ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།ཀྲུང་དབྱང་བརྙན་འཕྲིན་ཁང་གི་གསར་འགྱུར་ལྟར་ན།མོ་ཞི་ཁོའི་ལོ་སི་ཁ་འོ་སི་རུ་བསྡུས་རྒྱུ་ཡིན་པའི་རྒྱལ་ཁབ་ཉི་ཤུའི་སྡེ་ཚོགས་ཀྱི་མཐོ་རིམ་གྲོས་ཚོགས་ཐེངས་བདུན་པར་ཞུགས་སུ་ཕེབས་པའི་སྔོན་ཏུ།རྒྱལ་ཁབ་ཀྱི་ཀྲུའུ་ཞི་ཧུའུ་ཅིན་ཐོ་ཡིས་མོ་ཞི་ཁོའི་གསར་འགྱུར་ལས་ཁུངས་ཀྱི་ཡིག་ཐོག་གི་བཅར་འདྲི་དང་ལེན་བྱས་ཏེ། རྒྱལ་ཁབ་ཉི་ཤུའི་སྡེ་ཚོགས་ཀྱི་མཐོ་རིམ་གྲོས་ཚོགས་དང་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་མཐུན་སྒྲིལ་དང་མཉམ་ལས།ཀྲུང་གོ་དང་མོ་ཞི་ཁོ་རྒྱལ་ཁབ་གཉིས་ཀྱི་འབྲེལ་བ་སོགས་གནད་དོན་ཐད་ནས་ཀྲུང་གོའི་ལངས་ཕྱོགས་འགྲེལ་བཤད་བྱས་པར་མ་ཟད།ཀྲུང་གོའི་དཔལ་འབྱོར་གྱི་གནས་བབ་དང་མ་འོངས་པའི་འཕེལ་ཕྱོགས་བཅས་མཚམས་སྦྱོར་མཛད།
ཧུའུ་ཅིན་ཐོ་ཡིས་བསྟན་དོན།མིག་སྔར་འཛམ་གླིང་གི་དཔལ་འབྱོར་ལ་མུ་མཐུད་དུ་སླར་གསོ་འབྱུང་བའི་རྣམ་པ་མངོན་མོད།ཡིན་ཡང་སླར་གསོ་བྱེད་པར་གཏན་འཇགས་མིན་པའི་རྒྱུ་རྐྱེན་སྔར་བཞིན་ཛ་དྲག་ཆེ་བ་དང་།འཛམ་གླིང་དཔལ་འབྱོར་ལ་སྟོབས་ཤུགས་རྒྱས་པ་དང་། རྒྱུན་མཐུད་དང་ཆ་སྙོམས་སྒོས་འཕེལ་རྒྱས་འབྱུང་བར་མངོན་འགྱུར་བྱེད་ཆེད་ད་དུང་འབད་པ་བྱེད་དགོས་ཤིང་། རྒྱལ་ཁབ་ཉི་ཤུའི་སྡེ་ཚོགས་ཀྱི་ཁོངས་ཞུགས་རྒྱལ་ཁབ་སོ་སོས་ལག་རྡང་གཅིག་སྦྲེལ་དང་གཉིས་ཕན་མཉམ་རྒྱལ་ཀྱི་སྙིང་སྟོབས་ལ་ཁ་ཕྱོགས་ཏེ། མཉམ་དུ་འཕེལ་རྒྱས་ཁག་ཐེག་དང་གཏན་འཇགས་ལ་སྐུལ་འདེད་བྱེད་པར་ཤུགས་བསྐྱེད་དེ་ཐོབ་དཀའ་བའི་དཔལ་འབྱོར་སླར་གསོའི་རྣམ་པ་འདི་ཇེ་བརྟན་དང་ཇེ་དྲག་ཏུ་གཏོང་དགོས།ཡོ་རོབ་གླིང་གི་རང་བདག་བུ་ལོན་སོགས་ཕྱོགས་སོ་སོས་དོ་སྣང་བྱེད་བཞིན་པའི་གནད་དོན་ཐད་ལ་འཛུགས་བསྐྲུན་རང་བཞིན་དང་མཉམ་ལས་རང་བཞིན་གྱི་བྱེད་ཐབས་ལས་གླེང་མོལ་བྱེད་དགོས་པ་དང་།ཡོ་རོབ་ཕྱོགས་ཀྱི་འབྲེལ་ཡོད་འབད་པ་ལ་སྐུལ་མ་དང་རྒྱབ་སྐྱོར་བྱས་ཏེ་མཉམ་དུ་ཚོང་རར་ཡིད་ཆེས་བྱེད་དགོས། ངས་རྒྱལ་ཁབ་སོ་སོའི་མགོ་ཁྲིད་པས་ལོ་སི་ཁ་ལོ་སི་རུ་མཉམ་དུ་འཛམ་གླིང་གི་དཔལ་འབྱོར་གཏན་འཇགས་དང་སླར་གསོ་གཏོང་བར་སྐུལ་འདེད་བྱེད་པའི་ཇུས་ཆེན་གྲོས་མོལ་བྱེད་རྒྱུ་རེ་བ་བཅངས་ཡོད་ཟེར།
