེ་རེས་མཉམ་ལས་བརྗེད་ཐོ་ཕྱོགས་ཡོངས་ནས་ལག་ལེན་མཐའ་འཁྱོལ་བྱེད་པ་དང་། ཏང་གཉིས་ཀྱི་མཐོ་རིམ་འགྲོ་འོང་རྒྱུན་འཛིན་བྱེད་པ། ཕན་ཚུན་ལ་སློབ་སྦྱོང་དང་མིག་དཔེ་རུ་བཟུང་ནས་རྒྱལ་སྐྱོང་སྲིད་འཛིན་གྱི་ཉམས་མྱོང་སློབ་སྦྱོང་བྱེད་པ་དང་། རིམ་པ་སོ་སོའི་ལས་བྱེད་པ་དང་ཁྱད་པར་དུ་ན་གཞོན་ལས་བྱེད་པའི་བརྗེ་རེས་རྟོག་ཞིབ་ལ་ཤུགས་བསྣན་ནས་རྒྱལ་སྤྱིའི་སྲིད་ཏང་བརྗེ་རེས་བྱ་འགུལ་ཁྲོད་ཁྱི་མཉམ་ལས་འབྲེལ་བ་རྒྱ་བསྐྱེད་དེ། ཏང་གཉིས་དང་རྒྱལ་ཁབ་གཉིས་ཀྱི་འབྲེལ་བ་རྒྱུན་ཆད་མེད་པར་འཕེལ་རྒྱས་སུ་གཏོང་འདོད་ཡོད་ཟེར།

    མུའུ་ཞི་ཏེན་གྱིས་བཤད་རྒྱུར། མ་ལེ་ཞི་ཡ་དང་ཀྲུང་གོའི་ཏང་གཉིས་ཀྱི་སྔ་མོ་ནས་ཏང་རིམ་པའི་འབྲེལ་བ་བཙུགས་པ་ཡིན་ལ། ཕྱོགས་གཉིས་ཀྱིས་ཐེངས་མང་པོར་བརྗེ་རེས་བྱས་ཏེ་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་སུ་གཏོང་བར་ནུས་པ་གལ་ཆེན་བཏོན། 2010ལོར་ཏང་གཉིས་ཀྱིས་བརྗེ་རེས་མཉམ་ལས་བརྗེད་ཐོ་བཀོད་དེ། ཕྱོགས་གཉིས་ཀྱི་ཏང་རིམ་པའི་འབྲེལ་བ་སྔར་ལས་ལྷག་པའི་སྒོ་ནས་གཏིང་ཟབ་ཏུ་བཏང་ཟེར། མུའུ་ཞི་ཏེན་ཧི་གོ་ཆཱང་གིས་ཏང་གཉིས་ཀྱི་འབྲེལ་བའི་ཐད་གདེང་འཇོག་མཛད་པ་དང་སྔར་ལས་ལྷག་པའི་སྒོ་ནས་ཏང་གཉིས་ཀྱི་འབྲེལ་བ་འཕེལ་རྒྱས་སུ་གཏོང་བའི་གྲོས་གཞི་ལ་ཡིད་མཐུན་བྱུང་བ་དང་། ཁོས་ཏང་གཉིས་ཀྱིས་བརྗེ་རེས་མཉམ་ལས་བརྗེད་ཐོའི་དགོངས་དོན་རྒྱུན་འཁྱོངས་བྱེད་ཐུབ་པར་ཡིད་ཆེས་ཡོད་ལ། ཕྱོགས་གཉིས་ཀྱི་ཏང་རིམ་པའི་བརྗེ་རེས་དང་མཉམ་ལས་ཀྱི་གཞི་རྒྱ་སྔར་ལས་ཡངས་ཤིང་ཆེ་ཟེར། མུའུ་ཞི་ཏེན་གྱིས་ད་དུང་ཀྲུང་གོས་མི་སྡོད་འཇིག་རྟེན་འཕུར་གྲུ་ལྷ་གྲུ་དགུ་བ་བདེ་བླག་ངང་བར་སྣང་དུ་བཏང་བར་ལྷག་བསམ་རྣམ་དག་གིས་རྟེན་འབྲེལ་ཞུས།

    མཇལ་འཕྲད་གྱི་རྗེས་སུ། ཕྱོགས་གཉིས་ཀྱིས་ད་དུང་མཉམ་དུ་ཀྲུང་གོ་དང་མ་ལེ་ཞི་ཡ་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ་འཁོར་སོ་བརྒྱད་ལོན་པའི་འདྲ་པར་འགྲེམ་སྟོན་ལ་གཟིགས།  །