ཟླ་བཞི་བའི་ཚེས་བཅུ་བཞིའི་ཉིན།ཀྲུང་གོའི་དམངས་ཁྲོད་རིག་རྩལ་པའི་མཐུན་ཚོགས་དང་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་མི་དམངས་སྲིད་གཞུང་གཉིས་ཀྱིས་པེ་ཅིན་དུ་མཉམ་འབྲེལ་སྒོས་སྤེལ་པའི་གསར་འགྱུར་ཁྱབ་བསྒྲགས་ཚོགས་འདུའི་སྟེང་རྒྱུས་ལོན་བྱུང་བ་ལྟར་ན།རིང་ཚད་ལ་རྨིད་བརྒྱ་དང་བརྒྱད་ཅན་གྱི«རྒྱ་བཟའ་ཀོང་ཇོ་བོད་ཡུལ་དུ་ཕེབས་པ»ཞེས་པའི་ཐང་ག་རིང་མོ་དེ་ད་ལོའི་ཟླ་བཅུ་བའི་ནང་ལེགས་འགྲུབ་འབྱུང་རྒྱུ་རེད།ཐང་ག་དེ་ན་ནིང་གི་ཟླ་བཅུ་བ་ནས་བཟུང་བཞེངས་མགོ་ཚུགས་པ་དང་།ཐང་ག་དེ་འབྲི་བཞེངས་སྐོར་གྱི་འགན་འཁུར་པའམ་ཐང་གའི་སྒྱུ་རྩལ་པ་དོན་གྲུབ་ཚེ་བརྟན་གྱིས་གསར་འགྱུར་ཁྱབ་བསྒྲགས་ཚོགས་འདུའི་སྟེང་མཚམས་སྦྱོར་བྱས་དོན།  ཁོས་རིང་ཚད་ལ་རྨིད་བརྒྱ་དང་བརྒྱད་ཡོད་པའི«རྒྱ་བཟའ་ཀོང་ཇོ་བོད་ཡུལ་དུ་ཕེབས་པ»ཞེས་པའི་ཐང་ག་རིང་མོའི་སྟེང་གཏམ་རྒྱུད་ཁག་ཉེར་གསུམ་བརྗོད་ཅིང་།སྲོང་བཙན་སྒམ་པོས་རྒྱལ་ས་ལྷ་སར་སྤོར་བ་དང་།དཔལ་འབྱོར་འཕེལ་རྒྱས་སུ་བཏང་བ།བློན་པོ་མགར་སྟོང་བཙན་གྱིས་ཐང་གི་རྒྱལ་བོར་གཉེན་སློང་བ།རྒྱ་བཟའ་ཀོང་ཇོ་རི་བོ་ཉི་ཟླར་བརྒྱུད་པ་དང་མཚོ་སྔོན་པོར་གཟིགས་སྐོར་བྱེད་པ་སོགས་ཀྱི་ལོ་རྒྱུས་དང་དམངས་སྲོལ་གྱི་རྣམ་པ་མངོན་པར་བཏོད་ཅིང་།ཁོས་མི་སྣའི་སྣང་བརྙན་གྱི་ཁྱད་ཆོས་འབུར་དུ་བཏོད་པའི་དགོས་མཁོ་ལ་གཞིག་སྟེ་ཀན་སུའུ་ཏུན་ཧོང་དང་། བོད་ལྗོངས་གུ་གེ་རྒྱལ་རབས་ཀྱི་གནའ་ཤུལ་ལྡེབས་རིས། དེ་མིན་ཀྲུང་གོའི་ཚོན་རིས།ཕྱི་ལུགས་ཚོན་རིས་སོགས་ཀྱི་མཚོན་ཐབས་ཀྱི་རྣམ་པ་སྣ་ཚོགས་ཤིག་བེད་སྤྱོད་བྱས་ཡོད་ཟེར།ཚོགས་འདུར་ཞུགས་པའི་རྒྱལ་སའི་མཐོ་རིམ་སློབ་ཆེན་དང་མཛེས་རྩལ་ཁྱབ་ཁོངས་ཀྱི་འབྲེལ་ཡོད་ཤེས་ལྡན་པ་དང་།ཆེད་མཁས་པ།རི་མོའི་སྒྱུ་རྩལ་པ་རྣམས་ཀྱིས«རྒྱ་བཟའ་ཀོང་ཇོ་བོད་ཡུལ་དུ་ཕེབས་པ»ཞེས་པའི་ཐང་ག་རིང་མོའི་གསར་སྐྲུན་དང་རིན་ཐང་ལ་ཚད་མཐོའི་གདེང་འཇོག་གནང་བར་མ་ཟད།སྔར་ལས་ལྷག་པར་ཇི་ལྟར་གསར་སྐྲུན་བྱེད་རྒྱུ་དང་སྒྱུ་རྩལ་རྒྱུད་འཛིན་བྱེད་རྒྱུའི་ཐད་ལ་བསམ་འཆར་དང་རེ་བ་གང་ལེགས་བཏོན།