ཧུའུ་ཅིན་ཐོ་ཡིས་བསྟན་དོན།འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱིས་མཐུན་སྦྱོར་ལ་ཤུགས་བསྐྱེད་དེ་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་འཕེལ་རྒྱས་ཀྱི་བར་སྟོང་དང་འཕེལ་རྒྱས་ཀྱི་དབང་ཆ་ལ་སྲུང་སྐྱོབ་བྱེད་དགོས་པ་དང་།རྒྱལ་སྤྱིའི་སྤྱི་ཚོགས་ཀྱིས་མུ་མཐུད་དུ་དོ་སྣང་བྱེད་བཞིན་པའི་འཕེལ་རྒྱས་ཀྱི་གནད་དོན་ལ་སྐུལ་འདེད་བྱས་ཏེ།འཕེལ་རྒྱས་སུ་སོང་ཡོད་པ་དང་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་ཆ་སྙོམས་མིན་པའི་གནད་དོན་ལ་ནུས་ཤུགས་བཏོན་ནས་དུས་ཡུན་རིང་བོའི་ཞི་བདེ་དང་ཐུན་མོང་དར་རྒྱས་ཀྱི་འཆམ་མཐུན་གྱི་འཛམ་གླིང་གི་འཛུགས་བསྐྲུན་བྱེད་པར་སྐུལ་འདེད་བྱེད་དགོས་ཟེར།
ཧུའུ་ཅིན་ཐོ་ཡིས་བསྟན་དོན།ཀྲུང་གོ་དང་མོ་ཞི་ཁོ་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ་ངོ་བཞི་བཅུ་འགོར་བའི་རིང་ལ་ཕྱོགས་གཉིས་ཀྱི་འབྲེལ་བ་ལ་འཕེལ་རྒྱས་ལེགས་པོ་བྱུང་ཡོད།མིག་སྔར་འགྱུར་ལྡོག་ཆེ་བའི་རྒྱལ་སྤྱིའི་གནས་བབ་ལ་ཁ་གཏད་དེ། ཀྲུང་གོ་དང་མོ་ཞི་ཁོ་རྒྱལ་ཁབ་གཉིས་ཀྱིས་མུ་མཐུད་དུ་འཐབ་ཇུས་ཀྱི་མཉམ་ལས་ཇེ་བརྟན་ཇེ་ཟབ་དུ་གཏོང་རྒྱུ་དེ་རྒྱལ་ཁབ་གཉིས་ཀྱི་ཐུན་མོང་གི་འཕེལ་རྒྱས་ལ་ཕན་པར་མ་ཟད།འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་མཐུན་སྒྲིལ་དང་མཉམ་ལས་ལ་ཤུགས་བསྐྱེད་པ་དང་།འཛམ་གླིང་གི་ཞི་བདེ་དང་འཕེལ་རྒྱས་ལ་སྐུལ་འདེད་གཏོང་བར་བཅས་ལའང་དོན་སྙིང་ཆེན་པོ་ལྡན་པས། ཀྲུང་གོའི་ཕྱོགས་ཀྱིས་མོ་ཞི་ཁོ་དང་མཉམ་དུ་འབད་པ་བྱས་ཏེ། རྒྱལ་ཁབ་གཉིས་ཀྱི་འཐབ་ཇུས་མཉམ་ལས་ཀྱི་ནང་དོན་མུ་མཐུད་དུ་ཕུམ་སུམ་ཇེ་ཚོགས་སུ་བཏང་ནས་རྒྱལ་ཁབ་གཉིས་ཀྱི་གཉིས་ཕན་མཉམ་ལས་དུས་ཡུན་རིང་བོ་ཞིག་ལ་གཏན་འཇགས་དང་བདེ་བླག་ངང་འཕེལ་རྒྱས་སུ་གཏོང་བར་སྐུལ་འདེད་བྱེད་འདོད་ཡོད་ཟེར།
ཧུའུ་ཅིན་ཐོ་ཡིས་བསྟན་དོན།མིག་སྔར་ཀྲུང་གོའི་དཔལ་འབྱོར་གྱི་འཁོར་རྒྱུག་སྤྱིའི་ཆ་ནས་གཏན་འཇགས་ཡིན་པས། འཛམ་གླིང་གི་དཔལ་འབྱོར་སླར་གསོ་དང་འཕེལ་རྒྱས་སུ་གཏོང་བར་བྱས་རྗེས་ཆེན་པོ་བཞག་ཡོད་།ཀྲུང་གོས་མུ་མཐུད་དུ་ནོར་སྲིད་སྲིད་ཇུས་དང་དངུལ་ལོར་སྲིད་ཇུས་ལེགས་ཤོས་དག་ལག་བསྟར་བྱས་ཏེ། དཔལ་འབྱོར་གཏན་འཇགས་དང་མགྱོགས་མྱུར་ངང་འཕེལ་རྒྱས་སུ་འགྲོ་བར་མུ་མཐུད་དུ་རྒྱུན་འཁྱོངས་དང་།དཔལ་འབྱོར་གྱི་སྒྲིག་གཞི་སྙོམས་སྒྲིག་སོགས་ཡང་དག་པའི་སྒོ་ནས་ཐག་གཅོད་བྱེད་ངེས།ང་ཚོས་དཔལ་འབྱོར་གཏན་འཇགས་དང་མགྱོགས་མྱུར་ངང་འཕེལ་རྒྱས་སུ་འགྲོ་བར་མུ་མཐུད་དུ་རྒྱུན་འཁྱོངས་བྱས་ནས་འཛམ་གླིང་གི་དཔལ་འབྱོར་འཕེལ་རྒྱས་ཐད་ལ་དོན་དམ་པའི་བྱས་རྗེས་འཇོག་ཐུབ་པའི་ཡིད་ཆེས་ཡོད་ཟེར།